আগন্তুক পঞ্চায়ত নিৰ্বাচন সুচাৰুৰূপে পৰিচালনা কৰিবলৈ নগাঁও জিলা প্ৰশাসনে প্ৰস্তুতি প্ৰায় সম্পূৰ্ণ কৰি তুলিছে। আজি নগাঁও জিলা প্ৰশাসনে উপায়ুক্তৰ কাৰ্যালয়ৰ সভাকক্ষত বিভিন্ন দল-সংগঠনৰ প্ৰতিনিধিৰ সৈতে এক আলোচনাত মিলিত হৈ পঞ্চায়ত নিৰ্বাচনৰ নীতি-নিদেৰ্শনা সম্পৰ্কে তেওঁলোকক অৱগত কৰে।
ইয়াৰ পিছতে নগাঁও জিলাৰ উপায়ুক্ত বিশ্বজিৎ পেগুকে ধৰি জিলা প্ৰশাসনে এক সংবাদমেল আয়োজন কৰি নগাঁৱত পঞ্চায়ত নিৰ্বাচনৰ প্ৰস্তুতি সম্পৰ্কে অবগত কৰে। নগাঁৱত প্ৰথম পৰ্যায়ত অৰ্থাৎ ৫ ডিচেম্বৰত ভোট গ্ৰহণ হ’ব।
নগাঁও সদৰ মহকুমাত ২৩ টা জিলা পৰিষদৰ সদস্যৰ পদ, ১৩৯ টা আঞ্চলিক পঞ্চায়তৰ সদস্যৰ পদ, ১০ টা আঞ্চলিক পঞ্চায়তৰ সভাপতি পদ, ১০ টা আঞ্চলিক পঞ্চায়তৰ উপ সভাপতি পদ, ১৪৩ টা গাঁও পঞ্চায়তৰ সভাপতি পদ, ১৪৩ টা গাঁও পঞ্চায়তৰ উপ সভাপতি পদ আৰু ১৪৩০ টা গাঁও পঞ্চায়তৰ সদস্য পদৰ বাবে নিৰ্বাচন অনুষ্ঠিত হ’ব বুলি তেওঁ সদৰী কৰে।
আনহাতে কলিয়াবৰ মহকুমাত ৬ টা জিলা পৰিষদৰ সদস্য, ২৯ টা আঞ্চলিক পঞ্চায়ত সদস্য, ৩ টা আঞ্চলিক পঞ্চায়তৰ সভাপতি আৰু উপ-সভাপতি পদত, ২৯ টা গাঁও পঞ্চায়তৰ সভাপতি আৰু উপ সভাপতি পদত আৰু ২৯০ টা গাঁও পঞ্চায়তৰ সদস্য পদত নিৰ্বাচন অনুষ্ঠিত হ’ব।
জিলাখনত সৰ্বমুঠ ভোটাৰৰ সংখ্যা হ’ল ৯,৪৫,৮৭০ গৰাকী, ইয়াৰে ৪,৮৫,৬০৪ গৰাকী পুৰুষ আৰু ৪,৬০,২৬৬ গৰাকী মহিলা ভোটাৰ।
জিলা উপায়ুক্তজনে জনোৱা মতে নগাঁও জিলাত মুঠ ১৮১১ টা ভোটকেন্দ্ৰৰ ভিতৰত ৯৫৮ টা স্পৰ্শকাতৰ আৰু ২২৬ টা অতি স্পৰ্শকাতৰ ভোটকেন্দ্ৰ আছে।
