যোৰহাটৰ থকা উত্তৰ-পূব বিজ্ঞান আৰু প্ৰযুক্তিবিদ্যা প্ৰতিষ্ঠানৰ(নেইষ্ট) সঞ্চালক পদক লৈ অসমীয়া বিৰোধী চক্ৰই আৰম্ভ কৰিছে এক ষড়যন্ত্ৰ। এই উচ্চ শিক্ষা প্ৰতিষ্ঠানটোত দীৰ্ঘ দিন ধৰি আধিপত্য বৰ্তাই ৰখা তেলেগু চক্ৰটোৱে এইবাৰো তেওঁলোকৰ এগৰাকী পচন্দৰ তেলেগু ব্যক্তিক সঞ্চালকৰ পদটোত অধিষ্ঠিত কৰোৱাৰ প্ৰচেষ্টা অব্যাহত ৰাখিছে।
জানিব পৰা মতে, নেইষ্টৰ সঞ্চালক পদটোৰ বাবে আজি সাক্ষাৎকাৰ অনুষ্ঠিত হ’ব। কিন্তু চক্ৰান্তমূলকভাৱে এই সাক্ষাৎকাৰলৈ বহুকেইজন অসমীয়া প্ৰাৰ্থীক নিমন্ত্ৰণ নকৰাৰ অভিযোগ উঠিছে। তদুপৰি, উক্ত পদটোত এটা শক্তিশালী চক্ৰই অনিয়মত লিপ্ত হৈ নিজৰ লোকক সঞ্চালক পদত বহুৱাবৰ বাবে উঠিপৰি লাগিছে।
উল্লেখযোগ্য যে যোৱা ৯ এপ্ৰিলত সঞ্চালক পদটোৰ বাবে আৱেদন-পত্ৰ আহ্বান কৰা হৈছিল। তদুপৰি, ১৫ মে’ আৱেদন দাখিলৰ শেষ দিন ধাৰ্য কৰা হৈছিল। কিন্তু এই সময়সীমা উকলি যোৱাৰ পাছত হঠাতে কৰ্তৃপক্ষই নতুন বিজ্ঞাপনৰ যোগেদি আৱেদন কৰাৰ অন্তিম দিন ১৫ জুলাইলৈ বঢ়াই দিয়ে। ইয়াৰ ফলত পদটোৰ বাবে দাখিল কৰা আৱেদনসমূহ পৰীক্ষা কৰি সাক্ষাৎকাৰ আয়োজন কৰালৈকে এতিয়া ছমাহ সময় পাৰ হৈ গ’ল। এইদৰে বিগত ছমাহ ধৰি নিয়মীয়া সঞ্চালক নোহোৱাকৈয়ে চলি আছে এই উচ্চ শিক্ষা প্ৰতিষ্ঠানটো।
ইপনে আজি অনুষ্ঠিত হ’বলগীয়া সাক্ষাৎকাৰৰ বাবে নিমন্ত্ৰণ জনোৱা প্ৰাৰ্থীসকলৰ মাজৰ একাংশৰ যোগ্যতাক লৈও প্ৰশ্ন উত্থাপিত হৈছে। অসমীয়া বিৰোধী চক্ৰটোৱে সঞ্চালকৰ পদটোৰ বাবে প্ৰক্ষেপ কৰা বুলি সাক্ষাৎকাৰৰ পূৰ্বেই চৰ্চিত তেলেগু প্ৰাৰ্থীগৰাকীৰ ব্যাৱহাৰিক অভিজ্ঞতা কম বুলি জানিব পৰা গৈছে।
আনহাতে, যোৰহাটৰ নেইষ্ট অনা অসমীয়া বিশেষকৈ তেলেগু চক্ৰৰ দ্বাৰা পৰিচালিত হৈ অহাৰ অভিযোগ দীৰ্ঘদিনীয়া। প্ৰতিষ্ঠানটোৰ সঞ্চালক পদত বৰ্তমানলৈকে অধিষ্ঠিত হোৱা লোকসকলৰ নামসমূহেই এই কথাৰ প্ৰমাণ দাঙি ধৰে। আনকি নেইষ্টতে অসমীয়া যোগ্য ব্যক্তি থকাৰ পাছতো শক্তিশালী অনা অসমীয়া চক্ৰই এইক্ষেত্ৰত সদায়ে বাধা আৰোপ কৰি আহিছে। যোৱা ত্ৰিশ জুনত অৱসৰ গ্ৰহণ কৰা ড০ ৰামায়াৰ দিনত নিযুক্তি লাভ কৰা লোকসকলৰ অধিকাংশই লোকেই আছিল অনা অসমীয়া লোক।
প্ৰতিষ্ঠানটোত অনা অসমীয়া চক্ৰটো ইমানেই শক্তিশালী হৈ পৰিছে যে তেওঁলোকে প্ৰতিষ্ঠানটোত কৰ্মৰত অসমীয়া লোকসকলক প্ৰাপ্ৰ্য অধিকাৰৰ পৰা বঞ্চিত কৰিও ৰাখিছে। আনকি অসমীয়া বিজ্ঞানীৰ পদোন্নতিও উক্ত লবীটোৱে বন্ধ কৰি ৰখাৰ অভিযোগ উঠিছে।
এবাৰ মাত্ৰ অসমীয়া এগৰাকী অসমীয়া লোকক সঞ্চালক হিচাপে নিযুক্তি দিয়া হৈছিল। ইয়াৰ বাহিৰে সদায়ে যোৰহাট নেইষ্টত বাহিৰৰ লোকেই সঞ্চালকৰ পদত নিযুক্তি লাভ কৰি আহিছে। অসমত যোগ্য লোক থকাৰ পাছতো তেওঁলোক সদায়ে অনা অসমীয়া শক্তিশালী চক্ৰৰ বাবে বঞ্চিত হৈ আহিছে।
নেইষ্টৰ সঞ্চালকৰ পদত এজন অসমীয়াক নিযুক্তিৰ ক্ষেত্ৰত জাতীয় দল-সংগঠনসমূহেও নীৰৱ ভূমিকা পালন কৰি আহিছে।
