গোড়া হিন্দুত্ববাদী সংগঠন বিশ্ব হিন্দু পৰিষদে এইবাৰ অযোধ্যাত ৰাম মন্দিৰ প্ৰতিষ্ঠা কৰাৰ বাবে বদ্ধপৰিকৰ হৈ পৰিছে। “ধৈৰ্য্যৰ সীমা চেৰাই গৈছে, যিকোনো প্ৰকাৰে ৰাম মন্দিৰ প্ৰতিষ্ঠা হ’বই লাগিব”, আজি দিচপুৰ প্ৰেছ ক্লাবত আয়োজন কৰা এখন সংবাদমেলত এই দাবী কৰে বিশ্ব হিন্দু পৰিষদ অসম প্ৰান্তৰ সভাপতি ড০ মুনীন্দ্ৰ মোহন ডেকাই।
উল্লেখযোগ্য যে, ১৯৯২ চনত হিন্দুত্ববাদী নেতাৰ উচটনিত আৰ এছ এছৰ কৰসেৱকসকলে অযোধ্যাত থকা বাবৰি মচজিদ ভাঙি দিছিল। উক্ত স্থানত ৰাম মন্দিৰ স্থাপন কৰিবলৈ দীৰ্ঘদিন দাবী তুলি আহিছে হিন্দুত্ববাদী সংগঠনবোৰে।
আনহাতে ভাৰতীয় জনতা পাৰ্টীয়ে ইয়াক লৈ সদায়ে কৌশলপূৰ্ণ ৰাজনীতিৰে সুবিধা লৈ আহিছে। বিগত লোকসভা নিৰ্বাচনতো ৰাম মন্দিৰ নিৰ্মাণ দলটোৰ এটা প্ৰতিশ্ৰুতি আছিল হিন্দুত্ববাদী ভোটাৰৰ ওচৰত। কিন্তু কোৱা মতে চৰকাৰে ৰাম মন্দিৰ নিৰ্মাণ কৰিব নোৱাৰিলে হিন্দুত্ববাদী শক্তিৰ পৃষ্ঠপোষক চৰকাৰখনে।
বাবৰি মছজিদৰ ঠাইত ৰাম মন্দিৰ নিৰ্মাণ কৰিব বুলি চৰকাৰৰ মুখলৈ চাই থকা হিন্দুত্ববাদী দল-সংগঠনবোৰে ক্ৰমে বুজি উঠিছে চৰকাৰৰ প্ৰতৰণা। তেওঁলোকৰ ‘ধৈৰ্য্যৰ সীমা চেৰাই গৈছে’ বুলি জানিবলৈ দিয়ে বিশ্ব হিন্দু পৰিষদৰ নেতৃত্বই।
উল্লেখ কৰিব পাৰি যে বিজেপিৰ চৰকাৰ শাসনলৈ অহাৰ পিছত তৎপৰতা বৃদ্ধি পোৱা হিন্দুত্ববাদী শক্তিবোৰে এতিয়া ভাৰতত মুকলিকৈ তেওঁলোকৰ সম্প্ৰসাৰণবাদী কাৰ্য্যসূচী চলাই গৈছে যদিও তেওঁলোকৰ ৰাম মন্দিৰ নিৰ্মাণৰ যি মুখ্য কাৰ্য্যসূচী সেয়া অলপো আগ বঢ়াব পৰা নাই।
মন কৰিব লগীয়া কথাটো হ’ল কেন্দ্ৰৰ পিছতে ৰাজ্যতো বিজেপিৰ চৰকাৰ অহাৰ পিছত ৰাম মন্দিৰৰ আন্দোলনে এই প্ৰান্তকো চুই গৈছে। কেতিয়াও ৰামৰ আখ্যানৰ সম্পৰ্ক নথকা এই মুলুকৰো কিছু সংখ্যক লোকক ৰাম মন্দিৰ নিৰ্মাণৰ উৎসাহত জঁপিয়াই পৰা দেখা গৈছে। বিষয়টোত জড়িত হৈ তেওঁলোকে সততে সংবাদ মাধ্যমৰ মনোযোগ পাবৰ চেষ্টা কৰা দেখা যায়।
আজি সংবাদমেলত সংগঠনটোৰ অসমৰ নেতৃত্বই জনোৱামতে, ৰাম মন্দিৰ নিৰ্মাণ কৰা বিষয়ক লৈ অহা ২১ নৱেম্বৰৰ পৰা ধাৰাবাহিকভাৱে অসমৰ ভিন্ন প্ৰান্তত ধৰ্মীয় সভা অনুষ্ঠিত কৰিব বিশ্ব হিন্দু পৰিষদে। ২১ নৱেম্বৰৰ দিনা নলবাৰী জিলাৰ পৰা এই ধৰ্মসভা সমূহৰ আৰম্ভণি হ’ব। ৰাম মন্দিৰ নিৰ্মাণৰ ক্ষেত্ৰত হিন্দু সমাজক সজাগ কৰি তোলাটোৱেই এই ধৰ্মসভাৰ মূল উদ্দেশ্য বুলি জানিবলৈ দিয়ে সভাপতি ডেকাই।
তেওঁ জানিবলৈ দিয়া অনুসৰি ২২ নৱেম্বৰত তিনিচুকীয়া জিলাত, ২৩ নৱেম্বৰত ডিব্ৰুগড়, ২৫ নৱেম্বৰত গুৱাহাটীৰ উলুবাৰী, ২৯ নৱেম্বৰত নগাওঁ, লামডিং, ১ ডিচেম্বৰত ওদালগুৰি, ২ ডিচেম্বৰত মঙলদৈ, ধুবুৰী, ৩ ডিচেম্বৰত বঙাইগাওঁ, ৪ ডিচেম্বৰ কোকৰাঝাৰত এই ধৰ্মসভা অনুষ্ঠিত হ’ব।
