জাতীয় দল-সংগঠনৰ হুংকাৰৰ পাছত এইবাৰ সুৰ সলনি কৰি নাগৰিকত্ব সংশোধনী বিধেয়ক সন্দৰ্ভত পৰস্পৰ বিৰোধী স্থিতি লৈ গুৱাহাটীত সমাৱেশ পতাৰ চাতুৰি খেলিছে নাগৰিক অধিকাৰ সুৰক্ষা মঞ্চ, অসমে। যাৰ বাবে ভিত্তিহীন যুক্তি আৰু খিলঞ্জীয়া দল-সংগঠনক তেল মৰাৰ চেষ্টাৰে বিধেয়কখনৰ প্ৰতি পোনপটীয়া সমৰ্থনৰ কথা লুকুৱাই এইবাৰ ‘মৈত্ৰী সন্মিলন’ আখ্যা দি এই সমাৱেশৰ বাবে অৱতীৰ্ণ হৈছে বিজেপি বিধেয়ক শিলাদিত্য দেব নেতৃত্বত থকা ২৬ বাঙালী সংগঠনৰ উমৈহতীয়া মঞ্চ বুলি পৰিচয় দিয়া সংগঠনটো।
১৫ অক্তোবৰত দিচপুৰ প্ৰেচ ক্লাবত সংবাদমেল পাতি সম্পূৰ্ণ দুমুখীয়া স্থিতি লৈ এহাতে ‘অসম চুক্তি’ আৰু অন্যহাতে ‘নাগৰিকত্ব সংশোধনী বিধেয়ক ২০১৬’-দুয়োফালেই সমৰ্থন আগ বঢ়ালে নাগৰিক অধিকাৰ সুৰক্ষা মঞ্চ, অসমে।
উল্লেখযোগ্য যে অহা ১৭ নৱেম্বৰত ‘নাগৰিকত্ব সংশোধনী বিধেয়ক ২০১৬’-অৰ সমৰ্থনত গুৱাহাটীত সমাৱেশ পতাৰ সিদ্ধান্ত লোৱাৰ পাছত অসমৰ খিলঞ্জীয়া ৰাইজ আৰু জাতীয় দল-সংগঠনৰ মাজত সৃষ্টি হৈছিল তীব্ৰ প্ৰতিক্ৰিয়া। বিভিন্ন দল-সংগঠনৰ লগতে আলফা (স্বাঃ)য়ো নাগৰিক অধিকাৰ সুৰক্ষা মঞ্চ, অসমৰ এই কাৰ্যৰ বিৰুদ্ধে হুংকাৰ দিছিল। ইয়াৰ পাছতেই সুৰ সলনি কৰি ১৭ নৱেম্বৰত ‘মৈত্ৰী সন্মিলন’হে পাতিব বুলি মন্তব্য কৰে সুকুমাৰ বিশ্বাস, কমল চৌধুৰী প্ৰমুখ্যে উমৈহতীয়া মঞ্চখনৰ আহ্বায়কসকলে।
সংবাদমেলত মঞ্চৰ আহ্বায়ক সুকুমাৰ বিশ্বাসে কয়, “এই সমাৱেশ খিলঞ্জীয়াৰ বিৰুদ্ধে নহয়, নাগৰিকত্ব সংশোধনী বিধেয়কৰ সপক্ষে নহয়, এই সমাৱেশ সকলো জাতি-জনগোষ্ঠীৰ মাজত মৈত্ৰী স্থাপনৰ বাবেহে। আমি অসমৰ সকলো দল সংগঠনৰ লোককে এই সমাবেশলৈ আমন্ত্ৰণ জনাম।”
উল্লেখ্য যে, সংবাদমেলত নাগৰিক অধিকাৰ সুৰক্ষা মঞ্চ, অসমে ১৭ নৱেম্বৰৰ এই সমাৱেশ নাগৰিকত্ব সংশোধনী বিধেয়কৰ সপক্ষে নহয় বুলি মন্তব্য কৰি বিধেয়কখনক লৈ হৈ থকা অপপ্ৰচাৰ আৰু ভুল ধাৰণা আঁতৰাবলৈহে পাতিছে বুলি পতিয়ন নিয়াবলৈ চেষ্টা কৰে।
ইপিনে ১৯৭১ চনৰ পাছত কোনো হিন্দু বাংলাদেশী অসমলৈ অহা নাই বুলি উদ্ভট মন্তব্য কৰে মঞ্চৰ আহ্বায়ক তথা সদৌ অসম বাঙালী যুৱ ছাত্ৰ ফেডাৰেইশ্যনৰ সভাপতি কমল চৌধুৰীয়ে।
