ৰাজ্যৰ সাংস্কৃতিক জগতত এক খালি থাই এৰি থৈ আজিৰ পৰা নোহোৱা হ’ল বিশিষ্ট শিল্পী তথা সংগীত পৰিচালক কিশোৰ গিৰি।
হৃদৰোগত আক্ৰান্ত হৈ গুৱাহাটীৰ খাৰঘূলিস্থিত নিজ বাসগৃহত শেষ নিশ্বাস ত্যাগ কৰা শিল্পীগৰাকীৰ মৃত্যুৰ সময়ত বয়স আছিল ৬৪ বছৰ।
উল্লেখযোগ্য যে বিভিন্ন সময়ত বিভিন্ন বিষয় সন্দৰ্ভত সচেতনতা সৃষ্টিৰ লগতে প্ৰতিবাদৰ ভাষা হিচাপেও ব্যস্ত মহানগৰীৰ ৰাজপথৰ মাজত হাতত এখন গীতাৰ লৈ থকা কিশোৰ গিৰিক দেখিবলৈ পোৱা গৈছিল।
শেহতীয়াকৈ তেওঁ অসম চৰকাৰ তথা ৰাজ্যৰ জনসাধাৰণক অস্কাৰত ভিলেজ ৰ’কষ্টাৰৰ প্ৰচাৰৰ বাবে আৰ্থিক সহায়ৰ অনুৰোধ জনাই গুৱাহাটীৰ ৰাজপথলৈ ওলাই আহিছিল।
ইয়াৰ উপৰি বহু অসমীয়া ছবি আৰু ধাৰাবাহিকতো প্ৰয়াত কিশোৰ গিৰিয়ে সংগীত পৰিচালনা কৰিছিল।
তেওঁৰ এই আকস্মিক বিয়োগত ৰাজ্যৰ সাংস্কৃতিক জগতৰ ব্যক্তিসকলৰ লগতে তেওঁৰ গুণমুগ্ধই গভীৰ শোক প্ৰকাশ কৰিছে।
