শনিবাৰে অৰ্থাৎ ২২ ডিচেম্বৰত ঐক্য সেনা অসম শিৱসাগৰ জিলা সমিতিৰ উদ্যোগত ৰংপুৰ জ্যোতি ক্লাৱত এখনি ৰাজহুৱা সভা অনুষ্ঠিত হয়। সভাত স্বপ্নালয়ৰ পৰিচালক পৰাগ গোস্বামীক শাস্তি দিয়াৰ লগতে শিৱসাগৰ জিলাত দিনক দিনে বৃদ্ধি পোৱা অপৰাধজনিত কাৰ্য্যকলাপ, মাদক দ্ৰব্য মুক্তভাৱে প্ৰচলন, অবৈধ মদৰ ঘাটিৰ ফলত উঠি অহা যুৱ প্ৰজন্মৰ মাজত অপৰাধ প্ৰৱণতা বৃদ্ধি পোৱা আদি বিষয়ৰ ওপৰত আলোচনা কৰা হয়।
ৰাজহুৱা সভাত অনাথ শিশু গৃহৰ যৌন নিৰ্যাতনৰ মূল অভিযুক্ত পৰাগ গোস্বামীক আটক কৰাৰ দাবীত সৰৱ হৈ উঠিছে বিভিন্ন দল-সংগঠন।
যৌন নিৰ্যাতনৰ বলি হোৱা কিশোৰী গৰাকীয়ে বাৰম্বাৰ ন্যায় বিচাৰি জিলা প্ৰশাসনৰ উচ্চপদস্থ বিষয়াৰ ওচৰত ভাগৰি পৰি জীয়াই থকাৰ হেঁপাহ হেৰুৱাই আত্মহননৰ দৰে পথ বাচি লৈছে। গতিকে সভাখনত উপস্থিত দল-সংগঠনসমূহে বিষয়টো সন্দৰ্ভত সঠিক তদন্ত কৰি শীঘ্ৰে প্ৰকৃত দোষীক কৰায়ত্ত কৰি উচিত শাস্তি প্ৰদান কৰিবলৈ দাবী জনায়।
তাৰোপৰি শিশু কল্যাণ বিভাগটো সম্পূৰ্ণৰূপে ৰাজনৈতিক প্ৰভাৱৰ পৰা মুক্ত হ’ব লাগে বুলিও আলোচনা হয় যাতে বিহিত ব্যৱস্থা গ্ৰহণৰ সময়ত কোনো ধৰণৰ ৰাজনৈতিক হেঁচা পৰিব নোৱাৰে।
লগতে জিলাখনত হৈ থকা অনৈতিক কাৰ্যকলাপ ৰোধ, অবৈধ মদৰ ঘাটি বন্ধ কৰা আদি কাৰ্য্যসমূহ যদি শীঘ্ৰে বন্ধ কৰিবলৈ ব্যৱস্থা নলয় তেন্তে নৱপ্ৰজন্মৰ প্ৰতি ই এক বৃহৎ ভাবুকি হৈ উঠিব। গতিকে সময় থাকোতেই যদি প্ৰশাসনে উচিত ব্যৱস্থা হাতত নলয় তেন্তে এক জংগী আন্দোলনৰ সূচনা কৰিবলৈ বাধ্য হ’ব বুলি ঐক্য সেনা, অসমৰ সম্পাদক ফৰিদ ইছলাম হাজৰিকাই সভাত হুংকৰা দিয়ে।
বিশিষ্ট সমাজকৰ্মী ভাৰতী শইকীয়াই সভানেত্ৰীত্ব কৰা সভাখনত প্ৰায় ১০ টাৰো অধিক জাতীয় দল-সংগঠনৰ নেতাসকল উপস্থিত থাকে।
