পঞ্চায়ত নিৰ্বাচনৰ বাবে ৰাজনৈতিক দলবোৰৰ প্ৰচাৰ অভিযানৰ উত্তাপ এতিয়া ক্ৰমাৎ বৃদ্ধি পাইছে। আক্ৰমণ-প্ৰত্যাক্ৰমণৰ ফলত সৃষ্টি হৈছে কিছুমান আমোদজনক তথা বিতৰ্কিত বাক্যবান। তাৰ মাজতে ভোটাৰক আকৰ্ষণ কৰাৰ বাবে সুযোগ হেৰুৱাব খোজা নাই দলবোৰে। সেয়ে, আৰম্ভ হৈছে নিৰ্বাচনী প্ৰচাৰৰ চমকপ্ৰদ অভিযান।
আনহাতে, লাচিত দিবসৰ দিনাই শনিবাৰে আগন্তুক পঞ্চায়ত নিৰ্বাচনত লাচিতৰ দৰে যুঁজাৰ সংকল্প ল’লে কংগ্ৰেছ দলে ৷ কংগ্ৰেছ দলৰ পৰা পঞ্চায়ত নিৰ্বাচনত প্ৰতিদ্বন্দ্বিতা কৰা প্ৰতিজন সদস্যই আগন্তুক নিৰ্বাচনত একো একোজন লাচিতৰ দৰে যুঁজিব। বিহালী বিধানসভা সমষ্টিৰ অন্তৰ্গত বাঘমাৰি চাহ বাগিছাৰ এখন নিৰ্বাচনী সভাত প্ৰদেশ কংগ্ৰেছৰ সভাপতি ৰিপুন বৰাই নিজৰ ভাষণত এইদৰে ব্যক্ত কৰে।
তেওঁ কয় যে বিধান সভা নিৰ্বাচনৰ সময়ত বিজেপিয়ে যুঁজা শেষ শৰাইঘাটৰ ৰণ আচলতে অসমীয়া জাতিক ধ্বংস কৰাৰহে ৰণ আছিল ৷ নাগৰিকত্ব সংশোধনী বিধেয়ক, হিন্দু বাংলাদেশীক নাগৰিকত্ব প্ৰদানৰ জড়িয়তে জাতিটোক ধ্বংস কৰিলে৷ বিজেপিৰ কবলৰ পৰা অসমীয়া জাতিটোক উদ্ধাৰ কৰিবলৈ লাচিত দিবসৰ দিনাই আচল শৰাইঘাটৰ ৰণৰ ৰণশিঙা বজাই প্ৰতিজন কংগ্ৰেছ কৰ্মীয়ে একো একোজন লাচিতৰ দৰে যুঁজাৰ সংকল্প লৈছে৷
ইপিনে, ৰিপুন বৰাই পঞ্চায়ত নিৰ্বাচনত দুটাত কৈ অধিক সন্তান থকা লোকে পঞ্চায়ত নিৰ্বাচন খেলিব নোৱাৰিব বুলি চৰকাৰে কৰা নতুন নিয়ম সন্দৰ্ভত মন্তব্য কৰি কয়, ‘’সৰ্বানন্দ সোণোৱাল ডঙুৱা মানুহ ৷ সেয়েহে বৰলা সৰ্বানন্দই বুজি নাপায় সৰু ল’ৰা ছোৱালীৰ মৰম। বিয়া নপতা সৰ্বানন্দই ল’ৰা ছোৱালীৰ মৰম কি বুজি নাপায় বাবেই নতুন নিয়ম বনাইছে।‘’
প্ৰদেশ কংগ্ৰেছৰ সভাপতিগৰাকীয়ে লগতে কয় যে চৰকাৰে পানী যোগান ধৰিব লাগে, চৰকাৰে ৰাস্তা বনাই দিব লাগে ৷ কিন্তু এইবিলাক কাম নকৰি চৰকাৰে নতুন নিয়ম বনাই কাৰ ঘৰত কেইটা ল’ৰা ছোৱালী আছে সেইবিলাকহে চাই ফুৰিছে।
বৰাই লগতে কটাক্ষ কৰি কয়, ‘’এই বিলাক কথা মোডীয়েও বুজি নাপায়। কাৰণ মোডীয়ে বিয়াপাতি ৬ মাহৰ ভিতৰতে ঘৈনিয়েকক খেদি বৰলা ভাত খাই ফুৰিছে ৷ সৰ্বানন্দই মোডীৰ মতে চলে আৰু মোডী ৰামদেৱৰ মতে চলে ৷ ৰামদেৱো বৰলা ৷ গতিকে বৰলা মানুহে সন্তানৰ মৰম কি বুজি পাব।‘’
