গোৱালপাৰা জিলাৰ কৃষ্ণাই আৰক্ষী থানাৰ অন্তৰ্গত পাইকান ছুপাৰ মাৰ্কেটত আজি নিচেই পুৱা এক ভয়ংকৰ পথ দুৰ্ঘটনা সংঘটিত হয় ৷ এই দুৰ্ঘটনাত ৩ জন লোক গুৰুতৰভাৱে আহত হয় ৷ ইয়াৰে এজনৰ অৱস্থা সংকটজনক।
জানিব পৰা মতে, আজি পুৱা ৩৭ নম্বৰ ৰাষ্ট্ৰীয় ঘাই পথত গুৱাহাটী মুখী এ এছ ১৭ জি ৫৫৮৮ নম্বৰৰ মাৰুতি ছুজুকি এখনৰ সৈতে বিপৰীতমুখী এ এছ ১৮ চি ৭৬২৫ নম্বৰৰ টাটা পিক আপ ভান এখনৰ মুখামুখি সংঘৰ্ষ সংঘটিত হয় ৷
উক্ত ভয়ংকৰ দুৰ্ঘটনাটোত মাৰুতি গাড়ীখনৰ সমুখ ভাগ ভাঙি চুচুৰ্মৈ হৈ পৰে। গুৰ্ঘটনাটোৰ ফলত গাড়ীখনত থকা তিনিজন লোক গুৰুতৰভাৱে আহত হয় ৷ আহত লোক কেইজনৰ ঘৰ ধুবুৰীৰ গৌৰীপুৰত বুলি জানিব পৰা হোৱা গৈছে।
উক্ত দুৰ্ঘটনাৰ পাছতে স্থানীয় ৰাইজে লোক দুজনক সংকটজনক অৱস্থাত উদ্ধাৰ কৰি ১০৮ সেৱাৰ গাড়ীৰে চিকিৎসালয়লৈ প্ৰেৰণ কৰে ৷ ইয়াৰে অতি সংকটজনক অৱস্থাত থকা এজনক উন্নত চিকিৎসাৰ বাবে গুৱাহাটীলৈ প্ৰেৰণ কৰা হয়।
শেহতীয়া তথ্য অনুসৰি সংকটজনক অৱস্থাত ভৰ্তি কৰা উজ্জ্বল চক্ৰবৰ্তী নামৰ লোকজনে গুৱাহাটীৰ এখন চিকিৎসালয়ত শেষ নিশ্বাস ত্যাগ কৰিছে।
