চি বি আয়ে অৱশেষত জেৰা কৰিলে লুই বাৰ্জাৰ কেলেংকাৰিৰ এজন প্ৰধান অভিযুক্ত মন্ত্ৰী হিমন্ত বিশ্ব শৰ্মাক। কুখ্যাত কেলেংকাৰিটোৰ তদন্ত কৰি থকা কেন্দ্ৰীয় অনুসন্ধান সংস্থাটোৱে ইতিপূৰ্বে প্ৰায়বোৰ অভিযুক্তক জেৰা কৰিছিল যদিও মন্ত্ৰীজনক জেৰা নকৰাত প্ৰতিক্ৰিয়াৰ সৃষ্টি হৈছিল।
কিন্তু যোৱা ১ আৰু ২ নৱেম্বৰত নতুন দিল্লীত সংস্থাটোৱে অসমৰ প্ৰভাৱশালী মন্ত্ৰীজনক জেৰা কৰে বুলি জানিব পৰা গৈছে।
যোৱা ছেপ্তেম্বৰ মাহৰ শেষৰ ফালে অসমলৈ আহি এক সপ্তাহ ধৰি বাহৰ পাতি বহুকেইজন অভিযুক্ত আৰু সেই সময়ৰ দায়িত্বশীল বিষয়াক জেৰা কৰিছিল সংস্থাটোৱে। কিন্তু সাৰি গৈছিল মন্ত্ৰী হিমন্ত, যাক লৈ বিভিন্ন মহলত প্ৰতিক্ৰিয়াৰ সৃষ্টি হৈছিল।
উল্লেখযোগ্য যে বিজেপি দলে যোৱা বিধানসভা নিৰ্বাচনৰ পূৰ্বে কংগ্ৰেছ দলৰ দিনত সংঘটিত বৃহৎ কেলেংকাৰি আৰু দুৰ্নীতিগ্ৰস্ত মন্ত্ৰী-বিধায়কৰ তালিকাত হিমন্তৰ নাম শীৰ্ষত স্থান দিছিল। আনহাতে ‘Saga of Scams in Congress-Ruled Stated’নামৰ পুস্তিকা প্ৰকাশ কৰি হিমন্ত বিশ্ব শৰ্মাক লুই বাৰ্জাৰ কেলেংকাৰিৰ মূল অভিযুক্ত বুলি অভিহিত কৰি এই কেলেংকাৰিৰ চি বি আইৰ দাবী জনাইছিল। কিন্তু তাৰ পিছতে হিমন্ত বিজেপিত যোগদান কৰে আৰু বিজেপিৰ চৰকাৰতো প্ৰভাৱশালী মন্ত্ৰী হৈ পৰে।
চি বি আয়ে মন্ত্ৰীজনক জেৰা নকৰা প্ৰসংগত কেলেংকাৰিটোৰ তদন্তৰ বাবে আইনী যুঁজ দি থকা স্বৰাজ অসমৰ নেতা ভৱেন সন্দিকৈয়ে অভিযোগ কৰি আহিছিল যে মোদী আৰু অমিত শ্বাহৰ সৈতে সুসম্পৰ্ক থকা বাবেই মন্ত্ৰীজন তদন্তৰ আওতাৰ পৰা বাহিৰত থাকিবলৈ সক্ষম হৈছে।
অৱশেষত শেহতীয়াকৈ হ’লেও যোৱা ১ আৰু ২ নৱেম্বৰত তদন্তকাৰী সংস্থাটোৱে প্ৰভাৱশালী মন্ত্ৰীজনক কেলেংকাৰিটোৰ গোচৰত জেৰা কৰাক আদৰণি জনাইছে ভৱেন সন্দিকৈয়ে।
