বিটিএডিক এখন কেন্দ্ৰীয় শাসিত পৰিষদলৈ উন্নীতকৰণৰ বাতৰিৰ বিৰোধিতা কৰি সদৌ কোচ ৰাজবংশী ছাত্ৰ সন্থা (আক্ৰাছু), অবড়ো সুৰক্ষা সমিতি আৰু কোচ ৰাজবংশী সন্মিলনীয়ে যৌথভাৱে সোমবাৰে আহ্বান জনোৱা ৪৮ ঘন্টীয়া ৰাজ্যজোৰা বন্ধত সমগ্ৰ ওদালগুৰি জিলাত স্বাভাৱিক জীৱন যাত্ৰা ব্যহত হৈ পৰে।
বন্ধৰ সময়ত ব্যৱসায়িক প্ৰতিষ্ঠান, চৰকাৰী-বেচৰকাৰী কাৰ্যালয়, বজাৰ তথা দোকান-পোহাৰসমূহ বন্ধ থাকে। জিলাখনৰ টংলা, কলাইগাঁও, ডিমাকুছি, মাজবাট, খৈৰাবাৰী, ৰৌতা, হৰিশিঙা, পানেৰী, ওদালগুৰিকে ধৰি মুখ্য চহৰকেইখনত বন্ধৰ সৰ্বাত্মক প্ৰভাৱ পৰে।
বন্ধৰ দিনটোত ব্যৱসায়িক তথা ব্যক্তিগত যান-বাহনসমূহৰ চলাচল বন্ধ থাকে। ইপিনে কলাইগাঁওত বন্ধ সমৰ্থকে টায়াৰ জ্বলাই প্ৰতিবাদ কৰাৰ লগতে শিল দলিয়াই ব্যৱসায়িক বাহনৰ ক্ষতি কৰে।
আৰক্ষী আৰু অৰ্দ্ধ সামৰিক বাহিনীয়ে বন্ধ সমৰ্থকে সৃষ্টি কৰিব পৰা অপ্ৰীতিকৰ পৰিস্থিতি প্ৰতিৰোধ কৰাৰ বাবে জিলাখনৰ চহৰসমূহত তহল দিয়া দেখা যায়।
সংবাদ মাধ্যমৰ আগত আক্ৰাছুৰ ওদালগুৰি (পশ্চিম) শাখাৰ সভাপতিহেমন্ত বৰাই কয়, ‘’ আমি ঐতিহাসিক কমতাপুৰ ৰাজ্যৰ এটা অংশ বিটিএডিত কোনো কেন্দ্ৰীয় শাসিত পৰিষদ কেতিয়াও গ্ৰহণ নকৰো।‘’ তেওঁ লগতে হুংকাৰ দিয়ে যে প্ৰয়োজন হ’লে আমি তেজ দিবলৈ প্ৰস্তুত কিন্তু মাটি নিদিও।
