বিজেপি উত্থাপিত নাগৰিকত্ব বিধেয়কক লৈ ‘পৃথক বৰাক’ৰ দাবী তোলা বিজেপি নেতা প্ৰদীপ দত্ত ৰয়ে এইবাৰ ইয়াক ‘দাবী’ নহয় ‘ভাবুকি’ বুলি নৰ্থ ইষ্ট নাও-ত স্পষ্টীকৰণ দিছে।
“মই অসমৰ পৰা বৰাক উপত্যকাক পৃথক কৰিবলৈ মঙলবাৰে সংবাদমেল পাতি দাবী কৰা নাই; তাৰ পৰিৱৰ্তে ই এটা ভাবুকিহে,” নৰ্থ ইষ্ট নাও-ক জনালে বৰাকৰ বিজেপি নেতাজনে।
তেওঁৰ এই ‘বিবৃতি’ সোণোৱাল চৰকাৰকো জনাইছে বুলি মন্তব্য কৰিছে সদৌ কাছাৰ কৰিমগঞ্জ হাইলাকান্দি ছাত্ৰ সন্থাৰ (ACKHSA) প্ৰতিষ্ঠাপক সভাপতিজনে।
“মই চৰকাৰকো এই বিবৃতি দাখিল কৰিছো। মই নিজৰ কাৰণেই এই কথা কোৱা নাই যে বৰাক উপত্যকাক পৃথক কৰিব লাগে। কেৱল হিন্দু বাঙালীৰ প্ৰতি ঘৃণা আৰু বিদ্বেষে মোক এই কথা ক’বলৈ বাধ্য কৰিছে,” দত্ত ৰয়ৰ মন্তব্য।
তেওঁ লগতে কয় যে অসমত থকাৰ কাৰণেই যদি বাঙালীসকলে ভাবুকিৰ সন্মুখীন হ’ব লগা হয়, তেন্তে বৰাক উপত্যকা পৃথক হোৱাই যুগুত।
আনহাতে আলফা তথা খিলঞ্জীয়া মঞ্চৰ নেতা মৃণাল হাজৰিকাই তেওঁক ‘দালাল’ বোলাৰ প্ৰত্যুত্তৰৰূপে দত্ত ৰয়ে হাজৰিকাকহে ‘বাংলাদেশৰ দালাল’ৰূপে অভিহিত কৰিছে।
কংগ্ৰেছ ত্যাগ কৰি বিজেপিত যোগ দিয়া এই নেতাজন বৰ্তমান দলটোৰ কোনো পদবীত নথকা সত্ত্বেও বৰাকত অত্যন্ত প্ৰভাৱশালী। যোৱা ২৪ জুলাইত খোদ মুখ্য মন্ত্ৰী সৰ্বানন্দ সোণোৱাল দত্ত ৰয়ৰ সৈতে শিলচৰৰ আৱৰ্ত ভৱনত এক বৈঠকত মিলিত হৈছিল আৰু তেওঁক ‘পৃথক বৰাক’ৰ দাবী পৰিহাৰ কৰা বাবে অনুৰোধ জনাইছিল।
এন আৰ চিৰ চূড়ান্ত খচৰা প্ৰকাশৰ দুদিন পূৰ্বে যোৱা ২৮ জুলাইত দত্ত ৰয় আৰু শিলচৰৰ অসম বিশ্ববিদ্যালয়ৰ প্ৰাক্তন উপাচাৰ্য্য তপোধীৰ ভট্টাচাৰ্য্যক গুৱাহাটীত এক বৈঠকৰ বাবে আমন্ত্ৰণ কৰিছিল কেন্দ্ৰীয় গৃহ সচিব ৰাজীৱ গাউবাই। পিছে প্ৰকাশিত খবৰ অনুসৰি অজ্ঞাত কাৰণত বৈঠকখন হোৱা ‘নাছিল’।
