নৰ্থ-ইষ্ট নাওৰ বাতৰিত ভাৰপ্ৰাপ্ত বিষয়া হিচাপে আঁতৰালে চহিদ ভাস্কৰ কলিতাৰ নাম; নোসোমাল চহিদৰ তালিকাত

অসম আৰক্ষীৰ ৱেবছাইটত চহিদ ভাস্কৰ কলিতাৰ নাম তিনিচুকীয়া জিলাৰ ফিল’বাৰী আৰক্ষী থানাৰ ভৰাপ্ৰাপ্ত বিষয়া হিচাপে উল্লেখ থকাৰ বাতৰি নৰ্থ ইষ্ট নাওত প্ৰকাশ হোৱাৰ পিছতে গা লৰিল বিভাগটোৰ। যোৱা ৮ অক্তোবৰত এই প্ৰমাদৰ কথা সবিস্তাৰে প্ৰকাশ পাইছিল নৰ্থ ইষ্ট নাওত। তাৰ পিছতে বিভাগটোৱে নিজৰ ৱেবছাইটত উক্ত থানাখনৰ ভাৰপ্ৰাপ্ত বিষয়াৰ স্থানত বৰ্তমানৰ বিষয়াগৰাকীৰ নাম অন্তৰ্ভুক্ত কৰিছে।

উল্লেখ্য যে, যোৱা ৪ মে’তে উগ্ৰপন্থীৰে হোৱা সংঘৰ্ষত চহিদ হৈছিল আৰক্ষীৰ উপ-পৰিদৰ্শক ভাস্কৰ কলিতা। সেই সময়ত তেওঁ আছিল বৰডুমচা থানাৰ ভাৰপ্ৰাপ্ত বিষয়াৰ দায়িত্বত। কিন্তু তেওঁৰ মৃত্যুৰ কেইবামাহো পাৰ হৈ যোৱাৰ পাছতো তেওঁৰ নাম ফোন নম্বৰ অসম আৰক্ষীৰ ৱেবছাইটত তিনিচুকীয়া জিলাৰ থানাসমূহৰ ভাৰপ্ৰাপ্ত বিষয়াসকল তালিকাখনত উপলব্ধ হৈয়ে আছিল।

প্ৰায় এমাহ আগলৈ জিলাখনৰ পানীতোলা আৰক্ষী চকীৰ দায়িত্বত থকা বুলি চহিদগৰাকীৰ নাম আৰু ফোন নম্বৰ আৰক্ষীৰ ৱেবছাইটত সন্নৱিষ্ট আছিল। এই সন্দৰ্ভত নৰ্থ-ইষ্ট নাওত যোৱা ১৭ ছেপ্তেম্বৰত ‘ডিজিটেল ইণ্ডিয়া’ৰ দিনত কিমান‘ডিজিটেল’ অসম আৰক্ষী?’ শিৰোনামেৰে বাতৰি প্ৰকাশ হৈছিল।

কিন্তু এই বাতৰিৰ পাছত ৱেবছাইটত পানীতোলা আৰক্ষী চকীৰ স্থানৰ পৰা ভাস্কৰ কলিতাৰ নাম আঁতৰাইছিল ঠিকেই। কিন্তু তেওঁৰ নাম সুমাইছিল ফিল’বাৰী থানাৰ ভাৰপ্ৰাপ্ত বিষয়া হিচাপে।

এই বিষয়ত যোৱা ৮ অক্তোবৰত ‘চহিদ আৰক্ষী বিষয়া ভাস্কৰ কলিতাক ফিল’বাৰী থানাৰ ভাৰপ্ৰাপ্ত বিষয়া হিচাপে বদলি!’ শিৰোনামেৰে নৰ্থ-ইষ্ট নাওত পুনৰ বাতৰি প্ৰকাশ পাইছিল।

তাৰ পিছত বিভাগটোৱে ইয়াৰ ৱেবছাইটৰ এই তালিকাখনৰ পৰা চহিদ ভাস্কৰ কলিতাৰ নাম আঁতৰালে। সেই স্থান পূৰালে বৰ্তমানৰ থানাখনৰ ভাৰপ্ৰাপ্ত বিষয়া পুহেশ্বৰ দাসৰ নামেৰে। কিন্তু এতিয়ালৈ পুহেশ্বৰ দাসৰ ফোন নম্বৰটো তালিকাখনত অন্তৰ্ভূক্ত হোৱা নাই।

ইপিনে ভাস্কৰ কলিতাৰ থানাসমূহৰ ভাৰপ্ৰাপ্ত বিষয়াসকলক যোগাযোগ কৰিব পৰা নম্বৰৰ তলিকাখনৰ পৰা আঁতৰালে যদিও তেওঁৰ নাম অন্তৰ্ভুক্ত হোৱা নাই অসম আৰক্ষীৰ ৱেবছাইটৰ চহিদৰ তালিকাখনত।

উল্লেখ্য যে, কেৱল ভাস্কৰ কলিতাই নহয়, অসম আৰক্ষীৰ ৱেবছাইটত পোৱা নাযায় বিভিন্ন সময়ত ৰাইজৰ সেৱাত প্ৰাণ আহুতি দিয়া আন আন চহিদসকলৰ নামো।

নামত ৱেবচাইটটোত Martyr of Assam Police বুলি এটা লিংক পোৱা যায়। তাত ১৯৫৬-১৯৫৭ আৰু ১৯৮৬-২০১৪ চনলৈ প্ৰতিটো বছৰত চহিদবৰণ কৰাসকলৰ নামৰ বাবে ঠাই ৰখা হৈছে। কিন্তু তাত ক্লিক কৰিলে কেৱল ‘ERROR’ বুলিহে পোৱা যায়। অৰ্থাৎ সেই স্থানসমূহ হয়টো পূৰণ কৰাই হোৱা নাই।