“এয়া অভূতপূৰ্ব, এনেকুৱা সৰ্বাত্মক অসম বন্ধ কেতিয়াও হোৱা নাছিল। বিশেষকৈ গুৱাহাটী মহানগৰীত ব্যাপক ৰূপত বন্ধ পালন হ’ব পাৰে, এই কথা মানুহে কেতিয়াও ভাবিবই পৰা নাছিল।” আজি সংবাদ মাধ্যমলৈ প্ৰেৰণ কৰা এটি ভিডিঅ’ত এই মন্তব্য কৰে কৃষক মুক্তি সংগ্ৰাম সমিতিৰ উপদেষ্টা অখিল গগৈয়ে।
তেওঁ লগতে কয়, “চৰকাৰৰ হিটলাৰী ভাবুকি কামত নাহিল, অসমৰ জনগণে প্ৰমাণ কৰি দিলে যে তেওঁলোকে কেতিয়াও নাগৰিকত্ব সংশোধনী বিধেয়ক মানি নলয়।”
আনহাতে, আজিৰ বন্ধটো ৪৬টা সংগঠনৰ বন্ধ নাছিল বুলি উল্লেখ কৰি তেওঁ লগতে কয়, “এই বন্ধটো গোটেই অসমীয়া জাতিটোৰ ক্ষোভৰ বহিঃপ্ৰকাশ। চৰকাৰৰ বিশ্বাসঘাতকতাৰ বিৰুদ্ধে এই প্ৰতিবাদ। সেয়েহে অসমবাসী ৰাইজে স্ব-প্ৰণোদিতভাৱে বন্ধ পালন কৰিলে।”
লক্ষণীয়ভাৱে গুৱাহাটীৰ মালিগাঁৱৰ বাংলাভাষী লোকসকলেও তথা ফাঁচি বজাৰৰ ব্যৱসায়ীসকলেও ব্যৱসায়িক প্ৰতিষ্ঠান বন্ধ ৰাখি ব্যাপক ৰূপত প্ৰতিবাদলৈ সঁহাৰি দিছে বুলি ভিডিঅ’টোত উল্লেখ কৰে। তেওঁ লগতে উক্ত ব্যৱসায়ী তথা বাংলাভাষী লোকসকলক নাগৰিকত্ব সংশোধনী বিধেয়কৰ বিৰুদ্ধে এই বন্ধ পালন কৰাৰ বাবে ধন্যবাদ জ্ঞাপন কৰে।
ইয়াৰোপৰি তেওঁ কয়, “গৃহিণীসকলে তেওঁলোকৰ মানুহজনক বাহিৰলৈ ওলাই যাব দিয়া নাই, গাড়ী চলাব দিয়া নাই, ড্ৰাইভাৰসকলে গাড়ী চলোৱা নাই, মালিকসকলে গাড়ী বন্ধ ৰাখছে, পে’ট্ৰল পাম্পসমূহ বন্ধ ৰাখিছে। তেওঁলোককো কৃষক মুক্তি সংগ্ৰাম সমিতিৰ তৰফৰ পৰা ধন্যবাদ জ্ঞাপন কৰিছো।”
আনহাতে, অসম চৰকাৰৰ বিভিন্ন বিভাগত কৰ্মবিৰতি পালন কৰা কৰ্মচাৰীসকলক গগৈয়ে উক্ত ভিডিঅ’ৰ জৰিয়তে ধন্যবাদ জ্ঞাপন কৰে।
তদুপৰি জাতিধ্বংসী নাগৰিকত্ব সংশোধনী বিধেয়ক গৃহীত হ’লে হ’ব পৰা ক্ষতিসমূহৰ বিষয়ে উক্ত ভিডিঅ’টোত উল্লেখ কৰি তেওঁ কয় “এই বিধেয়ক গৃহীত হ’লে ১ কোটি ৯০ লাখ হিন্দু বাংলাদেশী লোক অহাৰ দুৱাৰ মুকলি হ’ব। তাৰ ফলত অসমীয়া খিলঞ্জীয়াৰ ৰাজনৈতিক অধিকাৰ নাইকিয়া হ’ব। প্ৰত্যেকটো সমষ্টিত ডেৰ লাখ ডেৰ লাখ হিন্দু বাঙলাদেশী ভোটাৰ হ’ব, তেতিয়া বিধানসভা, লোকসভাৰ সমষ্টিৰ লগতে পঞ্চায়তো অসমৰ অসমীয়াৰ হাতত নাথাকিব।”
তেওঁ লগতে কয়, “বিধেয়কখন গৃহীত হ’লে অসমীয়াৰ হাতত অৰ্থনৈতিক অধিকাৰ নাথাকিব আৰু কৃষ্টি-সংস্কৃতি সকলো নিঃশেষ হৈ যাব।
