দিল্লীৰ যন্তৰ মন্তৰত মুখ্য নিৰ্বাচন আয়ুক্ত জ্ঞানেশ কুমাৰক অপসাৰণৰ দাবীত শুকুৰবাৰে পুৱাৰে পৰা উত্তেজনা সৃষ্টি হৈছে। বিৰোধী দল, ছাত্ৰ সংগঠন আৰু নাগৰিক সংগঠনৰ এটা অংশই এছ আই আৰ বা বিশেষ ব্যাপক সংশোধনৰ জৰিয়তে ভোটাৰ তালিকাৰ পৰিৱৰ্তন আৰু নিৰ্বাচন আয়োগৰ ভূমিকাক লৈ দীৰ্ঘদিন ধৰি প্ৰশ্ন উত্থাপন কৰি আহিছে। ২ অক্টোবৰত দিল্লী আৰক্ষীয়ে এই কাৰ্যসূচীৰ অনুমতি নিদিলেও প্ৰতিবাদকাৰীৰ সমাগম হোৱাৰ আশংকাৰ প্ৰতি লক্ষ্য ৰাখি মধ্য দিল্লীত ব্যাপক নিৰাপত্তাৰ ব্যৱস্থা কৰা হৈছে।
যন্তৰ মন্তৰ আৰু ইয়াৰ আশে-পাশে থকা অঞ্চলত নিষেধাজ্ঞা আৰোপ কৰা হৈছে। দিল্লী আৰক্ষীয়ে বিএনএছএছৰ ১৬৩ ধাৰা জাৰি কৰি অনুমতি অবিহনে সমাৱেশ, শোভাযাত্ৰা, ধৰ্না, শ্লোগান আৰু জনপ্ৰতিবাদ নিষিদ্ধ কৰিছে। আৰক্ষীয়ে জনোৱা মতে, যন্তৰ মন্তৰত শুকুৰবাৰৰ কাৰ্যসূচীৰ বাবে কোনো সংগঠনক অনুমতি দিয়া হোৱা নাই।
এই পৰিস্থিতিত যন্তৰ মন্তৰৰ কাষৰীয়া অঞ্চলত ম’বাইল ইণ্টাৰনেট সেৱা সাময়িকভাৱে বন্ধ বা নিষেধাজ্ঞা আৰোপ কৰা হৈছে বুলি একাধিক বাতৰি প্ৰকাশ পাইছে। এক প্ৰতিবেদনত কোৱা হৈছে যে প্ৰতিবাদস্থলীৰ পৰা প্ৰায় ১.৫ কিলোমিটাৰ ব্যাসাৰ্ধত মাজনিশালৈ মোবাইল ইণ্টাৰনেট সেৱা বন্ধ কৰাৰ সিদ্ধান্ত লোৱা হৈছে। প্ৰশাসনৰ যুক্তি হ’ল জনসাধাৰণৰ সুৰক্ষা আৰু আইন-শৃংখলাৰ পৰিস্থিতি নিয়ন্ত্ৰণত ৰখাৰ বাবে এই পদক্ষেপ।
কেৱল ইণ্টাৰনেট সেৱাই নহয়, দিল্লী মেট্ৰ’ৰ কেইবাটাও ষ্টেচনত কঠোৰ নিষেধাজ্ঞা আৰোপ কৰা হৈছে। যন্তৰ মন্তৰৰ আশে-পাশে থকা পৰিস্থিতিৰ প্ৰতি লক্ষ্য ৰাখি ১১টা মেট্ৰ’ ষ্টেচনৰ প্ৰৱেশ আৰু প্ৰস্থান গেট বন্ধ কৰি দিয়া হৈছে। অৱশ্যে কিছুমান গুৰুত্বপূৰ্ণ ষ্টেচনত যাত্ৰীসকলৰ বাবে যাতায়ত সেৱা মুকলি কৰা হৈছে।
যন্তৰ মন্তৰলৈ যোৱা পথসমূহতো যান-বাহন আৰক্ষীয়ে নিষেধাজ্ঞা আৰোপ কৰিছে। কন’ট প্লেচ, পেটেল চ’ক, জিপিঅ’, টলষ্টয় মাৰ্গ, যন্তৰ মন্তৰ ৰোড, পাৰ্লিয়ামেণ্ট ষ্ট্ৰীটকে ধৰি কেইবাটাও অঞ্চলত ট্ৰেফিক ডাইভাৰ্ট বা নিষিদ্ধ কৰা হৈছে। সাধাৰণ জনতাক অঞ্চলটো পৰিহাৰ কৰি বিকল্প পথ ব্যৱহাৰ কৰিবলৈ পৰামৰ্শ দিয়া হৈছে।
