মোক যদি গ্ৰেপ্তাৰ কৰে তাৰ কি বাৰ্তা খিলঞ্জীয়া মানুহলৈ যাব পাৰে, সেইটো প্ৰশাসনে জানে : মৃণাল হাজৰিকা

কালিৰ তিনিচুকীয়াৰ খেৰবাৰীৰ হত্যাকাণ্ডই সমগ্ৰ অসমজুৰি উত্তেজনাময় পৰিৱেশ সৃষ্টি কৰি থকাৰ সময়তে আজি পাণ বজাৰ আৰক্ষীয়ে আলোচনাপন্থী আলফা মৃণাল হাজৰিকাক গ্ৰেপ্তাৰ কৰিছে।

উল্লেখযোগ্য যে কিছুদিন পূৰ্বে আলফা নেতাজনে ৰাজহুৱাভাৱে উচটনিমূলক মন্তব্য আগ বঢ়োৱা বাবে থানাখনত আৰক্ষীয়ে নিজাববীয়াকৈ এটা গোচৰ ৰুজু কৰিছিল। এই সন্দৰ্ভত নেতাজনক পূৰ্বেও পাণবজাৰ থানাই সোধা-পোছাৰ বাবে মাতি নিছিল।

আজি নেতাজনক পাণবজাৰ আৰক্ষীয়ে পুনৰ সোধা-পোছাৰ বাবে মাতি নিয়ে আৰু কিছু সময়ৰ পূৰ্বে গ্ৰেপ্তাৰ কৰে।

জানিব পৰামতে, উচটনিমূলক মন্তব্যৰ অভিযোগত আলফা নেতাজনৰ বিৰুদ্ধে কোকৰাঝাৰৰ গোসাঁইগাঁও থানাত এটা গোচৰ ৰুজু হৈছিল। উক্ত 443/18নং গোচৰটো গীতানগৰ থানালৈ হস্তান্তৰ কৰা হৈছিল। তাৰ ভিত্তিতে আলফা নেতাজনক গ্ৰেপ্তাৰ কৰা হৈছে।

মন কৰিব লগীয়া যে আলফা নেতাজনক গ্ৰেপ্তাৰ কৰা-নকৰা সন্দৰ্ভত তেওঁক আৰক্ষীয়ে গাড়ীত তোলালৈকে নিশ্চিত কৰা নাছিল আৰক্ষীয়ে। তেওঁৰ বিৰুদ্ধে থকা অভিযোগ সন্দৰ্ভত সাংবাদিকৰ প্ৰশ্নত নেতাজনে কয়, “উচটনিমূলক মন্তব্য কোনে কৰি আছে অসমৰ ৰাইজে জানে।”

ইফালে গ্ৰেপ্তাৰ কৰা-নকৰা সন্দৰ্ভত সাংবাদিকৰ আগত আলফা নেতাজনে তাৎপৰ্য্যপূৰ্ম ইংগিত দি কয়, “মোক যদি গ্ৰেপ্তাৰ কৰে তাৰ কি বাৰ্তা খিলঞ্জীয়া মানুহলৈ যাব পাৰে, সেইটো প্ৰশাসনে জানে।”

আনহাতে পাণবজাৰ আৰক্ষীয়ে নেতাজনক আদালতত হাজিৰ কৰাবলৈ নিয়াৰ পথত বাধা দিয়ে খিলঞ্জীয়া মঞ্চ, অসম আৰু জাতীয় সেনাৰ কৰ্মীয়ে। আৰক্ষীৰ গাড়ীৰ আগত শুই পৰি বাধা দিয়াৰ চেষ্টা কৰৰ লগতে সমৰ্থকসকলে মৃণাল হাজৰিকাক বিনাচৰ্তে মুক্তি দিয়ক, মৃণাল হাজৰিকা জিন্দাবাদ আদি ধ্বনি দিয়ে।

