প্ৰতিবেশী চীনলৈ এক শক্তিশালী বাৰ্তা প্ৰেৰণ কৰাৰ দৃষ্টিভংগীলৈ এই বছৰৰ প্ৰথম ভাগতে অৰুণাচল ভ্ৰমণৰ কাৰ্যসূচী গ্ৰহণ কৰিব প্ৰধানমন্ত্ৰী নৰেন্দ্ৰ মোডীয়ে। চীনে দীৰ্ঘদিন ধৰি সীমান্তৰ ৰাজ্যখনত শীৰ্ষ নেতাৰ ভ্ৰমণত তীব্ৰ আপত্তি দৰ্শাই আহিছে।
ভ্ৰমণৰ তাৰিখ চূড়ান্ত হোৱা নাই যদিও সূত্ৰসমূহে প্ৰকাশ কৰিছে যে অলপতে নতুন দিল্লীত প্ৰধানমন্ত্ৰী নৰেন্দ্ৰ মোডী আৰু অৰুণাচল প্ৰদেশৰ মুখ্যমন্ত্ৰী পেমা খাণ্ডুৰ মাজত হোৱা বৈঠকত ইতিমধ্যে পৰিকল্পনাটোৰ বিষয়ে আলোচনা কৰা হৈছে।
চীনে যোৱা বছৰৰ নৱেম্বৰত প্ৰতিৰক্ষা মন্ত্ৰী নিৰ্মলা সীতাৰমন আৰু ডিচেম্বৰ মাহত ৰাষ্ট্ৰপতি ৰাম নাথ কোবিন্দৰ অৰুণাচল ভ্ৰমণৰ সময়ত তীব্ৰ প্ৰতিক্ৰিয়া প্ৰকাশ কৰিছিল।
ইয়াৰ আগেয়েও আধ্যাত্মিক নেতা দালাই লামাই অৰুণাচল প্ৰদেশ ভ্ৰমণ কৰাৰ সময়ত চীনে তীব্ৰ অসন্তুষ্টি ব্যক্ত কৰিছিল। আনকি ২০১৬ চনত তেতিয়াৰ আমেৰিকা যুক্তৰাষ্ট্ৰৰ ৰাষ্ট্ৰদূতৰ অৰুণাচল ভ্ৰমণকো চীনে সহজভাৱে লোৱা নাছিল। ২০১৫ চনত মোডীৰ প্ৰথমটো অৰুণাচল ভ্ৰমণৰ সময়তো চীনে তীব্ৰ প্ৰতিবাদ জনাইছিল।
চীনে ইউপিএ চৰকাৰৰ দিনতো ভাৰতীয় নেতাৰ ভ্ৰমণৰ বিৰোধিতা কৰিছিল। কিন্তু অৰুণাচল প্ৰদেশক তেওঁলোকৰ ভূখণ্ডৰ অংশ হিচাপে দাবী কৰি অহাৰ পিছৰে পৰা শেহতীয়াভাৱে চীনে প্ৰতিক্ৰিয়া প্ৰকাশত তৎপৰতা দেখুৱাবলৈ লৈছে।
এক বাতৰি মতে অৰুণাচল প্ৰদেশৰ উজনি ছিয়াং জিলাৰ বিশিঙৰ ওচৰত প্ৰায় এসপ্তাহ ধৰি ভাৰতীয় আৰু চীনৰ সৈন্যই অৱস্থান কৰিছিল। এই অৱস্থান আৰম্ভ হৈছিল যোৱা ডিচেম্বৰত পথ নিৰ্মাণৰ যন্ত্ৰ পাতি লৈ ভাৰতীয় ভূখণ্ডত প্ৰৱেশ কৰাৰ পিছত। বাসিন্দা সকলে কৈছে যে ভাৰতীয় সৈন্যই বিশিঙ গাওঁৰ ওচৰত চীনা সৈন্যক বাধা দিছিল আৰু তেওঁলোকৰ পথ নিৰ্মাণৰ যন্ত্ৰ পাতিসমূহ জব্দ কৰিছিল।
অৱশ্যে উজনি ছিয়াং জিলাৰ জিলা প্ৰশাসনৰ বিষয়াই চীনৰ এনে কোনো কাৰ্যকলাপৰ কথা অস্বীকাৰ কৰিছে।