লগতে অসম চুক্তিৰ বিৰোধিতা নকৰে বুলি কৈও দুমুখীয়া স্থিতি লৈ নাগৰিকত্ব সংশোধনী বিধেয়কৰ সমৰ্থনত ওকালতি কৰে কমল চৌধুৰীয়ে। তেওঁ কয়, “এন আৰ চিৰ খচৰাত নাম বাদ পৰা ১৯৭১ৰ ২৪ মাৰ্চৰ পূৰ্বে অহা আৰু ‘ডি ভোটাৰ’ হিচাপে চিহ্নিত হিন্দু বাঙালী লোকৰ স্বাৰ্থতহে বিধেয়কখন বিচাৰো। এই বিধেয়কখনে বাংলাদেশত থকা হিন্দুক অসমলৈ আনিব বুলি কোৱা নাই।”
লগতে এন আৰ চিৰ সপক্ষে থকা বুলি নিজকে জাহিৰ কৰিবলৈও নেৰিলে চৌধুৰীয়ে। ১৯৭১ৰ পাছৰ হিন্দু বাংলাদেশীক অসমত স্থান দিলে তেওঁ হেনো নিজে ৰাস্তাত আন্দোলন কৰিবলৈ ওলাই আহিব।
মন কৰিব লগীয়া যে কেন্দ্ৰ আৰু ৰাজ্যত শাসনত থকা বিজেপিৰ দৰে ‘অসম চুক্তি’, ‘নাগৰিকত্ব সংশোধনী বিধেয়ক’ সকলোকে একাকাৰ কৰা এই মঞ্চখনে নিজকে বিজেপিৰ ‘বি টীম’ বুলি স্বীকাৰ নকৰে যদিও বিজেপিৰ বিধায়ক শিলাদিত্য দেব এই মঞ্চৰ মুখ্য আহ্বায়ক। লক্ষণীয়ভাৱে আজিৰ সংবাদমেলতো মঞ্চত নুঠি সাংবাদিকৰ সৈতে শাৰী পূৰাই থাকিল বিতৰ্কিত বিধায়ক শিলাদিত্যই।
“শিলাদিত্য দেব বাঙালী মানুহ, সেয়ে আমাৰ প্ৰতি সদ্ভাৱ আছে”, মন্তব্য মঞ্চৰ আহ্বায়কসকলৰ।
আনহাতে আজিৰ সংবাদমেলত দেখা গ’ল অসমৰ জাতীয় দল-সংগঠনক মঞ্চৰ বিষয়ববীয়াৰ তেল মৰাৰ প্ৰচেষ্টা। যি সময়ত নাগৰিকত্ব সংশোধনী বিধেয়কক লৈ সকলে জাতীয়-জনগোষ্ঠীয় দল-সংগঠনে তীব্ৰ আন্দোলন কৰি আছে সেই সময়ত বিধেয়কখনৰ সপক্ষে থিয় দিয়া এই মঞ্চখনে সদৌ অসম ছাত্ৰ সন্থা, জাতীয়তাবাদী যুৱ ছাত্ৰ পৰিষদকে ধৰি বিভিন্ন জাতীয় দল সংগঠনৰ লগতে আলোচনা বিচাৰে বুলি মন্তব্য কৰে। অসমৰ ৰাইজ আৰু জাতীয়-জনগোষ্ঠীয় দল-সংগঠনে বোলে ১৭ নৱেম্বৰত হ’ব লগীয়া সমাৱেশক লৈ ভুল ধাৰণাত আছে। গতিকে এই ভুল তেওঁলোকে শুধৰাব বিচাৰে।
লগতে নাম ল’লে আলোচনাপন্থী আলফা নেতা জিতেন দত্তৰো। আলফা নেতাগৰাকীৰ সৈতেও আলোচনাৰ মন তেওঁলোকৰ। আলফা (স্বাঃ)ৰ সেনাধ্যক্ষ পৰেশ বৰুৱায়ো বোলে বিষয়টো ভালদৰে বুজি পোৱা নাই। তেওঁকো বিষয়তো চালি-জাৰি চোৱাৰ বাবে অনুৰোধ।
মুঠৰ ওপৰত আজি এক নৰম স্থিতিৰে জাতীয় দল-সংগঠন আৰু খিলঞ্জীয়া ৰাইজৰ মন জয়ৰ চেষ্টা চলালে নাগৰিক অধিকাৰ সুৰক্ষা মঞ্চ, অসমে।
