বুধবাৰৰ পৰা ৰাজ্যৰ ১৭খন জিলাত আৰম্ভ হোৱা দ্বিতীয় পৰ্যায়ৰ গুণোৎসৱ উপলক্ষে বৃহস্পতিবাৰে কলিয়াবৰৰ বিভিন্ন বিদ্যালয়ত ৰাজ্য চৰকাৰৰ মন্ত্ৰী কেশৱ মহন্ত উপস্থিত হৈ ছাত্ৰ-ছাত্ৰীসকলৰ লগত মত বিনিময় কৰে।
শিক্ষকৰ ৰূপত অৱতীৰ্ণ হৈ ছাত্ৰ-ছাত্ৰীৰ শিক্ষাৰ মানদণ্ড পৰীক্ষা কৰাৰ লগতে শিক্ষক-শিক্ষয়িত্ৰী সকলৰ সৈতেও বিভিন্ন বিষয়ত আলোচনা কৰা দেখা যায়।
কলিয়াবৰ প্ৰাথমিক শিক্ষাখণ্ডৰ অধীনৰ পশ্চিম কলিয়াবৰ মজলীয়া বিদ্যালয়, শিলঘাট বালিকা প্ৰাথমিক বিদ্যালয়, জখলাবন্ধা উচ্চতৰ মাধ্যমিক বিদ্যালয়ত উপস্থিত হৈ ছাত্ৰ-ছাত্ৰীৰে পাঠ্যক্ৰম সম্পৰ্কত মত বিনিময় কৰা দেখা যায় মন্ত্ৰী মহন্তক।
বিদ্যালয়ৰ শ্ৰেণীকোঠাত প্ৰৱেশ কৰি ছাত্ৰ-ছাত্ৰীৰ পাঠদানৰ পৰীক্ষা লৈ মন্ত্ৰীগৰাকীয়ে। আনহাতে গুণোৎসৱ উপলক্ষে বিদ্যালয় কেইখনত উপস্থিত থকা ছাত্ৰ-ছাত্ৰীৰ অভিভাৱক সকলৰ লগতো মত বিনিময় কৰি ছাত্ৰ-ছাত্ৰীৰ ভৱিষ্যত সম্পৰ্কে বহুতো গুৰুত্বপূৰ্ণ বিষয় সন্দৰ্ভত আলোচনা কৰে।
আনহাতে সংবাদ মাধ্যমৰ সৈতে হোৱা কথোপকথনত মন্ত্ৰী মহন্তই কয় যে এই গুণোৎসৱে বিদ্যালয় সমূহৰ লগতে ছাত্ৰ-ছাত্ৰীৰ শিক্ষাৰ মানদণ্ডৰ ফল নিৰূপণত যথেষ্ট সহায় কৰিব।
