বগীবিল দলঙৰ নাম নিজৰ নিজৰ জাতীয় নায়কৰ নামেৰে ৰখাৰ দাবীত বিভিন্নটা দল-সংগঠনে আন্দোলন-প্ৰতিবাদী কাৰ্য্যসূচী লৈ অহাৰ সময়তে সকলোকে হতাশ কৰি কেন্দ্ৰীয় ৰে’ল মন্ত্ৰী পীয়ুষ গোয়েলে স্পষ্ট কৰিছে যে বগীবিল দলঙৰ নাম বগীবিলেই থাকিব। ২৯ ডিচেম্বৰত অসমলৈ অহা কেন্দ্ৰীয় মন্ত্ৰীজনে বগীবিল দলঙৰ কোনো নতুন নামকৰণ নহয় বুলি সাংবাদিকৰ আগত জানিবলৈ দিছে।
‘বগীবিল দলং বগীবিল বুলিয়েই পৰিচিত হৈ থাকিব। অসমৰ ৰাইজে দলংখনক বগীবিল দলং বুলিয়েই আঁকোৱালি লওক।’ পীয়ুষ গোয়েলে এইদৰে কয়।
কেন্দ্ৰীয় মন্ত্ৰীজনে ২৯ ডিচেম্বৰত গুৱাহাটীৰ দাঁতিকষৰীয়া সোণাপুৰৰ টেপেচিয়াস্থিত লক্ষ্মীবাঈ ৰাষ্ট্ৰীয় শাৰীৰিক শিক্ষণ প্ৰতিষ্ঠানত চলি থকা ২১ সংখ্যক ৰাষ্ট্ৰীয় জনজাতি ক্ৰীড়া সমাৱেশত ভাগ লয়। তাৰ পিছতে তেওঁ হেঙেৰাবাৰীস্থিত ৰাজ্যিক বিজেপিৰ মুখ্য কাৰ্য্যালয়লৈ যায় আৰু দলীয় নেতাসকলৰ সৈতে এখন বৈঠকত মিলিত হয়। তেওঁ দলংখনে সামৰিক আৰু অৰ্থনৈতিক উভয় দিশতে গুৰুত্বপূৰ্ণ ভূমিকা ল’ব বুলি মন্তব্য কৰে।
উল্লেখযোগ্য যে অসমৰ কেইবাটাও দল-সংগঠন আৰু জনগোষ্ঠীয়ে নিজৰ নিজৰ ঐতিহাসিক চৰিত্ৰৰ নামত দলংখনৰ নামকৰণৰ বাবে দাবী-আন্দোলন চলাই অহাৰ পৰিপ্ৰেক্ষিতত কেন্দ্ৰীয় ৰে’ল মন্ত্ৰীজনৰ এই ঘোষণাই বিশেষ তাৎপৰ্য্য বহন কৰিছে।
আনহাতে চুতীয়াসকলৰ বীৰাংগনা সতী সাধনীৰ নামেৰে দলংখনৰ নাম সতী সাধনী সেতু ৰাখিবলৈ আহ্বান জনাই ৰাজ্যৰ পৰিবহণ বিভাগে ৰে’ল বিভাগলৈ পত্ৰ প্ৰেৰণ কৰা বুলিও জানিব পৰা গৈছিল। কেন্দ্ৰীয় ৰে’ল মন্ত্ৰীজনৰ ঘোষণাই এই প্ৰস্তাৱকো নসাৎ কৰিলে।
আনহাতে দলংখনৰ নামকৰণ যোৱা ২৫ ডিচেম্বৰত প্ৰধান মন্ত্ৰী মোদীয়ে উদ্বোধনৰ সময়তে কৰা হ’ব বুলি আশা কৰি থকাসকলকো হতাশ কৰিছিল প্ৰধান মন্ত্ৰী মোদীয়ে। দলংখনৰ নামকৰণ নকৰাকৈয়ে উদ্বোধন কৰিছিল মোদীয়ে, যিটো ঢলা-শদিয়া দলঙৰ বিপৰীত উদাহৰণ।
কেন্দ্ৰীয় চৰকাৰৰ এই স্থিতিৰ পিছত অসমত দলংখনৰ নামকৰণক কেন্দ্ৰ কৰিয়েই যি অৰিয়াঅৰি তথা পাৰস্পৰিক বিদ্বেষৰ ভাব দেখা গৈছিল, সেইবোৰ লজ্জাৰ উদাহৰণত পৰিণত হোৱা বুলিব পাৰি।
ইয়াৰ পিছত দলঙৰ নাম নিজৰ ঐতিহাসিক চৰিত্ৰৰ নামত দিয়াৰ বাবে এতিয়াও আন্দোলন চলাই থকা দল-সংগঠনবোৰৰ স্থিতি কি হয় সেয়া লক্ষণীয় হ’ব।
