নিজৰ প্ৰাপ্যৰ দাবীত দিব্যাংগসকলৰ লগতে সমাজৰ বিভিন্ন অংশৰ লোকে ৰাজপথলৈ ওলাব লগা হোৱাৰ সময়তে এইবাৰ বয়োবৃদ্ধ মুক্তি যুঁজাৰুসকলো সোণোৱাল চৰকাৰৰ বিৰুদ্ধে গণ সত্যাগ্ৰহ কাৰ্য্যসূচী ল’বলৈ আগ বাঢ়িছে।
মুক্তি যুঁজাৰুসকলে আজি গুৱাহাটী প্ৰেছ ক্লাবত এখন সংবাদমেল দি সোণোৱাল চৰকাৰৰ বিৰুদ্ধে প্ৰতাৰণাৰ অভিযোগ আনে। চৰকাৰখনে প্ৰতিশ্ৰুতি দিও ৰক্ষা নকৰাৰ অভিযোগ তোলে বয়োবৃদ্ধ মুক্তি যুঁজাৰু সকলে।
সংবাদমেলখনত অসম ৰাজ্যিক মুক্তি যুঁজাৰু সন্মিলনৰ সভাপতি কৃষ্ণ লহকৰে কয় যে অহা ২১ জানুৱাৰিৰ ভিতৰত চৰকাৰে মুক্তিযুঁজাৰুসকলৰ দাবীসমূহ পূৰণ নকৰিলে তাৰ পাছৰ দিনা অৰ্থাৎ ২২ জানুৱাৰিৰ দিনা অসম সচিবালয়ৰ সন্মুখত ৰূপায়ণ কৰিব গণ সত্যাগ্ৰহ কাৰ্যসূচী।
“পূৰ্বতে ব্ৰিটিছে আমাৰ ওপৰত শোষণ-অত্যাচাৰ চলাইছিল, এতিয়া চৰকাৰে আমাৰ ওপৰত অত্যাচাৰ চলাইছে।” সংবাদমেলত লহকৰে কয়।
উল্লেখযোগ্য যে, যোৱা ১৮ ছেপ্তেম্বৰৰ দিনা মুখ্য মন্ত্ৰী সোণোৱালক সাক্ষাৎ কৰি অসম ৰাজ্যিক মুক্তি যুঁজাৰু সন্মিলনে ১৬ দফীয়া দাবী চনদ দিছিল যদিও চৰকাৰে কাৰ্যকৰী ব্যৱস্থা গ্ৰহণ নকৰিলে। অথচ প্ৰতিশ্ৰুতি দিছিল ৰূপায়ণ কৰাৰ বাবে।
সংবাদমেলত অসম ৰাজ্যিক মুক্তি যুঁজাৰু সন্মিলনে প্ৰকাশ কৰামতে, মুক্তিযুঁজাৰুসকলৰ দাবীসমূহৰ ভিতৰত অন্যতম হ’ল মুক্তিযুঁজাৰুসকলে বৰ্তমান লাভ কৰি থকা ২০ হাজাৰ টকাৰ মাহিলি পেন্সন ৪০ হাজাৰ টকালৈ বৃদ্ধি কৰা। লহকৰে জনোৱামতে, এইক্ষেত্ৰত সোণোৱাল চৰকাৰে লিখিত প্ৰতিশ্ৰুতি দিছিল যদিও যোৱা ১৭ ডিচেম্বৰৰ কেবিনেট বৈঠকত মাত্ৰ ১০০০ টকাকৈহে বৃদ্ধি কৰে।
ইয়াৰোপৰি, মুক্তিযুঁজাৰু পৰিয়ালৰ সতি-সন্ততিৰ চাকৰি আৰু উচ্চ শিক্ষা গ্ৰহণৰ ক্ষেত্ৰত মাত্ৰ ২ শতাংশহে আসন আছে। এই হাৰ চাকৰিৰ ক্ষেত্ৰত ১০ শতাংশ আৰু উচ্চ শিক্ষা গ্ৰহণৰ ক্ষেত্ৰত ১৫ শতাংশলৈ বৃদ্ধি কৰাৰ বাবে দাবী জনায় অসম ৰাজ্যিক মুক্তি যুঁজাৰু সন্মিলনে।
আনহাতে, পূৰ্বৰ চৰকাৰে দিয়া এটা নিৰ্দেশনা অনুসৰি চৰকাৰী চিকিৎসালয়ত মুক্তিযুঁজাৰু আৰু সতি-সন্ততিৰ চিকিৎসা বিনামূলীয়া হ’ব লাগে। কিন্তু এই নিয়ম আজি পৰ্যন্ত বলৱৎ হোৱা নাই বুলি অভিযোগ তোলে মুক্তিযুঁজাৰু সন্মিলনে।
ইপিনে বৰ্তমানৰ ৰাজ্য চৰকাৰে অসম আন্দোলনপ চহিদৰ পৰিয়াললৈ দিয়াৰ দৰে মুক্তিযুঁজাৰুসকলৰ পৰিয়াললৈও ৫ লাখ টকাকৈ দিয়া হ’ব বুলি আশ্বাস দিছিল। কিন্তু সেই আশ্বাস আশ্বাসেই হৈ ৰ’ল।
এই সন্দৰ্ভত প্ৰতিক্ৰিয়া প্ৰকাশ কৰি সন্মিলনৰ সভাপতি লহকৰে কয় “অসমৰ সৰহ সংখ্যক মুক্তিযুঁজাৰুৰ পৰিয়াল দুখীয়া আৰু দুৰ্দশাগ্ৰস্ত। মুক্তি যুঁজাৰু পৰিয়ালৰ নিবনুৱা সতি-সন্ততিক ৫ লাখ টকাকৈ এককালীন সাহায্য প্ৰদানৰ ব্যৱস্থা গ্ৰহণ কৰিব লাগে।”
উপৰোক্ত দাবীকেইটাৰ লগতে মুঠ ১৫টা দাবী অহা ২১ জানুৱাৰিৰ ভিতৰত পূৰণৰ ব্যৱস্থা গ্ৰহণ কৰিবলৈ চৰকাৰক দাবী জনাইছে অসম ৰাজ্যিক মুক্তি যুঁজাৰু সন্মিলনে। অন্যথা সোণোৱাল সন্মুখীন হ’ব লাগিব বৃয়োবৃদ্ধ মুক্তিযুঁজাৰুসকলৰ গণ সত্যাগ্ৰহৰ।
