দিচপুৰত যোৱা ৫ অক্তোবৰত প্ৰতিবাদী প্ৰতিবন্ধীৰ ওপৰত আৰক্ষীৰ আক্ৰমণক গৰিহণা দি তেওঁলোকক দিয়া প্ৰতিশ্ৰুতিসমূহ শীঘ্ৰে পূৰণ কৰিবলৈ শনিবাৰে প্ৰাক্তন মুখ্য মন্ত্ৰী তৰুণ গগৈয়ে সোণোৱাল চৰকাৰক দাবী জনোৱাৰ ঘটনাই ’১৯ৰ নিৰ্বাচনত কংগ্ৰেছৰ পক্ষলৈ নিব পাৰে অসমৰ প্ৰতিবন্ধী-প্ৰভাৱিত “৪০লাখ ভোট”।
প্ৰাক্তন মুখ্য মন্ত্ৰীগৰাকীৰ সঁহাৰিৰ প্ৰতি “ধন্যবাদ” জনাই অসমৰ প্ৰতিবন্ধীসকলৰ একমাত্ৰ ৰাজ্যিক সংগঠন প্ৰতিবন্ধী সুৰক্ষা সংস্থাৰ সাধাৰণ সম্পাদক নৃপেন মালাকাৰে তেনে এক ইংগিতেই দিছে নৰ্থ ইষ্ট নাও-ক।
“আমাৰ হৈ মাত মতাৰ বাবে প্ৰাক্তন মুখ্য মন্ত্ৰী তৰুণ গগৈক অশেষ ধন্যবাদ। আমি কোনো ৰাজনৈতিক দল নহয়, আমি অৰাজনৈতিক সংগঠন। আমাৰ হৈ যি মাত মাতে তেওঁলোকক আমি সমৰ্থন জনোৱাৰ কথাটো চিন্তা কৰিম,” মন্তব্য মালাকাৰৰ।
লগতে পঢ়ক– বিজেপিৰ শাসনত প্ৰতিবন্ধীৰ দিনো পৰিণত “প্ৰতাৰণা”ৰ দিৱসত
কিন্তু কংগ্ৰেছক সাংগঠনিকভাৱে সমৰ্থন জনোৱাৰ সিদ্ধান্ত এতিয়াও গ্ৰহণ নকৰি সমাগত নিৰ্বাচনলৈকে এই ৩মাহ সময় পৰ্য্যৱেক্ষণৰ কৌশল লৈছে প্ৰতিবন্ধী সংস্থাটোৱে।
“কংগ্ৰেছৰ প্ৰতি লোকসভা নিৰ্বাচনত সমৰ্থন থাকিবনে নাই, এই মুহূৰ্তত ক’ব নোৱাৰিম। কাৰণ নিৰ্বাচনলৈকে এতিয়াও কেইমাহ মান বাকী আছে। এই সময়খিনিত কংগ্ৰেছে কি মনোভাব দেখুৱাব তাৰ ওপৰত নিৰ্ভৰ কৰিব সমৰ্থন জনাম নে নাই,” অসমত প্ৰতিবন্ধী-প্ৰভাৱিত ভোট “৪০লাখ”মান থকা বুলি দাবী কৰি মালাকাৰে ক’লে। ২০১১ চনৰ লোকপিয়লৰ তথ্য অনুসৰি অসমত তেতিয়ালৈকে প্ৰতিবন্ধী লোকৰ সংখ্যা আছিল প্ৰায় ৪.৮ লাখ।
লগতে পঢ়ক– প্ৰতিবন্ধীৰ হাত-ভৰি ভাঙি কি কৰিব খুজিছে সোণোৱাল চৰকাৰে?
সোণোৱাল চৰকাৰৰ দিনত যোৱা ৫ অক্তোবৰত প্ৰতিবন্ধীৰ ওপৰত হোৱা আৰক্ষীৰ আক্ৰমণ “ভাৰতৰ ইতিহাসত প্ৰথম“ বুলি সংস্থাটোৱে কৰা দাবীৰ সৈতে গগৈয়েও শনিবাৰে সহমত পোষণ কৰি ঘটনাথলীত থকা আৰক্ষী বিষয়াৰ শাস্তি দাবী কৰিছিল।
তৰুণ গগৈৰ ১৫ বছৰীয়া শাসনত প্ৰতিবন্ধীৰ ওপৰত এনে অত্যাচাৰ হোৱা নাছিল বুলি উল্লেখ কৰি মালাকাৰে লগতে কয়, “কংগ্ৰেছ চৰকাৰৰ দিনত বছৰি ৬ হাজাৰ টকাকৈ দিয়া হৈছিল যদিও সকলোখিনিয়ে পোৱা নাছিল। যিখিনিয়ে পাবলৈ আৰম্ভ কৰিছিল, সেয়া নিয়মীয়াকৈ পাই আছিল। কিন্তু বিজেপি চৰকাৰে ৫ হাজাৰ টকাকৈ এককালীন সাহায্য, ১ হাজাৰ টকাকৈ মাহেকীয়া হিচাপত দিয়া হ’ব বুলি এতিয়ালৈকে ৪বাৰকৈ প্ৰতিশ্ৰুতি দিলে, কিন্তু একোৱেই হৈ উঠা নাই।”
বিজেপি চৰকাৰৰ স্থিতি আজিৰ নিচিনাই হৈ থাকিলে অহা লোকসভা নিৰ্বাচনত বিজেপিৰ প্ৰতি সমৰ্থন নজনোৱাৰ সিদ্ধান্ত ল’বলৈ বাধ্য হ’ব বুলিও জানিবলৈ দিয়ে প্ৰতিবন্ধী নেতাজনে।