লগতে তেওঁলোকে শিলাদিত্যক কিয় গ্ৰেপ্তাৰ কৰিব পৰা নাই বুলি প্ৰশ্ন তোলে। “মৃণাল হাজৰিকাক গ্ৰেপ্তাৰ কৰা চৰকাৰে উচটনিমূলক মন্তব্য দিয়া শিলাদিত্য দেবক গ্ৰেপ্তাৰ কৰিব পৰা নাই। যিজন বাঙালী নেতাই ‘অসমীয়াক ঘৰে ঘৰে গৈ মাৰিম’ বুলি ভাবুকি দিছিল, সেইজনক গ্ৰেপ্তাৰ কৰিব পৰা নাই কি?” এইদৰে প্ৰশ্ন কৰে এজন সমৰ্থকে। সমৰ্থকসকলে ‘সৰ্বানন্দ সোণোৱালক জাতীয় খলনায়ক উপাধি দিছো’ বুলি কৈ গৃহ বিভাগৰ দায়িত্বৰ পৰা পদত্যাগ কৰিবলৈ দাবী জনায়।

ইফালে আৰক্ষীয়ে ‘মৃণাল হাজৰিকাক গ্ৰেপ্তাৰ কৰা নাই’ বুলি তেওঁলোকক বিপথে পৰিচালিত কৰা বুলি কয়। “অন্যথা ইয়াত প্ৰতিবাদ কৰিবলৈ হাজাৰ হাজাৰ মানুহ গোট খালেহেঁতেন। আমাক এক গোট হ’ব নোৱৰাকৈ বিপথে পৰিচালিত কৰি থাকিল”, এজন সমৰ্থকে কয়।

নাগৰিকত্ব সংশোধনী বিধেয়কখনৰ প্ৰসংগ টানি আনি কয়, “অসমীয়া মানুহৰ তেজে তেজে, সিৰে সিৰে আজি প্ৰতিবাদে গা কৰি উঠিছে। অসমীয়া মানুহ শান্ত হৈ নাথাকে।”

“আমি গণতান্ত্ৰিক প্ৰতিবাদ কৰিম, আমাক যদি জ্বলাই মাৰে মাৰক, গুলীয়াই মাৰে মাৰক। কিন্তু আমি প্ৰতিবাদ কৰিম।” এইদৰে কয় এজন সমৰ্থকে।

মৃণাল হাজৰিকাক আৰক্ষীৰ জিম্মাত নিদিলে আদালতে; ন্যায়িক জিম্মালৈ প্ৰেৰণ

শেহতীয়া বাতৰিমতে মৃণাল হাজৰিকাক ন্যায়িক জিম্মালৈ প্ৰেৰণ কৰিছে আদালতে। পাণবজাৰ আৰক্ষীয়ে ৫ দিনৰ জিম্মাত বিচাৰিছিল হাজৰিকাক। কিন্তু আদলতে আলফা নেতাজনক আৰক্ষীৰ জিম্মাত দিবলৈ অস্বীকাৰ কৰে।

উচতনিমূলক মন্তব্যৰ অভিযোগত আলফা নেতাজনৰ বিৰুদ্ধে গোসাঁইগাঁৱত ৰুজু হৈছিল গোচৰ। আৰক্ষীয়ে গীতানগৰ থানালৈ হস্তান্তৰ কৰে উক্ত গোচৰটো। 443/18নং গোচৰৰ ভিত্তিত আৰক্ষীয়ে গ্ৰেপ্তাৰ কৰিছিল আলফা নেতাজনক।‍

ডিগবৈৰ সংবাদ দাতাৰ সংযোজন :

জিতেন দত্তক বিনাচৰ্তে মুক্তি দিয়াৰ দাবীত ডিগবৈত ৩৮নং ৰাষ্ট্ৰীয় ঘাইপথ অৱৰোধ

ইপিনে আজি গুৱাহাটীৰ পৰা গৈ থকা অৱস্থাত গৌৰীসাগৰত আলফাৰ আলোচনাপন্থী নেতা জিতেন দত্তক আৰক্ষীয়ে আটক কৰাৰ পিছতে নেতাজনক বিনাচৰ্তে মুক্তি দিয়াৰ দাবীত ডিগবৈত প্ৰতিবাদ সাব্যস্ত কৰে কেইবাটাও সংগঠনে।

২২টা সংগঠনে ৩৮নং ৰাষ্ট্ৰীয় ঘাইপথ অৱৰোধ কৰি জিতেন দত্তক মুকলি কৰি দিয়াৰ দাবী জনায়। লগতে উচটনিমূলক মন্তব্য দিয়াৰ অভিযোগত বিধায়ক শিলাদিত্য দেৱক গ্ৰেপ্তাৰৰো দাবী কৰে প্ৰতিবাদকাৰীসকলে।