ৰাজ্যৰ ক্ৰীড়াক্ষেত্ৰখনৰ লগতে ক্ৰীড়াপ্ৰেমীসকলৰ বাবে আন এক সুখবৰ। অহা ২৯ ডিচেম্বৰৰ পৰা কলকাতাৰ নেতাজী ইনড’ৰ ষ্টেডিয়ামত অনুষ্ঠিত হ’ব লগা ‘কাৰাটে ৱৰ্ল্ড কাপ’ত নগাঁও জিলাৰ কলিয়াবৰৰ ১৭ গৰাকীকৈ খেলুৱৈয়ে অংশগ্ৰহণ কৰিবলৈ সাজু হৈছে।
স্প’ৰ্টছ কাৰাটে এছ’চিয়েছন অৱ ইণ্ডিয়া’ৰ দ্বাৰা আয়োজন কৰা বিশ্বকাপ প্ৰতিযোগিতাখনত ভাৰতৰ বিভিন্ন ৰাজ্যৰ খেলুৱৈৰ লগতে অসমৰ ১৭ গৰাকী প্ৰতিভাবান খেলুৱৈয়ে স্থান লাভ কৰিছে।
উল্লেখযোগ্য যে কলকাতাত দুদিনীয়াকৈ অনুষ্ঠিত হ’বলগা এই বিশ্বকাপত অসমৰ হৈ অংশগ্ৰহণ কৰা আটাইকেইগৰাকী খেলুৱৈ নগাঁও জিলাৰ কলিয়াবৰৰ। দলটোৱে এ টি এ কেৰ সভাপতি তথা প্ৰশিক্ষক বিপ্লৱ কুমাৰ শইকীয়াৰ নেতৃত্বত প্ৰতিযোগিতাখনত অংশগ্ৰহণ কৰিব।
এছ’চিয়েশ্যন অফ ট্ৰেডিশ্যনেল চুটকান কাৰাটে-ড’ অসমৰ হৈ অংশগ্ৰহণ কৰিব লগা খেলুৱৈ কেইগৰাকী হ’ল ক্ৰমে কৃতাৰ্থ ৰাজখোৱা (২৯ কেজি), ৰূপজ্যোতি শইকীয়া (৫০ কেজি), জ্ঞানজ্যোতি শইকীয়া (৭২ কেজি), মৃগাংক জ্যোতি বৰা (৩৯ কেজি), মৃণাল বৰা (৫ কেজি), অংকুৰজ্যোতি গোহাঞি (৫১ কেজি), সুৰুজ পাণ্ডে (৫০ কেজি), প্ৰত্যুষ ভট্টাচাৰ্য (৩৮ কেজি), শান্তনু বড়ো (৫০ কেজি), অনুপম বৰা (০০ কেজি), ৰণিত বৰা (২৮ কেজি), ৰিদ্ধি ৰাপিনী কাশ্যপ (০০ কেজি), মাধুৰ্য্য কৌশিক (২৯ কেজি), ময়ুৰৰাজ শৰ্মা (৩৭ কেজি), স্বেহাননী গাৰ্গ (০০ কেজি), সুমন বিশ্বাস (৪৪ কেজি) আৰু দিব্যজ্যোতি বৰা (৫৮ কেজি)।
আনহাতে, কাৰাটে বিশ্বকাপত অংশ গ্ৰহণ কৰিব লগা কলিয়াবৰৰ দলটোৰ সফলতা লাভ কৰাৰ আশা ব্যক্ত কৰিছে অঞ্চলটোৰ লগতে ৰাজ্যখনৰ ক্ৰীড়াপ্ৰেমী ৰাইজে।
