সম্প্ৰীতিৰ বিৰল নিদৰ্শন! পাঞ্জাবাৰীত হিন্দু-মুছলমানে একেলগে মিলি পাতিছে দুৰ্গোৎসৱ

অসমৰ সমাজখনত বৰ্তি থকা কৌটিকলীয়া ধৰ্মীয় সম্প্ৰীতি এটা গুজৱ নহয়। ই বাস্তৱ। তাৰ প্ৰমাণ আমি মাজে মাজে পায়ে থাকো। প্ৰতি বছৰে দুৰ্গা পূজাৰ সময়ত দেখি অহা কথাটো হ’ল, হিন্দুসকলৰ গুৰুত্বপূৰ্ণ ধৰ্মীয় উৎসৱটোৰ প্ৰতি অসমৰ মুচলমানসকলৰো আছে সন্মান আৰু সহযোগিতা।

সমগ্ৰ দেশতে ধৰ্মীয় অসিষ্ণুতা বৃদ্ধি হোৱাৰ অভিযোগ উঠিলেও শংকৰ-আজানৰ দেশ অসমত এতিয়াও হেৰাই যোৱা নাই এই দুয়োটা সম্প্ৰদায়ৰ মিলাপ্ৰীতি। তেনেকুৱা নিদৰ্শন দাঙি ধৰিছে গুৱাহাটীৰ পাঞ্জাবাৰীৰ জুৰিপাৰৰ বাসিন্দাসকলে। জুৰিপাৰৰ স্থানীয় লোকসকলে জাতি-ধৰ্ম নিৰ্বিশেষে অনুষ্ঠিত কৰিছে ‘সাৰ্বজনীন বিপণন ক্ষেত্ৰ দুৰ্গোৎসৱ’।

উল্লেখযোগ্য যে স্থানীয় হিন্দু লোকসকলে মুছলমান সম্প্ৰদায়ৰ লোকসকলক লগত লৈ শাৰদীয় দুৰ্গোৎসৱভাগ অনুষ্ঠিত কৰাৰ লগতে মুছলমান সম্প্ৰদায়ৰ লোকসকলেও সমান উৎসাহেৰে পূজাভাগত সহযোগিতা আগ বঢ়াইছে।

উক্ত পূজাভাগত ওতপ্ৰোতভাৱে জড়িত থকা নাজিমা শইকীয়া নামৰ মুছলমান সম্প্ৰদায়ৰ মহিলা এগৰাকীয়ে  শংকৰ-আজানৰ দেশৰ সম্প্ৰীতিৰ কথা সুঁৱৰি নৰ্থ-ইষ্ট নাওক কয়, “মোক সিদিনা হঠাৎ আয়োজক কমিটীৰ উপদেষ্টা ৰঞ্জিত সূত্ৰধৰ দাদাই আৰু ধনভঁৰালী অঞ্জুমণি বৰুৱাই ফোন কৰি মাতিলে আৰু তেতিয়া মই ক’লো মই পাৰিম জানো? তেতিয়া তেওঁ মোক সহযোগ কৰিবলৈ কোৱাত মোৰ বহুত ভাল লাগিছে। কাৰণ প্ৰথমবাৰৰ বাবে মই এনেদৰে পূজা কমিটিত সহযোগ কৰিছো।”

তেওঁ লগতে কয় যে সকলো জাতি-জনগোষ্ঠী একত্ৰিত হৈ পূজাভাগ অনুষ্ঠিত কৰা বাবে খুবেই আনন্দ লাগিছে।

উল্লেখযোগ্য যে, উক্ত অঞ্চলৰে নাজমা আহমেদে দশমী পূজাৰ সম্পূৰ্ণ খৰচ বহন কৰিছে বুলি উদ্যোক্তামণ্ডলীয়ে জনায়। ইয়াৰোপৰি পাঞ্জাবাৰীৰ জুৰিপাৰৰ বয়োজ্যেষ্ঠ নাগৰিক নুৰুল হকো উক্ত দুৰ্গোৎসৱ সমিতিৰ উপদেষ্টাৰ দায়িত্বত আছে।

