এইবাৰ ৰাজীৱ ভৱন ঘেৰাও কৰিবলৈ ওলাইছে বিজেপিয়ে। শুনিলে হয়তো আপুনি আচৰিত হ’ব, পোনপ্ৰথমবাৰলৈ শাসকীয় দল প্ৰতিবাদত নামিছে বিৰোধী দলৰ বিৰুদ্ধে।
বুধবাৰে দেশৰ সকলো ৰাজ্যত কংগ্ৰেছ মুখ্য কাৰ্য্যালয়সমূহ ঘেৰাও কৰিব ভাৰতীয় জনতা পাৰ্টীয়ে। সেই উদ্দেশ্যে ৰাজ্যিক বিজেপিৰ নেতা কৰ্মীসকলেও গুৱাহাটীৰ এ বি ছিস্থিত ৰাজীৱ ভৱন ঘেৰাও কৰিব।
কাইলৈ পুৱা ১১ বজাত কংগ্ৰেছৰ ৰাজীৱ ভৱন ঘেৰাও কৰিব শাসকীয় দল বিজেপিৰ নেতা-কৰ্মীসকলে। বিজেপিৰ মেডিয়া আহ্বায়ক দেৱান ধ্ৰুৱজ্যোতি মৰলে নৰ্থ ইষ্ট নাও-ক জানিবলৈ দিয়া মতে কাইলৈ গণেশগুৰিস্থিত গোপাল বড়ো হাইস্কুল খেলপথাৰৰ পৰা ৰাজীৱ ভৱনলৈকে প্ৰতিবাদী সমদল বাহিৰ কৰি সমদলৰ অন্তত অসম প্ৰদেশ কংগ্ৰেছৰ মুখ্য কাৰ্য্যালয় ঘেৰাও কৰিব।
উক্ত প্ৰতিবাদৰ নেতৃত্বত থাকিব ৰাজ্যিক বিজেপিৰ সাধাৰণ সম্পাদক দিলীপ শইকীয়া, সাংগঠনিক সাধাৰণ সম্পাদক ফণীন্দ্ৰ নাথ শৰ্মাৰ লগতে অন্যান্য বিষয়ববীয়াসকল।
‘ৰাজীৱ ভৱন ঘেৰাও’ শীৰ্ষক প্ৰতিবাদী কাৰ্য্যসূচী সন্দৰ্ভত সংবাদ মাধ্যমলৈ প্ৰেৰণ কৰা এক প্ৰেছ বিজ্ঞপ্তিত দলটোৰ সাধাৰণ সম্পাদক দিলীপ শইকীয়াই কয়, ‘ৰাফেল বিমানক কেন্দ্ৰ কৰি কংগ্ৰেছ দলৰ সভাপতি ৰাহুল গান্ধীকে ধৰি সমগ্ৰ কংগ্ৰেছী নেতাই বিজেপি নেতৃত্বাধীন কেন্দ্ৰীয় চৰকাৰৰ বিৰুদ্ধে অভিসন্ধিমূলক অপপ্ৰচাৰ চলাই আহিছে। সেয়েহে কংগ্ৰেছে দেশৰ সৰ্বোচ্চ আইনী প্ৰক্ৰিয়াৰ ওপৰত আস্থা নৰখাৰ প্ৰতিবাদত সমগ্ৰ দেশতে কংগ্ৰেছৰ ৰাজ্যিক মুখ্য কাৰ্য্যালয় ৰাজীৱ ভৱন ঘেৰাও কৰিব ভাৰতীয় জনতা পাৰ্টীয়ে।‘
ইপিনে, ভাৰতীয় জনতা পাৰ্টীৰ প্ৰত্যেক জিলা সমিতিয়ে প্ৰতিবাদী সমদলেৰে জিলা উপায়ুক্তৰ জৰিয়তে ৰাষ্ট্ৰপতিলৈ স্মাৰক পত্ৰ প্ৰদান কৰিব।
প্ৰসংগক্ৰমে উল্লেখ কৰিব পাৰি যে জনতাক আভুৱা ভাঁৰিবলৈ ৰেফেল বিমানক কেন্দ্ৰ কৰি বিজেপি শাসনাধীন প্ৰত্যেক ৰাজ্যৰ মুখ্য মন্ত্ৰীয়ে অন্য ৰাজ্যলৈ গৈ সৰ্বমুঠ ৭০খন সংবাদমেল সম্বোধন কৰিছে। তাৰ পাছতো বিৰোধীৰ বিৰুদ্ধে এনেদৰে প্ৰতিবাদ কৰাটোৱে বিজেপিৰ দুৰ্বলতাকে উদঙাই দিছে।
ইপিনে, মঙ্গলবাৰে ৰাজীৱ ভৱনত এখন সংবাদমেল সম্বোধন কৰি প্ৰাক্তন মন্ত্ৰী প্ৰদ্যুত বৰদলৈকে ধৰি কংগ্ৰেছৰ কেইবাজনো নেতাই দেশজুৰি চৰ্চা অব্যাহত থকা ৰেফেল বিমান ক্ৰয়ৰ ‘কেলেংকাৰি’ৰ বিষয়ে যুটীয়া সংসদীয় কমিটী গঠন কৰাৰ বাবে দাবী জনায়।
