‘অসম চুক্তিৰ আধাৰত ৰাষ্ট্ৰীয় নাগৰিক পঞ্জীৰ কাম-কাজ হ’ব লাগে। অসম চুক্তিক কেৱল এক চুক্তি বুলিব নোৱাৰি। অসম চুক্তিৰ আধাৰত ভাৰতীয় সংবিধানত ৬(ক) অনুচ্ছেদ যোগ হৈছে’। ক্ৰমাগত দ্বিতীয়বাৰৰ বাবে প্ৰদেশ কংগ্ৰেছৰ সভাপতিৰ দায়িত্ব গ্ৰহণ কৰিয়ে ৰিপুন বৰাই আজি ৰাজীৱ ভৱনত এক সংবাদমেলত এন আৰ চিৰ বিষয়ে মত দিবলৈ গৈ অসম চুক্তি সন্দৰ্ভত তাৎপৰ্য্যপূৰ্ণভাৱে এই মন্তব্য কৰে।
যোৱা শুক্ৰবাৰে কংগ্ৰেছৰ কেইগৰাকীমান জ্যেষ্ঠ নেতাই ৰাজ্যৰ ১৩ খন জিলাৰ ২০৮ টা এন আৰ চি সেৱাকেন্দ্ৰত লেহেমীয়া কাম-কাজৰ তদন্ত দাবী কৰি প্ৰতীক হাজেলাক এখন স্মাৰক পত্ৰ প্ৰদান কৰাৰ প্ৰসংগত বৰাই কয়, ‘অৱশ্যে এন আৰ চিৰ প্ৰথম খচৰা্ত কিছু মানুহৰ নামৰ ক্ষেত্ৰত হোৱা ভুলবোৰ মানৱীয় ভুল।’
তদুপৰি ১৯৭১ চনৰ ২৫ মাৰ্চৰ আগত অহা প্ৰত্যেকগৰাকী লোকৰ নাম নাগৰিকপঞ্জীত অন্তৰ্ভুক্ত কৰিবৰ বাবে এন আৰ চি কৰ্তৃপক্ষক তেওঁ আহ্বান জনায়। বৰাই লগতে কয়, ‘যদি কোনো প্ৰকৃত ভাৰতীয়ৰ নাম নাগৰিকপঞ্জীৰ পৰা বাদ পৰি যায় তেন্তে সেইসকলক নাম অন্তৰ্ভুক্ত কৰাৰ ক্ষেত্ৰত কংগ্ৰেছ দলে গণতান্ত্ৰিক পদ্ধতিৰে সহায়-সহযোগিতা আগবঢ়াব।’
বৰাকৰ কংগ্ৰেছ নেতা সুস্মিতা দেব, কমলাক্ষ পুৰকায়স্থ আৰু ছিদ্দিক আহমেদে এন আৰ চিক লৈ কৰা মন্তব্যৰ ক্ষেত্ৰত সাংবাদিকে তেওঁৰ প্ৰতিক্ৰিয়া জানিব বিচৰাত তেওঁ কয় যে, ‘তেওঁলোকে কৰা মন্তব্য সম্পূৰ্ণ নিজাববীয়া। তেওঁলোক কংগ্ৰেছ দলত আছে কিন্তু তেওঁলোকে আৱেগৰ বশৱৰ্তী হৈ এনেকুৱাধৰণৰ মন্তব্য আগবঢ়াইছে আৰু এই ক্ষেত্ৰত কংগ্ৰেছৰ দলটো দায়ী নহয়। অৱশ্যে কংগ্ৰেছ দলৰ সভাপতি, সম্পাদক অথবা দ্বায়িত্বত থকা জ্যেষ্ঠ নেতাই তেনেকুৱা ধৰণৰ বিতৰ্কিত মন্তব্য কৰিলে কংগ্ৰেছ দলটোৱে দায়ী হ’ব।’
আজিৰ সংবাদমেলত ৰিপুন বৰাৰ সৈতে জ্যেষ্ঠ কংগ্ৰেছী নেতা ভূমিধৰ বৰ্মন, শৰৎ বৰকটকী আৰু প্ৰদ্যুৎ বৰদলৈও উপস্থিত আছিল।