প্ৰতিবাদৰ আহ্বান জনোৱা সংগঠনসমূহৰ ভিতৰত আছে নিখিল ভাৰত ছাত্ৰ সন্থা (AISA)। ৰাজ্যসভাৰ সাংসদ মনোজ ঝা আৰু উচ্চতম ন্যায়ালয়ৰ অধিবক্তা প্ৰশান্ত ভূষণো এই কাৰ্যসূচীৰ সৈতে জড়িত বুলি জানিব পৰা গৈছে। SIR আৰু ভোটাৰ তালিকা সংশোধন প্ৰক্ৰিয়াক লৈ তেওঁলোকৰ আপত্তি আছে। তেওঁলোকৰ অভিযোগ যে ভোটাৰ তালিকাৰ পৰিৱৰ্তনে প্ৰকৃত ভোটাৰৰ অধিকাৰত প্ৰভাৱ পেলাব পাৰে। কিন্তু এই অভিযোগসমূহ ৰাজনৈতিক দল-সংগঠনৰো বক্তব্য হিচাপে দেখা গৈছে।
শুকুৰবাৰে পুৱা দিল্লীত এই প্ৰতিবাদক লৈ প্ৰতিবাদকাৰী আৰু আৰক্ষীৰ মাজত সংঘাতৰ সৃষ্টি হয়। খবৰ অনুসৰি আপৰ দিল্লীৰ সভাপতি সৌৰভ ভৰদ্বাজকে ধৰি একাংশ লোকক আৰক্ষীয়ে আটক কৰিছে। প্ৰতিবাদস্থলীত উপস্থিত হ’বলৈ চেষ্টা কৰা প্ৰতিবাদকাৰীক নিয়ন্ত্ৰণৰ বাবে বেৰিকেড স্থাপন কৰা হৈছে।
ইফালে এই প্ৰতিবাদক কেন্দ্ৰ কৰি এক সুকীয়া ৰাজনৈতিক পৰিসৰো সৃষ্টি হৈছে। ইণ্ডিয়া মিত্ৰজোঁটে ২ অক্টোবৰৰ পৰা ৮ অক্টোবৰলৈ ‘Save Democracy’ কাৰ্যসূচী ঘোষণা কৰিছে। এই কাৰ্যসূচীৰ অধীনত বিভিন্ন স্থানত শোভাযাত্ৰা আৰু বৈঠক আৰু ৬ অক্টোবৰত নিৰ্বাচন আয়োগৰ কাৰ্যালয়ৰ পিনে বিৰোধী সাংসদসকলৰ কাৰ্যসূচীৰ পৰিকল্পনা আছে।
আনহাতে, জ্ঞানেশ কুমাৰৰ পদত্যাগৰ দাবীত ককৰোচ জনতা পাৰ্টিৰ প্ৰতিষ্ঠাপক অভিজিৎ দীপকে এক সুকীয়া আন্দোলনৰ কথা ঘোষণা কৰিছে। দাবীসমূহ পূৰণ নকৰিলে দেশৰ বিভিন্ন প্ৰান্তত প্ৰতিবাদ হ’ব আৰু অক্টোবৰৰ শেষৰ ফালে দিল্লীৰ যন্তৰ মন্তৰত এক বৃহৎ কাৰ্যসূচীৰ আয়োজন কৰা হ’ব বুলিও তেওঁ কয়। বিৰোধীৰ ৬ অক্টোবৰৰ কাৰ্যসূচীৰ অংশ নহয় আৰু পৃথকে পৃথকে নিজাকৈ আন্দোলন চলাব বুলি চিজেপিয়ে জনাইছে।
দিল্লীৰ সমান্তৰালকৈ ২ অক্টোবৰত মুম্বাইৰ শিৱাজী পাৰ্কতো চিজেপিৰ প্ৰতিবাদী কাৰ্যসূচী আছে। প্ৰতিবেদনত প্ৰকাশ পাইছে যে তাত আৰক্ষীয়ে অনুমতি নিদিয়াৰ বাবে সংগঠনটোৱে ‘জেল ভৰো আন্দোলন’ৰ আহ্বান জনাইছে।
এই পৰিস্থিতিত শুকুৰবাৰে দিল্লীৰ প্ৰতিবাদ সন্দৰ্ভত প্ৰশাসনৰ সন্মুখত থকা মূল প্ৰত্যাহ্বান হৈছে আইন-শৃংখলা বজাই ৰখা আৰু যাতায়ত স্বাভাৱিক কৰা। আনহাতে, নিৰ্বাচন আয়োগৰ পদ্ধতি, এছ আই আৰ আৰু ভোটাৰ তালিকা সন্দৰ্ভত অভিযোগৰ উত্তৰ বিচৰাটোৱেই প্ৰতিবাদকাৰীৰ মূল দাবী। ফলত ২ অক্টোবৰৰ কাৰ্যসূচী কেৱল এদিনীয়া প্ৰতিবাদতে সীমাবদ্ধ থাকিব নে আগন্তুক দিনত বৃহৎ ৰাজনৈতিক আন্দোলনৰ ৰূপ ল’ব সেয়া লক্ষণীয় হ’ব।
