”অসমীয়া মহাজাতিক বিশ্বত প্ৰতিষ্ঠিত কৰা জগত গুৰু জনাৰ জন্ম আদি লীলাভূমি এই পবিত্ৰ বটদ্ৰৱা থানত মূৰদোৱাই মই সমূহ অসমবাসীৰ শান্তি কামনা কৰিছো।” এই মন্তব্য অসমৰ মুখ্যমন্ত্ৰী সৰ্বানন্দ সোণোৱালৰ।
পঞ্চায়ত নিৰ্বাচনৰ প্ৰথম পৰ্যায়ৰ প্ৰচাৰ অভিযানৰ সামৰণিৰ পাছত সোমবাৰে অসমৰ মুখ্য মন্ত্ৰীগৰাকী সন্ধিয়াৰ ভাগত সম্পূৰ্ণ জাতীয় সাজ পৰিধান কৰি বটদ্ৰৱা থানত উপস্থিত হৈ কয় যে পাহাৰ ভৈয়াম-বৰাক ব্ৰহ্মপুত্ৰ সমন্বিতে বৰ অসমৰ প্ৰতিটো জাতি-জনগোষ্ঠীৰ মাজত ঐক্য সম্প্ৰিতিৰ এনাজৰী ডাল অধিক সু-দৃঢ় হোৱাৰ মনোবাঞ্চাৰে মই গুৰুজনাৰ শ্ৰীচৰণত প্ৰণাম জনাইছো।
ভগৱন্ত প্ৰভুৰ চাৰি অৱতাৰৰ ধূলাৰে পবিত্ৰ এই মহিমামণ্ডিত থানৰ আশীৰ্বাদত অসমবাসীৰ প্ৰগতিৰ ভেটি শক্তিশালী ৰূপত প্ৰতিষ্ঠা কৰিব পাৰিম বুলি আশাবাদী বুলিও মুখ্যমন্ত্ৰীগৰাকীয়ে থান সত্ৰৰ ভকত- বৈষ্ণৱ, আইমাতৃৰ সকলৰ আগত নিজৰ অভিমত ব্যক্ত কৰে।
বটদ্ৰৱা থানৰ কীৰ্তন ঘৰত সাষ্টাংগে প্ৰণাম জনাই মুখ্যমন্ত্ৰী সোণোৱালে মণিকূটৰ অক্ষয় বন্তিত তেল আৰু শলিতা প্ৰজ্বলিত কৰি ৰখা থান পৰিচালনা সমিতিৰ সভাপতি তথা নৰোৱা সত্ৰৰ সত্ৰাধিকাৰ দেৱানন্দ দেৱ গোস্বামীৰ হাতেৰে নৈবেদ্য আগবঢ়ায়। বটদ্ৰৱা থানত সেৱা আগবঢ়াই উভতি অহাৰ ক্ষণত মুখ্যমন্ত্ৰীগৰাকীয়ে ঐতিহাসিক আকাশী গঙ্গা জলধাৰাত প্ৰণাম জনাই এচলু জল শিৰত লয়।
তপোবনৰ দৃশ্যৰাজিৰে সন্ধিয়াৰ সময়খিনিত সুশোভিত আকাশীগঙ্গাৰ নৈসৰ্গিক পৰিবেশ গছ লতিকা আৰু বিহংগৰ কাকলিত মন্ত্ৰমুগ্ধ হৈ প্ৰকৃতি সংৰক্ষণত গুৰুত্ব দিবলৈও পৰিচালনা সমিতিক অনুৰোধ জনায়।
ইয়াৰ পাছতে বটদ্ৰৱা থানৰ পৰ্যটন নিবাসত পৰিচালনা সমিতিৰ তৰফৰ পৰা ধৰ্মবস্ত্ৰ, শৰাই, কুঁহিলাৰ কঠ আৰু গ্ৰন্থৰে আদৰণি জনোৱা হয়। সহকাৰী সম্পাদক ইন্দ্ৰ মোহন বৰুৱাই আঁতধৰা সম্বৰ্দ্ধনা অনুষ্ঠানটোত স্থানীয় বিধায়িকা আঙুৰলতা ডেকা ,পৰিচালনা সমিতিৰ সভাপতি দেৱানন্দ দেৱ গোস্বামী, কাৰ্যকৰী সভাপতি ভোগেশ্বৰ বৰা, সাধাৰণ সম্পাদক ব্ৰজেন কাকতি আৰু অসম ৰাজ্যিক কৃষি বিপনন পৰিষদৰ অধ্যক্ষ পালিত বৰাও উপস্থিত থাকে।
উল্লেখ্য যে, ইতিপূৰ্বে অনুষ্ঠিত প্ৰতিটো বিধান সভা, লোকসভা, পঞ্চায়ত আৰু নিগম নিকায়কে আদি কৰি অনুষ্ঠিত হোৱা নিৰ্বাচনসমূহৰ প্ৰচাৰ কাৰ্যসূচীৰ সামৰণিৰ অন্তত বিভিন্ন ৰাজনৈতিক পদবীত অধিষ্ঠিত নেতৃত্বই পোনে পোনে অতিথিশালা, ৰিজ’ৰ্ট আদিত গৈ আমোদ প্ৰমোদত ব্যস্ত হোৱা কিম্বা জিৰণি লোৱা উদাহৰণসমূহৰ বিপৰীতে সোমবাৰে মুখ্যমন্ত্ৰী সৰ্বানন্দ সোণোৱালে বটদ্ৰৱাৰ দৰে পূণ্যভূমিত উপস্থিত হৈ সেৱা গ্ৰহণ কৰা আৰু বটদ্ৰৱা থানৰ ভকত-বৈষ্ণৱ, আইমাতৃসকলৰ লগত কিছুসময় পাৰ কৰা বিষয়টোৱে বিশেষ দৃষ্টি আকৰ্ষণ কৰিছে।
