অসমৰ খিলঞ্জীয়াৰ সৰ্বাত্মক নাগৰিকত্ব বিধেয়ক বিৰোধৰ মাজতে গুৱাহাটী উচ্চ ন্যায়ালয়ৰ কঠোৰ নিৰ্দেশত অনুষ্ঠিত পঞ্চায়ত নিৰ্বাচনৰ প্ৰাক মুহূৰ্তত শাসক দলটোৰ বিপৰীতমুখী একাধিক ‘দলীয়’ বক্তব্যই পৰিস্ফূত কৰিছে বিজেপিৰ প্ৰতি অহা তীব্ৰ প্ৰত্যাহ্বান।
তৃণমূল কৰ্মী বাদেই, দলটোৰ ৰাজ্যিক পৰ্য্যায়ৰ শীৰ্ষ নেতৃত্বৰ মাজতে শেহতীয়াকৈ চলা গালি-গালাজে উদঙাই দিছে শাসন দখলৰ মাত্ৰ আঢ়ৈ বছৰতে ‘জনপ্ৰিয়তা’ উদং খোৱাক লৈ দলটোৰ চৰম অস্বস্তি।
দলৰ এজন মুখপাত্ৰই যদি সংবাদমেলযোগে বিধায়কৰ মত দলীয় বক্তব্য নহয় বুলিছে, উপ সভাপতিয়ে আকৌ ৰাজ্যিক মুখ্য কাৰ্য্যালয়তে সংবাদমেলযোগে ঘোষণা কৰিছে মুখপাত্ৰৰ বক্তব্য ‘দলীয়’ নহয়।
অসমৰ পূৰ্ব বংগীয় মূলৰ মুছলমানসকলে মুছলমান ৰাষ্ট্ৰ নিৰ্মাণ কৰিব খুজিছে বুলি যোৱা ১৩ নৱেম্বৰত ৰাজ্যিক মুখপাত্ৰ জয়ন্ত মল্ল বৰুৱাই কৰা দাবী খণ্ডন কৰি শনিবাৰে প্ৰয়োজনত ‘দলত্যাগ’ৰে সকীয়নি দিছে দলটোৰ উপ সভাপতি তৌফিক ৰহমানে।
“বিজেপি দল পূৰ্ববংগীয় মুছলমান সকলৰ বিৰোধী নহয়, বিজেপি দল বাংলাদেশী সকলৰ বিৰোধী,” মুখপাত্ৰ বৰুৱাৰ মন্তব্য ‘সাম্প্ৰদায়িক’ আৰু ই ‘দলীয়’ বক্তব্য নহয় বুলি দাবী কৰি গুৱাহাটীস্থিত ৰাজ্যিক কাৰ্য্যালয়তে এই ঘোষণা উপ সভাপতি ৰহমানৰ।
তাৎপৰ্য্যপূৰ্ণভাৱে দলটোৰ হোজাইৰ বিধায়ক শিলাদিত্য দেবক উপ সভাপতি ৰহমানে ‘বিকৃত মস্তিষ্ক’ৰ বুলি অভিহিত কৰাৰ পিছত দলৰ আন এজন মুখপাত্ৰ ৰূপম গোস্বামীয়ে বিধায়কৰ সলনি মুখপাত্ৰৰ বক্তব্যহে ‘দলীয়’ বুলি মন্তব্য কৰিছিল।
ৰাজ্যিক বিজেপিৰ এই ‘দলীয়’ বক্তব্যৰ কাহিনী ইমানতে শেষ হোৱা নাই। উপ সভাপতি ৰহমানৰ সংবাদমেলৰ দিনাই অৰ্থাৎ শনিবাৰেই আন এজন মুখপাত্ৰ জয়ন্ত দাসে আকৌ জ্যেষ্ঠ বিধায়ক অতুল বৰাক নাম দিছে ‘নিসিজা কচু’!
“অগপ দলত থাকি অগপৰ মাজত বিভেদ আনি অতুল ভৰাই দলটোক থান বান কৰি পেলালে,” বিজেপি উত্থাপিত নাগৰিকত্ব বিধেয়কৰ বিৰোধিতা কৰা প্ৰাক্তন মন্ত্ৰী তথা জ্যেষ্ঠ বিজেপি বিধায়ক অতুল বৰাৰ বিৰুদ্ধে এই মন্তব্য অগপৰ পৰাই বিজেপিলৈ অহা মুখপাত্ৰ দাসৰ।
বিধেয়ক বিৰোধিতা কৰি মুখ্য মন্ত্ৰী সৰ্বানন্দ সোণোৱালক দিয়া পত্ৰ বৰাই কিছুদিন পূৰ্বে ৰাজহুৱা কৰাৰ বিপৰীতে এই সন্দৰ্ভত দলৰ নেতৃত্বৰ সৈতে বিধায়কজন ‘কোনো আলোচনাত মিলিত হোৱা নাই’ বুলিহে দাবী কৰিলে দাসে।
পঞ্চায়ত নিৰ্বাচন পাতিবলৈকে বিজেপি নেতৃত্বাধীন অসম চৰকাৰে সাহ কৰা ‘নাছিল’ বুলি ইতিমধ্যে দলটোক সমালোচনা কৰিছিল প্ৰদেশ কংগ্ৰেছৰ সাধাৰণ সম্পাদক তথা মুখপাত্ৰ অপূৰ্ব ভট্টাচাৰ্য্যই।
আনহাতে বিধেয়কৰ বিৰোধী অসমৰ সকলো সংগঠনেই পঞ্চায়ত নিৰ্বাচনক শাসকীয় দলটোক এশিকনি দিয়াৰ বাবে টঙালি বান্ধিছে। আছুৰ কেন্দ্ৰীয় সাংগঠনিক সম্পাদক অনিল গগৈয়ে ডিব্ৰুগড়ত শেহতীয়াকৈ এই সন্দৰ্ভত স্থিতি ঘোষণা কৰাৰ লগতে জে’লৰ পৰা সদ্যমুক্ত আলফা নেতা জিতেন দত্তয়ো নিৰ্বাচনটো ‘সুন্দৰ সুযোগ’ বুলি উল্লেখ কৰি সিদ্ধান্ত লোৱাৰ বাবে জনগণক আহ্বান জনাইছিল।
