এক পথ দুৰ্ঘটনাক কেন্দ্ৰ কৰি আজি উত্তপ্ত হৈ পৰে তিনিচুকীয়া জিলাৰ কাকপথাৰৰ মাজেৰে যোৱা ১৫ নং ৰাষ্ট্ৰীয় ঘাইপথ। কাকপথাৰৰ চেলেংগুৰিত এটা মৃতদেহ লৈ একাংশ ৰাইজে ঘাইপথটো অৱৰোধ কৰি ৰাখে।
উল্লেখযোগ্য যে কালি অৰ্থাৎ শুকুৰবাৰে বিয়লি চেলেংগুৰিত দুখন বাইকৰ মুখামুখি সংঘৰ্ষত কাকপথাৰ থানা অন্তৰ্গত ন-মেছাই গাঁৱৰ মজিত মৰাণ (৪০) নামৰ এজন বাইক আৰোহীৰ মৃত্যু হৈছিল।
নিহত মৰাণৰ মৰণোত্তৰ পৰীক্ষা সম্পন্ন কৰি ঘৰলৈ আনি থকা অৱস্থাত দুৰ্ঘটনা সংঘটিত হোৱা স্থানতেই এম্বুলেঞ্চখন ৰখাই আজি বিয়লি ৩ মান বজাৰ পৰা পৰিয়ালৰ লোক আৰু স্থানীয় ৰাইজে পথ অৱৰোধ কৰে।
ৰাইজৰ ক্ষোভ কালি দুৰ্ঘটনা সংঘটিত হোৱাৰ পিছত বাৰম্বাৰ আৰক্ষীক খৱৰ দিয়াৰ পিছতো এঘণ্টা পৰ্যন্ত আৰক্ষী ঘটনাস্থলীলৈ অহা নাছিল। তদুপৰি দুৰ্ঘটনাৰ ২৪ ঘণ্টা উকলি যোৱাৰ পিছতো আৰক্ষীয়ে কোনো তদন্ত হাতত নোলোৱাত ৰাইজ পুনৰ ক্ষোভিতহৈ পৰে, যাৰ ফলত আজি মৃতদেহ লৈ পথ অৱৰোধ কৰিবলৈ বাধ্য হয় বুলি প্ৰকাশ কৰিছে প্ৰতিবাদী লোকসকলে।
প্ৰত্যক্ষদৰ্শীয়ে অভিযোগ কৰা অনুসৰি কাকপথাৰ আৰক্ষীয়ে দায়িত্বত অৱহেলা কৰাৰ বাবেই কালি দুৰ্ঘটনা সংঘটিত কৰা আনখন বাইকসহ চালকজনে তাৰ পলাই যাবলৈ সক্ষম হয়।
আনহাতে, পথ অৱৰোধৰ ফলত অসম আৰু অৰুণাচলৰ শতাধিক গাড়ীৰ লগতে অসম আৰক্ষীৰ শীৰ্ষ বিষয়াৰ কনভয় আৱদ্ধ হৈ পৰাত ডুমডুমাৰ ৰাজহ চক্ৰ বিষয়া তথা দণ্ডাধীশসহ তিনিচুকীয়া জিলা আৰক্ষীৰ শীৰ্ষ বিষয়া ঘটনাস্থলীত উপস্থিত হৈ পৰিস্থিতিৰ বুজলৈ ৰাইজক অৱৰোধ উঠাই ল’বলৈ অনুৰোধ কৰে। উক্ত সময়তে মৰাণ ছাত্ৰ সন্থাৰ সভাপতি অৰুণজ্যোতি মৰাণ ঘটনা স্থলিত উপস্থিত হোৱাত প্ৰশাসনে তেওঁক ৰাজহুৱা ভাবে বক্তব্য ৰাখিবলৈ অনুৰোধ জনাই পৰিস্থিতি নিয়ন্ত্ৰণৰ চেষ্টা কৰে৷
প্ৰতিবাদী লোকসকলে, ‘কাকপথাৰৰ আৰক্ষী বিষয়াক বদলি কৰক’, ‘মৃতকক উচিত ক্ষতি পুৰণ দিয়ক’, ‘পলাতক বাইক আৰোহীক কৰায়ত্ত কৰি বিহিত ব্যৱস্থা গ্ৰহণ কৰক’ আদি দাবী উত্থাপন কৰে। পিছত দণ্ডাধীশ গৰাকীয়ে দাবী সমূহৰ প্ৰতি ব্যৱস্থা গ্ৰহণৰ আশ্বাস দিয়াত ৰাইজে অৱৰোধ সাময়িক ভাৱে প্ৰত্যাহাৰ কৰে।
