যোৱা বছৰ গুৱাহাটীত অনুষ্ঠিত হোৱা বিশ্ব যুৱ মহিলা বক্সিং প্ৰতিযোগিতাৰ স্বৰ্ণ বিজয়ী বক্সাৰ অংকুশিতা বড়োৱে মণিপুৰৰ ৰাজধানী চহৰ ইম্ফলত চলি থকা প্ৰথম সংখ্যক নৰ্থ-ইষ্ট অলিম্পিক গেইমছত স্বৰ্ণ জয় কৰি পুনৰবাৰ ৰাজ্যবাসীৰ দৃষ্টি আকৰ্ষণ কৰিবলৈ সক্ষম হৈছে।
ইফালে অংকুশিতা বড়োৰ সফলতাত ঢেকিয়াজুলি সমষ্টিৰ বিজেপি বিধায়ক তথা গুৱাহাটী মহানগৰ উন্নয়ন পৰিষদৰ নৱ নিযুক্ত অধ্যক্ষ অশোক সিংঘালে আজি এক টুইট যোগে বক্সাৰগৰাকীক শুভেচ্ছা প্ৰদান কৰে।
‘শুভকামনা অংকুশিতা বড়ো। তোমাৰ সফলতাত ঢেকিয়াজুলি গৰ্বিত। যোৱা বৰ্ষৰ নৱেম্বৰত বিশ্ব যুৱ মহিলা বক্সিং প্ৰতিযোগিতাতো অংকুশিতাই স্বৰ্ণ জয় কৰিছিল’। এইদৰে টুইট কৰা দেখা যায় বিধায়কগৰাকীক।
প্ৰধান মন্ত্ৰী নৰেন্দ্ৰ মোদীয়ে আৰম্ভ কৰা অভিলাসী আঁচনি ‘বেটী বচাও, বেটী পঢ়াও’ৰ ব্ৰেণ্ড এম্বেছাদৰ হিচাপেও নিয়োজিত হৈ আছে অসমৰ যুৱ বক্সাৰ অংকুশিতা বড়ো। কামৰূপ মহানগৰ জিলাৰ বাবে বক্সাৰগৰাকীক নিযুক্তি দিছিল মুখ্য মন্ত্ৰী সৰ্বানন্দ সোণোৱালে।
উল্লেখ্য যে যোৱা বৰ্ষৰ নৱেম্বৰ মাহত গুৱাহাটীত অনুষ্ঠিত হোৱা বিশ্ব যুৱ মহিলা বক্সিং প্ৰতিযোগিতাৰ ৬৪ কেজি শাখাত অংকুশিতাই স্বৰ্ণ জয় কৰি ইতিহাস সৃষ্টি কৰাৰ লগতে সকলোৰে মন জয় কৰিবলৈ সক্ষম হৈছিল।
ইফালে প্ৰথমবাৰলৈ অনুষ্ঠিত হোৱা নৰ্থ-ইষ্ট অলিম্পিক গেইমছত এই পৰ্যন্ত ঘৰুৱা দল মণিপুৰে ৫৪টা সোণ, ৩৪টা ৰূপ আৰু ২০টা ব্ৰঞ্জৰ পদকেৰে মেডেল তালিকাৰ শীৰ্ষত আছে। আনহাতে ২৯টা সোণ, ৩৪টা ৰূপ আৰু ৩০টা ব্ৰঞ্জৰ পদকেৰে মেডেল তালিকাৰ দ্বিতীয় স্থানত আছে অসম।
Boxing sensation of Assam Ankushita Boro strikes gold in first NE Olympic Games in Imphal. Congratulation #ankusitaboro. People of #dhekiajuli are feeling proud. In Nov 2017 she won gold at the AIBA World Youth Women’s Boxing Championship. pic.twitter.com/KOZOmFzDGx
— Ashok Singhal (@TheAshokSinghal) October 28, 2018
