সদ্য ঘোষিত অসম অসামৰিক সেৱা পৰীক্ষাৰ অসম আৰক্ষী সেৱাত ৰাজ্যৰ ভিতৰতে শীৰ্ষস্থান দখল কৰিবলৈ সক্ষম হৈছে বোকাখাতৰ অসামৰিক চিকিৎসালয়ৰ আয়ুৰ্বেদিক চিকিৎসক ডাঃ অনুপজ্যোতি বৰাই।
মাজুলীৰ ২ নং কড়ালগাঁৱৰ বাসিন্দা তথা গোলাঘাটৰ নাওঁজান আৰক্ষী চকী ভাৰপ্ৰাপ্ত বিষয়া বিপিন বৰাৰ সুযোগ্য সন্তান অনুপজ্যোতি বৰাৰ সৰুৰে পৰাই ইচ্ছা আছিল আৰক্ষী বিষয়া হোৱাৰ।
মৰানৰ উচ্চতৰ মাধ্যমিক বিদ্যালয়ৰ পৰা হাইস্কুল শিক্ষান্ত পৰীক্ষা আৰু যোৰহাট জে বি কলেজৰ পৰা উচ্চতৰ মাধ্যমিক পৰীক্ষাত উৰ্ত্তীণ হৈ অনুপজ্যোতিয়ে গুৱাহাটিৰ আয়ুৰ্বেদিক চিকিৎসা মহাবিদ্যালয়ত ভৰ্তি হৈছিল।
২০১৪ চনত সুখ্যাতিৰে আয়ুৰ্বেদ চিকিৎসাত স্নাতক ডিগ্ৰী লৈ অনুপজ্যোতিয়ে কিছুদিনৰ বাবে গুৱাহাটীৰে জি এন আৰ চি চিকিৎসালয়ত কৰ্ম জীৱনৰ পাতনি মেলিছিল যদিও মনতে পুহি ৰাখিছিল পিতৃ বিপিন বৰাৰ দৰে এজন আৰক্ষী বিষয়া হোৱাৰ সপোন।
সেয়ে জি এন আৰ চিৰ পিছত বোকাখাত অসামৰিক চিকিৎসালয়ত আয়ুৰ্বেদিক চিকিৎসক হিচাপে যোগদান কৰি তেওঁ নিজকে অসামৰিক সেৱাৰ বাবে প্ৰস্তুত কৰাত মনোনিৱেশ কৰে। আৰু অৱশেষত ঐকান্তিক প্ৰচেষ্টাৰ অন্তত সদ্য ঘোষিত অসম অসামৰিক সেৱা পৰীক্ষাৰ আৰক্ষী সেৱাত শীৰ্ষ স্থান দখল কৰিবলৈ সক্ষম হয়।
নৰ্থ-ইষ্ট নাওৰ সৈতে হোৱা এক বাৰ্তালাপত ডাঃ অনুপজ্যোতি বৰাই সৰুৰে পৰা পিতৃ বিপিন বৰাক আদৰ্শ হিচাপে লৈ এজন আৰক্ষী বিষয়া হোৱাৰ সংকল্পৰ বিষয়ে জানিবলৈ দি উক্ত সপোন পূৰ্ণ হোৱাত অতিশয় সুখী বুলি জনায়।
