দীপাৱলীৰ আনন্দ উৎসাহৰ মাজতে মঙলবাৰে নিশা গুৱাহাটীৰ কাহিলীপাৰাত সংঘটিত হয় এক বিধ্বংসী অগ্নিকাণ্ড। অগ্নিকাণ্ডটো সংঘটিত হয় চতুৰ্থ আৰক্ষী বেটেলিয়নৰ চৌহদৰ ছুইপাৰ কলনিত। লগে লগে জুইৰ লেলিহান শিখাই আৱৰি ধৰাত আৱাসিক এলেকাটোত এক হাহকাৰময় পৰিৱেশৰ সৃষ্টি হয়।
জানিব পৰা মতে অগ্নিকাণ্ডৰ সময়তে কেইবাটাও চিলিণ্ডাৰ বিস্ফোৰিত হয় আৰু জুই দপদপাই জ্বলি উঠে যাৰ ফলত আৱাসিক এলেকাটোৰ প্ৰায় ৪০টাৰো অধিক ঘৰ জুইত জাহ যায়।
অগ্নিকাণ্ড সংঘটিত হোৱাৰ কিছু সময় পাছতে অগ্নিনিৰ্বাপক বাহিনীৰ কেইবাখনো গাড়ী ঘটনাস্থলীত উপস্থিত হৈ জুই নিৰ্বাপনৰ চেষ্টা চলোৱা পৰলিক্ষিত হয়। ইফালে অগ্নিনিৰ্বাপকৰ এখন গাড়ী পথতে বিকল হৈ পৰাত ঘটনাস্থলত অলপ পলমকৈ উপস্থিত হ’বলগীয়া হোৱাত কেইবাখনো চাৰিচকীয়া আৰু দুচকীয়া বাহন ভস্মীভূত হয়।
আনহাতে, এই বিধ্বংসী অগ্নিকাণ্ডটোৰ ফলত আৱাস এলেকাটোৰে তিনিজনকৈ লোক গুৰুতৰভাৱে আহত হোৱা বুলি জানিব পৰা গৈছে। ইয়াৰে এজনৰ অৱস্থা সংকটজনক হোৱাত জি এম চি এইচলৈ প্ৰেৰণ কৰে।
উল্লেখযোগ্য যে অগ্নিনিৰ্বাপক বাহিনীৰ গাড়ীয়ে প্ৰায় এঘণ্টাৰো অধিক সময় ধৰি জুই নিয়ন্ত্ৰণ কৰিবলৈ ব্যৰ্থ হোৱাত অঞ্চলবাসীৰ মাজত অলপ অসন্তুষ্টিয়ে দেখা দিছিল। অগ্নিকাণ্ডত কেইবাটাও পৰিয়ালৰ গুৰুত্বপূৰ্ণ নথি-পত্ৰ, সা-সামগ্ৰী আৰু অলংকাৰ সম্পূৰ্ণৰূপে নষ্ট হয়।
মন কৰিবলগীয়া যে কালী পূজাৰ দিনটোতেই এইদৰে সংঘটিত হোৱা বিধ্বংসী অগ্নিকাণ্ডৰ ঘটনাই সমগ্ৰ মহানগৰতে চাঞ্চল্যৰ সৃষ্টি কৰিছে। ব্যাপক হাৰত ফটকা ফুটোৱাৰ ফলতেই অগ্নিকাণ্ডটোৰ সূত্ৰপাত হয় বুলি স্থানীয় ৰাইজৰ মাজত এক প্ৰশ্নৰ উদ্ৰেগ ঘটিছে যদিও তদন্তত হে ওলাই পৰিব অগ্নিকাণ্ডৰ প্ৰকৃত কাৰণ।
