বাক্সা জিলাৰ তামুলপুৰ মহকুমাৰ অন্তৰ্গত লাউপাৰা মেধি চুবুৰী গঞা নামঘৰৰ ৫৪ সংখ্যক বাৰ্ষিক মহোৎসৱ ২৪ আৰু ২৫ অক্টোবৰত দুদিনীয়া কাৰ্যসূচীৰে উদযাপন কৰা হয়।
২৪ অক্টোবৰৰ পুৱা ৬ বজাত নামঘৰত শৰাই স্থাপন কৰাৰ পিছত ৭ বজাত পাঠক ভূপেন বৈশ্যৰ তত্বাৱধানত অনুষ্ঠিত হয় প্ৰাতঃ প্ৰসঙ্গ। পুৱা ৮ বজাত নামঘৰ চৌহদত ধৰ্মধ্বজা উত্তোলন কৰে উৎসৱ উদযাপন সমিতিৰ সভাপতি কবিন্দ্ৰ মেধিয়ে। পুৱা ৯ বজাত বৃক্ষ ৰোপণ কৰে সমাজকৰ্মী খেম বাহাদুৰ থাপা আৰু নোমল বড়োই। ৯-৩০ বজাত অনুষ্ঠিত হয় কণ-কণ ল’ৰা-ছোৱালীৰ মাজত খেল-ধেমালি।
বুধবাৰে সন্ধিয়া ৪-৩০ বজাত নামঘৰ চৌহদত বন্তি প্ৰজ্বলন কৰে টেবিতোলা মাজৰ চুবুৰী নামঘৰৰ নামঘৰীয়া নাৰায়ণ বৈশ্য আৰু দক্ষিণ চুবুৰীৰ নাৰায়ণ দাসে। সন্ধিয়া ৫-৩০ বজাত আয়তীসকলৰ দ্বাৰা নাম প্ৰসঙ্গ অনুষ্ঠিত হয়।
২৫ অক্টোবৰ অৰ্থাৎ বৰ্ষ্পতিবাৰে পুৱা ৬ বজাত মেধি চুবুৰী নামঘৰৰ নামঘৰীয়া দীনেশ মেধিয়ে শৰাই স্থাপন কৰাৰ পিছত ৭ বজাত পাঠক ভবেন ৰাজবংশীৰ তত্বাৱধানত প্ৰাতঃ প্ৰসঙ্গ অনুষ্ঠিত হয়।
পুৱা ৯ বজাত কৃষ্ণ দাস, কুমুদ বৈশ্য আৰু শচীন দাসৰ পৰিচালনাত অনুষ্ঠিত হয় ভাগৱত শোভাযাত্ৰা। অঞ্চলটোৰ পাঁচ শতাধিক ধৰ্মপ্ৰাণ পুৰুষ-মহিলা, যুৱক-যুৱতী, কিশোৰ-কিশোৰীয়ে হৰিনাম-কীৰ্তন কৰি শোভাযাত্ৰাত অংশ গ্ৰহণ কৰে আৰু সমগ্ৰ লাউপাৰা অঞ্চলৰ ৰাজপথ পৰিভ্ৰমণ কৰে। শোভাযাত্ৰাত অংশ গ্ৰহণকাৰী ভক্তপ্ৰাণ বাপ-বান্ধৱ, আই-মাতৃ সকলে নাগাৰাৰ তালে তালে হৰিনাম-কীৰ্তন কৰি মুখৰিত কৰি তোলে সমগ্ৰ লাউপাৰা অঞ্চলৰ আকাশ-বতাহ।
দুপৰীয়া ১ বজাত ধৰ্মপ্ৰাণ ব্যক্তি সকলৰ মাজত মহা প্ৰসাদ বিতৰণ কৰা হয়। সন্ধিয়া ৪-৩০ বজাত বন্তি প্ৰজ্বলন আৰু নাম-কীৰ্তনেৰে লাউপাৰা মেধি চুবুৰী গঞা নামঘৰৰ ৫৪ সংখ্যক বাৰ্ষিক মহোৎসৱৰ সামৰণি পৰে।