আনহাতে, বিপণন ক্ষেত্ৰ সাৰ্বজনীন দুৰ্গোৎসৱ উদযাপন সমিতিৰ উপদেষ্টা ৰনজিৎ সূত্ৰধৰে নৰ্থ-ইষ্ট নাওৰ আগত কয়, “পৃথিৱীৰ সকলো মানুহৰে তেজৰ ৰং ৰঙা বুলি আমি জানো যদিও কথাষাৰ সযতনে পৰিহাৰ কৰাৰ চেষ্টা কৰো। ধৰ্ম হৈছে এটা ব্যক্তিগত বিশ্বাস। হিন্দু ধৰ্ম অতি প্ৰাচীন তথা ই এটা সংস্কৃতি। গতিকে এই সংস্কৃতিয়ে সকলোকো বিশ্বজনীনভাৱে আঁকোৱালি লয়।”

উপৰোক্ত কথাখিনিক সাৰোগত কৰিয়েই এই বছৰ প্ৰথমবাৰৰ বাবে পাঞ্জাবাৰী অঞ্চলৰ মুছলমান লোকসকলক লগত লৈ এই পদক্ষেপ লোৱা বুলি সূত্ৰধৰে আমাক কয়।

উল্লেখযোগ্য যে, হিন্দু, মুছলমান খ্ৰীষ্টান সকলো জাতিকে আগুৱাই আহি শাৰদীয় দুৰ্গোৎসৱত অংশগ্ৰহণ কৰিবৰ বাবে আহ্বান জনোৱা হৈছিল বুলি তেওঁ উল্লেখ কৰি লগতে কয়, “সাহিত্যিক অনুৰাধা শৰ্মা পূজাৰী, ভাস্কৰ্য্যশিল্পী বীৰেন সিংহ. চিত্ৰশিল্পী মধুসূদন দাস, অভিনেতা প্ৰাঞ্জল দাস, অভিনেত্ৰী পূৰ্ণিমা শইকীয়া, চলচ্চিত্ৰ পৰিচালক মঞ্জু বৰুৱাকে ধৰি বহুখিনি বিশিষ্ট ব্যক্তিয়ে সহযোগ কৰিছে।”

উল্লেখযোগ্য যে, বিনা খৰচেৰে তামোলৰ ঢকুৱা, বাঁহ, বেত আৰু আলুৰ বস্তাৰে ভাস্কৰ্য্য শিল্পী বীৰেন সিংহ আৰু চিত্ৰশিল্পী মধুসূদন দাসৰ প্ৰচেষ্টাত ধুবুৰীৰ কৃষকসকলে  পূজাৰ মণ্ডপ তথা বাহিৰতো মূৰ্তি নিৰ্মাণ কৰি উলিয়াইছে বুলি জানিব পৰা গৈছে। লগতে কোনো ধৰণৰ পূজা বাজেট নিৰ্ধাৰণ নকৰি কমিটিৰ সকলোৱে ধন তুলি উক্ত পূজাভাগ অনুষ্ঠিত কৰা হৈছে বুলি উপদেষ্টা ৰনজিৎ সূত্ৰধৰে আমাক জানিবলৈ দিয়ে।

ইয়াৰোপৰি উদ্যোক্তা সমিতিৰ সাধাৰণ সম্পাদিকা কবিতা বৰাই আমাক জানিবলৈ দিয়া মতে যোৱা ৮ অক্তোবৰৰ দিনা মহালয়াৰ লগত সংগতি ৰাখি আয়োজন কৰা শৰতৰ শেৱালি অনুষ্ঠানত হিন্দু মহিলাসকলে জিকিৰ পৰিবেশন কৰাৰ লগতে মুছলমান সম্প্ৰদায়ৰ মহিলাসকলে দেৱীৰ বন্দনা কৰিছে।

আনহাতে, শান্তি-সম্প্ৰীতি বান্ধোনত বান্ধ খাই থকাৰ বাৰ্তা প্ৰেৰণ কৰিব বিচৰা হৈছে বুলি উদ্যোক্তা মণ্ডলীয়ে আমাক জনায়।

https://www.facebook.com/nenowassam/videos/870066346716354/