বিজেপিৰ দিনত ৰাস্তা-ঘাটৰ উন্নতি হৈছে বুলি সততে কোৱা হয় যদিও প্ৰকৃততে কিমানখিনি উন্নতি হৈছে। যিবোৰ পথ নিৰ্মাণ বা মেৰামতি হৈছে সেইবোৰৰ মানক লৈ সততে প্ৰশ্ন উত্থাপন কৰি আহিছে স্থানীয় ৰাইজে। এইবোৰত ব্যাপক অনিয়ম হোৱা বুলি অভিযোগ উত্থাপিত হৈ আহিছে।
শেহতীয়াকৈ গোৱালপাৰা জিলাৰ কৃষ্ণাইতো পথ মেৰামতিৰ কামত অনিয়ম সংঘটিত হোৱাৰ অভিযোগ আনিছে স্থানীয় লোকে৷ কৃষ্ণাইৰ ৩৭নং ৰাষ্ট্ৰীয় পথৰ পৰা কৰ্মকাৰ পাৰা হৈ হাব্ৰাঘাট মহাবিদ্যালয়লৈ যোৱা পথছোৱাৰ মেৰামতিৰ নামত সংঘটিত হৈছে এই অনিয়ম৷
স্থানীয় লোকে জনোৱামতে, বিগত কেইবাদিনৰ পৰা গড়কাপ্তানী বিভাগৰ অধীনত জৈনক ৰাভা উপাধিৰ এজন ঠিকাদাৰ এই পথছোৱা মেৰামতিৰ কাম কৰি আছে।
পৰিতাপৰ বিষয় যে পথটো মেৰামতিৰ পিছতে চকলা-চকলে এৰি গৈছে ইয়াৰ ওপৰৰ অংশ। পকী কৰি মেৰামতি কৰাৰ তিনিদিন পিছতে এইদৰে পথছোৱা বখলি খাই যোৱা ঘটনাই অঞ্চলবাসীক আচৰিত কৰি তুলিছে৷
স্থানীয় ৰাইজৰ অভেযোগ ঠিকাদাৰে অতি নিম্নমানৰ সামগ্ৰীৰে মেৰামতি কৰিছে পথ আৰু সেইবাবে এনেদৰে খহি গৈছে৷
স্থানীয় লোকে অভিযোগ কৰে যে কেৱল গাড়ীৰ চকাতে নহয় ছেণ্ডেল আৰু জোতাৰ খোজতো এৰিছে পথৰ ওপৰৰ তৰপ৷ আনহাতে ৰাইজে পথ নিৰ্মাণৰ দায়িত্ব থকা লোকসকলক পথ মেৰামতিৰ বিসংগতি হোৱা বুলি অভিযোগ কৰাত ওলোটাই ৰাইজৰ ওপৰত আৰক্ষী থানাত এজাহাৰ দিয়ে৷ ঘটনাটোৱে এতিয়া সমগ্ৰ অঞ্চলজুৰি প্ৰতিক্ৰিয়াৰ সৃষ্টি কৰিছে।
ঠিকাদাৰ-চৰকাৰী বিষয়া মিলি চৰকাৰী ধনৰ এইদৰে অপচয় কৰা কাৰ্যক আশুডুবিৰ ৰাইজে তীব্ৰ প্ৰতিবাদ কৰে আৰু গড়কাপ্তানী বিভাগক এই মেৰামতিৰ কামত তদন্ত মৰ্মে ব্যৱস্থা ল’বলৈ দাবী জনাইছে৷
