‘‘সদৌ অসম ছাত্ৰ সন্থা তথা ২৮টা জনগোষ্ঠীয় সংগঠনৰ দাবীৰ প্ৰতি মোৰ সম্পূৰ্ণ সমৰ্থন আছে। জাতিধ্বংসী নাগৰিকত্ব বিধেয়কৰ মই তীব্ৰভাৱে বিৰোধিতা কৰো আৰু বিৰোধিতা কৰি যাম। ৰাইজৰ পক্ষত থাকি বিদেশীক ৰক্ষণাবেক্ষণ দিয়া যিকোনো পদক্ষেপৰ মই বিৰোধিতা কৰি যাম। সংসদত এই জাতিধ্বংসী বিল গৃহীত কৰিলে মই বিধায়কৰ পদ ত্যাগ কৰিবলৈ প্ৰস্তুত,‘’- সোমবাৰে আছু আৰু ২৮ টা জনগোষ্ঠীয় সংগঠনৰ প্ৰতিনিধিৰ আগত পশ্চিম গুৱাহাটী সমষ্টিৰ বিধায়ক ৰমেন্দ্ৰ নাৰায়ণ কলিতাই এইদৰে কয়।
সোমবাৰে পশ্চিম গুৱাহাটী সমষ্টিৰ বিধায়ক ৰমেন্দ্ৰ নাৰায়ণ কলিতাক ছাত্ৰ সন্থা আৰু ২৮টা জনগোষ্ঠীয় সংগঠনৰ প্ৰতিনিধি দল এটাই সাক্ষাৎ কৰে। সদৌ অসম ছাত্ৰ সন্থাৰ ৰাজ্যিক কাৰ্যনিৰ্বাহক সদস্য সীমান্ত ঠাকুৰীয়া, সদৌ অসম হাজং ছাত্ৰ সন্থাৰ উপদেষ্টা বিদ্যাসাগৰ হাজং, সদৌ অসম গৰিয়া মৰিয়া দেশী জাতীয় পৰিষদৰ সহঃ সাধাৰণ সম্পাদক ছহিদ আলী আহমেদকে ধৰি প্ৰতিনিধি দলটোৰ সদস্যসকলে অগপ দলৰ বিধায়ক গৰাকীক সাক্ষাৎ কৰি জাতিধ্বংসী নাগৰিকত্ব (সংশোধনী) বিধেয়ক বাতিলৰ ক্ষেত্ৰত পদক্ষেপ ল’বলৈ আহ্বান জনায়।
আনহাতে, সদৌ অসম ছাত্ৰ সন্থা আৰু ২৮টা জনগোষ্ঠীয় সংগঠনে অসমৰ খিলঞ্জীয়া মানুহৰ স্বাৰ্থ জলাঞ্জলি দি তথা অসম চুক্তিক উলংঘা কৰি অসমত অবৈধ বাংলাদেশীক ৰক্ষণাবেক্ষণ দিব বিচৰা কোনো মন্ত্ৰী, বিধায়ক, সাংসদ বা ৰাজনৈতিক নেতাই নিস্তাৰ নাপাব বুলি সকীয়াই দিয়ে।
উল্লেখ্য যে অসমৰ জনসাধাৰণৰ ওপৰত জাপি দিব খোজা জাতিধ্বংসী নাগৰিকত্ব (সংশোধনী) বিধেয়ক ২০১৬’ বাতিলৰ দাবী সাব্যস্ত কৰিবলৈ সদৌ অসম ছাত্ৰ সন্থা আৰু ২৮টা জনগোষ্ঠীয় সংগঠনৰ আহ্বানত অসমৰ মন্ত্ৰী, বিধায়ক, সাংসদসকলৰ ঘৰলৈ যোৱাৰ কাৰ্যসূচী চলি থকাৰ মাজতে এই সকীয়নি দিয়া হৈছে।
আনহাতে, আছু আৰু ২৮ টা সংগঠনে গ্ৰহণ কৰা উক্ত কাৰ্যসূচী নিৰৱচ্ছিন্নভাৱে চলাই যোৱাৰ কথাও সদৰী কৰিছে।
