নগাঁও জিলাৰ ৰহাত খাদ্যত বিষক্ৰিয়া হৈ এজন শ্ৰমিক নিহত হোৱাৰ লগতে আন তিনিজন গুৰুতৰভাৱে অসুস্থ হৈ পৰা ঘটনাই অঞ্চলটোত চাঞ্চল্যৰ সৃষ্টি কৰিছে।
জানিব পৰা মতে, ৰহাৰ এখন চাহৰ দোকানৰ পৰা অনা চিঙৰা খোৱাৰ পিছতেই চাৰিজনকৈ লোক হঠাৎ অসুস্থ হৈ পৰে। ইয়াৰে আব্দুল মান্নান নামৰ লোকজনৰ অৱস্থা অতি সংকটজনক হৈ পৰাত তেওঁক ততাতৈয়াকৈ নগাঁও ভোগেশ্বৰী ফুকননী অসামৰিক চিকিৎসায়লত ভৰ্তি কৰোৱা হয় যদিও চিকিৎসকে তেওঁক মৃত ঘোষণা কৰে।
অৱশ্যে কোনখন হোটেলত প্ৰস্তুত কৰা চিঙৰা খাই তেওঁলোকৰ এই অৱস্থা হয় সেই সম্পৰ্কে এতিয়ালকৈ জানিব পৰা নাই যদিও খাদ্যত বিষক্ৰিয়া হৈ এই ঘটনাটো সংঘটিত হ’ল বুলি স্থানীয় এক সূত্ৰই জানিবলৈ দিয়ে।
আনহাতে, চিঙৰা খাই অসুস্থ হৈ পৰা ৰফিকুল ইছলাম, হবিবুৰ ৰহমান আৰু ইক্ৰামুল হুছেইনক চিকিৎসাৰ ব্যৱস্থা কৰা হয়। ইয়াৰে হবিবুৰ ৰহমানৰ অৱস্থা গুৰুতৰ বুলি জানিব পৰা গৈছে।
আটাইকেইজন লোকৰ ঘৰ কামপুৰ থানাৰ অন্তৰ্গত জিউমাৰী গাঁৱত। তেওঁলোক ৰহাৰ কোনো লোকৰ ঘৰত নিৰ্মাণ কাৰ্যৰ শ্ৰমিক হিচাপে নিয়োজিত হৈ আছিল।
সচেতন মহলে ঘটনা সন্দৰ্ভত চৰকাৰক তদন্ত কৰি ব্যৱস্থা কৰিবলৈ দাবী জনাইছে। সম্প্ৰতি অসুস্থ হৈ পৰা লোক তিনিজনক উন্নত চিকিৎসাৰ বাবে গুৱাহাটীলৈ প্ৰেৰণ কৰা বুলি জানিব পৰা গৈছে।
