ডিমাপুৰৰ পৰা আহি চুপাৰি শ্বাৰ্প শ্বুটাৰে গুলীয়াইছিল হাফলঙৰ খাদ্য আৰু অসামৰিক বিষয়া ৰূপম দিব্ৰাগেডে ওৰফে ডনাল্ডক।
ঘটনাটোৰ মাষ্টাৰমাইণ্ড আৰু সহযোগী ক্ৰমে বাবু আৰু এইচ কুয়াম নামৰ দুজনক গ্ৰেপ্তাৰ কৰি এই দাবী কৰিছে আৰক্ষীয়ে। কিন্তু মূল অভিযুক্ত ডিমাপুৰ শ্বুটাৰ পলাই গৈছে।
“সুলভ মূল্যৰ সামগ্ৰীৰ দোকানৰ মালিক বাবু ছেত্ৰীয়ে ৰূপম ওৰফে ডনাল্ডক হত্যা কৰাৰ কাৰণে এইচ কুয়ামেৰ সহায় লৈ ডিমাপুৰৰ পৰা এক লাখ টকাৰ চুক্তিৰে শ্বুটাৰ হায়াৰ কৰিছিল। গুলীচালনাত ব্যৱহৃত মাৰণাস্ত্ৰ ৭.৬৫ পিস্তলটোও আমি জব্দ কৰিছো,” হাফলঙত দেওবাৰে সংবাদমেলযোগে এই দাবী দক্ষিণ অসমৰ উপ মহা পৰিদৰ্শক দেৱৰাজ উপাধ্যায়ৰ।
গ্ৰেপ্তাৰ হোৱা বাবু আৰু কুয়ামেক বৰ্তমানে আৰক্ষীয়ে সোধাপোচ কৰি আছে বুলিও জনাই আৰক্ষী বিষয়াজনে। সংবাদমেলত ডিমা হাচাওৰ আৰক্ষী অধীক্ষকক প্ৰশান্ত শইকীয়া আৰু অতিৰিক্ত আৰক্ষী অধীক্ষকক পুষ্পৰাজ সিঙো উপস্থিত আছিল।
আনহাতে মাইবাঙৰ ওৱাজ’ (Wajao) গাঁৱত সংঘটিত অপহৰণৰ ঘটনা সন্দৰ্ভত বিশেষ কোনো মন্তব্য নকৰি উপাধ্যায়ে ঘটনাটো আৰক্ষীয়ে তদন্ত কৰি আছে বুলি জানিবলৈ দিয়ে।
লগতে পঢ়ক– ডিমা হাচাওত গুলীচালনাৰ ঘটনা; এজন চৰকাৰী বিষয়া আহত
তেওঁ অৱশ্যে এই অপহৰণ আঁৰত কোনো সংগঠিত গোট থকাৰ কথা অস্বীকাৰ কৰিছে। ধনৰ কাৰণেই অপৰাধী গোটে এইবোৰ কৰি আছে বুলি তেওঁ দাবী কৰে।
পাহাৰীয়া জিলাখনৰ সামগ্ৰিক পৰিস্থিতিৰ লগতে চৰকাৰী বিষয়াক গুলীওৱাৰ ঘটনাৰ বুজ লোৱাৰ কাৰণে শনিবাৰে নিশা হাফলঙত উপস্থিত হৈছিল ডিআইজি উপাধ্যায়।
শনিবাৰে সাপ্তাহিক বজাৰ বাৰৰ দিনা হাফলং কলেজ ৰোডৰ খাদ্য আৰু অসামৰিক যোগান বিভাগৰ চৰকাৰী কাৰ্যালয়ত পৰিদৰ্শক ৰূপম ওৰফে ডনাল্ড দিব্ৰাগেডেক পিস্তলেৰে গুলিয়াইছিল অচিনাকী দুৰ্বৃত্তই।
বুকুত দুটাকৈ গুলী লগা ৰূপম বৰ্তমানে গুৱাহাটী চিকিৎসা মহাবিদ্যালয় চিকিৎসালয়ত চিকিৎসাধীন হৈ আছে।
