গুৱাহাটী মহানগৰীত আজি দিন দুপৰতে এক বাইক চুৰিৰ ঘটনা সংঘটিত হয়। গুৱাহাটীৰ গড়চুকস্থিত হোটেল ভাৰ্গৱৰ সন্মুখৰ পৰাই চোৰে প্ৰাণজিৎ ৰাজবংশী নামৰ এজন যুৱকৰ লক কৰি ৰখা বাইকখন লৈ উধাও হয়।
ঘটনাৰ বিৱৰণী মতে আজি দিনৰ প্ৰায় ১ বজাত খাৰঘুলিৰ প্ৰাণজিৎ ৰাজবংশীয়ে তেওঁৰ এ এছ ০১ ডি য়ু ০৩২০ নম্বৰৰ আপাচি ২০০ ফ’ৰ ভি বাইকখন হোটেল ভাৰ্গৱৰ সমীপৰ পাৰ্কিং আস্থানত ৰখাই কিবা কামত ৰাষ্ট্ৰীয় ঘাইপথৰ আনটো মূৰে থকা ‘গাৰ্গীয়া টয়টা’লৈ গৈছিল। ইয়াৰ ১৫ মিনিট পিছতে তেওঁ উক্ত স্থানলৈ ঘূৰি আহে যদিও ল’ক কৰি ৰখা বাইকখনক বিচাৰি নাপালে।
উল্লেখযোগ্য যে, বাইকখন ৰখাই ঠোৱাৰ প্ৰায় ২০ খোজ আঁতৰতে দুগৰাকী কৰ্তব্যৰত আৰক্ষী উপস্থিত আছিল যদিও তেওঁলোকৰ সন্মুখৰ পৰাই চোৰে তেওঁৰ বাইকখন লৈ যায় বুলি ভুক্তভোগী যুৱকজনে জানিবলৈ দিয়ে।
পিছত ঘটনা সম্পৰ্কত যুৱকজনে গড়চুক আৰক্ষী থানাত এখন এজাহাৰ দাখিল কৰিছে। মাত্ৰ ৪ মাহ পূৰ্বে যোৱা ১৬ আগষ্টত উক্ত বাইকখন ক্ৰয় কৰিছিল।
