যোৰহাট চিকিৎসা মহাবিদ্যালয়ত যোৱা ১ নৱেম্বৰৰ পৰা প্ৰায় ২০টি নৱজাতকৰ মৃত্যুৱে চিকিৎসালয়খনৰ লগতে সমগ্ৰ স্বাস্থ্য বিভাগটোৰ অৱস্থা সন্দৰ্ভত প্ৰশ্নবোধকৰ সৃষ্টি কৰাৰ পিছত ঘটনাটোৰ তদন্তৰ বাবে গুৱাহাটীৰ পৰা তিনিজনীয়া বিশেষজ্ঞৰ দল এটা যোৰহাটত উপস্থিত হৈছেগৈ।
অসম চৰকাৰৰ চিকিৎসা শিক্ষা সঞ্চালকৰ নেতৃত্বত যোৱা এই দলটো য়ুনেস্ক’ৰ এজন বিষয়ববীয়া আৰু গুৱাহাটী চিকিৎসা মহাবিদ্যালয়ৰ শিশু চিকিৎসা বিশেষজ্ঞৰে গঠিত।
উল্লেখযোগ্য যে যোৱা ১ নৱেম্বৰৰ পৰা ৭ নৱেম্বৰৰ ভিতৰত চিকিৎসালয়খনত ১৫টিকৈ কেঁচুৱাৰ মৃত্যু হৈছিল। কেৱল ৬ নৱেম্বৰৰ দিনটোতে ৬টিকৈ শিশুৰ মৃত্যু হোৱা বুলি জানিব পৰা গৈছে। ইপিনে কালিও দুটি শিশুৰ মৃত্যু হোৱা বুলি এটা সূত্ৰই জানিবলৈ দিছে।
মন কৰিব লগীয়া যে ৰাইজ আৰু দল-সংগঠনৰ হেঁচাত চিকিৎসালয়খনে নিজা ববীয়াকৈ এখন তদন্ত কমিটী গঠন কৰি শিশুৰ অস্বাভাৱিক হাৰৰ মৃত্যুৰ ঘটনা তদন্ত কৰাইছিল। চিকিৎসালয়খনৰে শিশুৰোগ বিভাগৰ মুৰব্বী ডাঃ প্ৰনৱজিৎ বিশ্বনাথৰ নেতৃত্বৰ ৬জনীয়া সদস্যৰে গঠিত কমিটীখনে খৰখেদাকৈ কালিয়েই প্ৰতিবেদন দিয়ে। কমিটীখনে ঘটনাটোৰ দায়সৰা প্ৰতিবেদনেৰে চিকিৎসালয় কৰ্তৃপক্ষ আৰু চিকিৎসক-নাৰ্ছৰ কোনো ভুল বা অৱহেলাৰ কথা উল্লেখ নকৰিলে। বৰং আটাইকেইটা ঘটনাত প্ৰসূতিসকলক পলমকৈ ভৰ্তি কৰোৱাটোক এটা কাৰণ হিচাপে দেখুওৱা হৈছে। আনটো কাৰণ উল্লেখ কৰা হৈছে শিশুৰ বিশেষ যতন গৃহৰ ঠাই আৰু সা-সৰঞ্জামৰ নাটনিক।
এই প্ৰতিবেদনৰ বিপৰীতে ভুক্তভোগী অভিভাৱক তথা মৃত শিশুকেইটিৰ মাক-দেউতাকে চিকিৎসালয়খনৰ বিৰুদ্ধে গুৰুতৰ অৱহেলা আৰু দায়িত্বহীনতাৰ অভিযোগ কৰিছে সংবাদ মাধ্যমৰ আগত। সময়ত চিকিৎসক-নাৰ্ছ নথকাত প্ৰসূতিগৃহৰ ভিতৰত অৱহেলিত প্ৰসূতি ছটফটাই থকাৰ কথাও অভিযোগত কোৱা হৈছে।
ইপিনে আছু, বীৰ লাচিত সেনা অসমকে ধৰি বিভিন্নটা দল-সংগঠনে এই ঘটনাৰ সঠিক তদন্ত কৰোৱাৰ দাবী জনাইছে।
