ন্যায্য অধিকাৰৰ বাবে প্ৰতিবাদত বহা সদৌ অসম নাৰ্ছ সন্থাক চৰকাৰে আলোচনাৰ বাবে মাতি অপমান কৰাৰ পাছত আজি ৰাজ্যখনৰ বিভিন্ন ঠাইত নাৰ্ছসকলে পুনৰ প্ৰতিবাদ জনায়।
এই প্ৰতিবাদৰ কাৰ্যসূচীৰ অংশ হিচাপে বৰপেটা জিলাৰ নাৰ্ছসকলে বৰপেটাৰ ফখৰুদ্দিন আলী আহমেদ চিকিৎসা মহাবিদ্যালয় হস্পতালত বিগত দুদিন ধৰি ৰূপায়ণ কৰি আছে কৰ্ম বিৰতি কাৰ্যসূচী।
মন কৰিব লগীয়া যে এই কৰ্ম বিৰতি কাৰ্যসূচীৰ মাজতে চিকিৎসা মহাবিদ্যালয়খনত আজি এক উত্তপ্ত পৰিস্থিতিৰ সৃষ্টি হয়।
আনহাতে প্ৰতিবাদকাৰী নাৰ্ছসকলক আৰক্ষীয়ে গাড়ীত উঠাই নিয়াৰ চেষ্টা চলাওঁতেই প্ৰতিবাদকাৰী নাৰ্ছ আৰু আৰক্ষীৰ মাজত হতাহতি হয় আৰু উত্তপ্ত পৰিস্থিতিৰ সৃষ্টি হয়। সম্প্ৰতি আৰক্ষীয়ে নাৰ্ছসকলক চিকিৎসা মহাবিদ্যালয় চৌহদতে আৱদ্ধ কৰি ৰাখিছে।
নাৰ্ছসকলে ন্যায্য প্ৰাপ্যৰ দাবীত কৰ্মবিৰতি পালন কৰিছে যদিও পঞ্চায়ত নিৰ্বাচনত বিজেপিৰ তাৰকা প্ৰচাৰক, স্বাস্থ্য মন্ত্ৰী হিমন্ত বিশ্ব শৰ্মা ব্যস্ত থাকি নাৰ্ছৰ আন্দোলনত কোনো গুৰুত্ব প্ৰদান নকৰাত জাঙুৰ খাই উঠিছে নাৰ্ছসকল।
ইফালে চৰকাৰে নাৰ্ছসকলৰ অভাৱ, অভিযোগক কোনো গুৰুত্ব প্ৰদান নকৰাৰ ফল ভোগ কৰিছে সমগ্ৰা ৰাজৰ বিভিন্ন জিলাৰ ৰোগী আৰু অভিভাৱকসকলে।
