এন আৰ চিৰ মূল পৰ্বৰ সমাপ্তিৰ পিছত এইবাৰ অসমত ৬ অক্তোবৰৰ পৰা চৰকাৰীভাৱে আৰম্ভ হ’ব আধাৰ কাৰ্ড প্ৰস্তুতৰ কাম। শেহতীয়াকৈ উচ্চতম ন্যায়ালয়েও আধাৰ সম্পৰ্কীয় আপত্তিসমূহ শুনাৰ পিছত আধাৰ কাৰ্ড প্ৰস্তুতিত সেউজ সংকেত প্ৰদান কৰিছিল।
আধাৰৰ বাবে ৰাজ্যবাসী কিদৰে আগবাঢ়িব লাগিব সেই সম্পৰ্কে আমি কথা পাতিছিলো কামৰূপ মহানগৰ জিলাৰ আধাৰ কেন্দ্ৰৰ পৰিচালনাৰ দায়িত্বত থকা মহানগৰ জিলাৰ অতিৰিক্ত উপায়ুক্ত গুণজিৎ কাশ্যপৰ সৈতে।
কাশ্যপে জনাই যে আবেদনকাৰীসকলে একেদিনাই আধাৰ কাৰ্ড নাপাব আৰু কাৰ্ড পোৱাৰ বাবে এক নিৰ্দিষ্ট প্ৰক্ৰিয়াৰ মাজেৰে যাব লাগিব।
“প্ৰথমতে আবেদনকাৰীক আধাৰ কাৰ্ড প্ৰস্তুতৰ নিৰ্দ্ধাৰিত সময়ৰ পত্ৰ দিয়া হ’ব। সেইমতে আবেদনকাৰীয়ে দ্বিতীয়বাৰ কেন্দ্ৰবোৰৰ নিৰ্দ্ধাৰিত কৰি দিয়া দিনত আহি আধাৰ কাৰ্ড প্ৰস্তুতৰ বাবে সকলো নথি-পত্ৰ জমা দিয়া আৰু বায়’মেট্ৰিক্স তথ্য দিব লাগিব। তাৰ পিছতহে আবেদনকাৰীয়ে আধাৰ কাৰ্ড পাব,” জনালে কাশ্যপে।
একোজন ব্যক্তিৰ চকু আৰু ফিংগাৰ প্ৰিণ্টৰ একক পৰিচয় (unique identity)এ লোকজনৰ বায়’মেত্ৰিক্স তথ্য।
৬ অক্তোবৰৰ পৰা দৈনিক পুৱা ৯.৩০ বজাৰপৰা বিয়লি ৫ বজালৈকে আধাৰ কেন্দ্ৰবোৰ ৰাইজৰ বাবে মুকলি থাকিব।
ৰাজ্যত ইতিমধ্যে সাজু কৰি তোলা আধাৰ প্ৰস্তুতিৰ চৰকাৰী কেন্দ্ৰবোৰত বিশেষভাৱে সক্ষম লোক, বয়োজ্যেষ্ঠ, শিশু আৰু গৰ্ভৱতী মহিলাসকলক অগ্ৰাধিকাৰ দিয়া হ’ব বুলিও সদৰী কৰিছে বিষয়াজনে।
ৰাজ্য চৰকাৰৰ সাধাৰণ প্ৰশাসন বিভাগে ৰাজ্যৰ ৩৩খন জিলাত আধাৰ কাৰ্ড প্ৰস্তুত কৰাৰ বাবে ইতিমধ্যে ১,৪২১টা আধাৰ কেন্দ্ৰ চিনাক্ত কৰিছে। নিৰ্দ্ধাৰিত জিলাত স্থাপন কৰা আধাৰ কেন্দ্ৰবোৰ জিলা প্ৰশাসনে পৰিচালনা কৰিব।
“ইতিমধ্যে কামৰূপ মহানগৰ জিলাত ৪২টা আধাৰ কেন্দ্ৰ স্থাপন কৰিছে। ইয়াৰে ২০টা আধাৰ কেন্দ্ৰ গুৱাহাটী মহানগৰীত আৰু ২২টা কামৰূপ মহানগৰ জিলাৰ গাওঁ পঞ্চায়ত এলেকাত স্থাপন কৰা হৈছে,” কামৰূপ জিলাৰ আধাৰ কেন্দ্ৰ সন্দৰ্ভত এই কথা জনাইছে বিষয়াজনে।
কাশ্যপে লগতে কয় যে সাধাৰণ প্ৰশাসন বিভাগে কেন্দ্ৰবোৰত দৈনিক ৪০ গৰাকী লোকৰ আধাৰ কাৰ্ডৰ অন্তৰ্ভুক্তিকৰণৰ কাম কৰাৰ নিৰ্দেশ দিছে যদিও বাস্তৱত সেয়া সম্ভৱ নহ’ব আৰু এই কামত অধিক সময়ৰ প্ৰয়োজন হ’ব।
ইতিমধ্যে ৰাজ্যত থকা বেংকবোৰত আধাৰ কাৰ্ড প্ৰস্তুতৰ কাম চলি আছে যদিও সকলো বেংক শাখাতে এই কাম নচলাৰ বাবে বেংকবোৰে সকলো নাগৰিককে সামৰি ল’ব পৰা নাই।
অসম সাধাৰণ প্ৰশাসন বিভাগৰ তথ্য মতে ৰাজ্যৰ ৩ কোটি ৪০ লাখ ৬৮ হেজাৰ জনসংখ্যাৰ ভিতৰত ২৪.৩৪ লাখ লোকৰহে এতিয়ালৈকে আধাৰ কাৰ্ড হৈছে।
