শিৱসাগৰৰ ঘিলাগুৰি অঞ্চলত আজি পুৱা এটা পুখুৰীত উপঙি থকা অৱস্থাত এজন যুৱকৰ মৃতদেহ উদ্ধাৰ হোৱা ঘটনাই অঞ্চলটোত চাঞ্চল্যৰ সৃষ্টি কৰিছে।
ঘটনা বিৱৰণী মতে শিৱসাগৰ নগৰৰ পৰা প্ৰায় ১২ কিলোমিটাৰ নিলগৰ ঘিলাগুৰি অঞ্চলৰ ইমৰান হুছেইন নামৰ ব্যক্তি এগৰাকীৰ ঘৰৰ পিছফালে থকা এটা পুখুৰীত আজি পুৱা তেওঁৰ ঘৰত কাম কৰা ব্যক্তি গৰাকীয়ে এটা মৃতদেহ উপঙি থকা অৱস্থাত প্ৰত্যক্ষ কৰে।
লগে লগে ঘটনা সম্পৰ্কত আৰক্ষীক খবৰ দিয়াত আৰক্ষী ঘটনাস্থলীত উপস্থিত হৈ মৃতদেহ টো পুখুৰীৰ পৰা উদ্ধাৰ কৰে। মৃত যুৱকজন শিৱসাগৰ চহৰৰ গণকপট্টী নিৱাসী প্ৰদীপ দত্তৰ পুত্ৰ ৰূপৰাজ দত্ত (১৮) বুলি চিনাক্ত কৰা হৈছে।
যুৱকজনৰ পৰিয়ালে জানিবলৈ দিয়া মতে মানসিক ভাৱে অসুস্থ ৰূপৰাজ দত্তই দেওবাৰে ৰাতি প্ৰায় ১০:৩০ মান বজাত ঘৰৰ পৰা ওলাই গৈছিল।
কি পৰিস্থিতিত যুৱকজন চহৰৰ পৰা ১২ কিলোমিটাৰ দূৰত্বৰ ঘিলাগুৰি অঞ্চলৰ এগৰাকী অচিনাকী লোকৰ বাৰীৰ ভিতৰত সুমাই থকা এটা পুখুৰীত পৰি মৃত্যু হয় তাক লৈও ৰহস্যৰ সৃষ্টি হৈছে।
