অসমবাসীৰ লগতে সমগ্ৰ উত্তৰ-পূবৰ বিৰোধিতা সত্ত্বেও আজি নাগৰিকত্ব সংশোধনী বিধেয়ক, ২০১৬-ত কেন্দ্ৰীয় কেবিনেটে অনুমোদন জনায়। আজি ইয়াৰ বাবে গঠিত যুটীয়া সংসদীয় সমিতিয়ে বিধেয়কখনৰ সপক্ষে প্ৰতিবেদন দাখিল কৰাৰ পিছতে কেবিনেটে সেইখনত অনুমোদন জনায়।
কাইলৈ সংসদৰ চলিত অধিৱেশনৰ অন্তিম দিন। গতিকে কাইলৈ লোকসভাত বিধেয়কখন গৃহীত কৰাৰ চেষ্টা চলাব শাসক দল বিজেপিয়ে। জনতাৰ স্তৰত বিধেয়কখনৰ তীব্ৰ বিৰোধিতাৰ উপৰি কেইবাটাও দলৰ বিৰোধিতা সত্ত্বেও বিজেপিয়ে বিধেয়কখন গৃহীত কৰিবলৈ যি তৎপৰতা দেখুৱাইছে তাৰ পৰা অনুমান কৰিব পাৰি যে বিজেপিয়ে ইয়াক যিকোনো প্ৰকাৰে আইনত পৰিণত কৰিবলৈ বদ্ধপৰিকৰ।
উল্লেখযোগ্য যে লোকসভাত বিধেয়কখন সহজেই পাছ হোৱাৰ সম্ভাৱনা অতি প্ৰবল। কিয়নো লোকসভাত বিজেপিৰ সংখ্যাগৰিষ্ঠতা আছে। অৱশ্যে ৰাজ্যসভাত বিধেয়কখন প্ৰত্যাহ্বানৰ সন্মুখীন হোৱাৰ সম্ভাৱনা আছে। ৰাজ্যসভাত শাসক দলৰ সংখ্যাগৰিষ্ঠতা নাই।
ইপিনে আজি বিধেয়কখনত কেন্দ্ৰীয় কেবিনেতে অনুমোদন জনোৱাৰ লগে লগে আঞ্চলিক দল অগপই পূৰ্বে কোৱাৰ দৰে অসমত বিজেপিৰ সৈতে মিত্ৰতা ভংগ কৰিছে। কিন্তু প্ৰশ্ন উঠিছে তেওঁলোকৰ এই মিত্ৰতা ভংগই কিমান কাম দিব পাৰে? যদিহে বিধেয়কখন দুয়ো সদনত পাছ হৈ যায়, তেতিয়া অগপৰ মিত্ৰতা ভংগৰ পৰা একো লাভ অসমৰ ৰাইজে পাবলৈ সক্ষম নহ’ব।
এনে ক্ষেত্ৰত কেৱল আদালতহে থাকিবগৈ বিধেয়কখনৰ বিৰুদ্ধে যুঁজ দিয়াৰ ঠাই। ধৰ্মীয় অনুকম্পাৰ ভিত্তিত নাগৰিকত্ব দিয়াটো যিহেতু সংবিধানৰ বৈশিষ্ট্যৰ পৰিপন্থী, আদালতত ইয়াক প্ৰত্যাহ্বান জনাব পৰা যাব।
প্ৰসংগক্ৰমে উল্লেখ কৰিব পাৰি যে আজি যুটীয়া সংসদীয় সমিতিৰ অধ্যক্ষ ৰাজেন্দ্ৰ আগৰৱালে দাখিল কৰা ৪৪০ পৃষ্ঠাজোৰা চূড়ান্ত প্ৰতিবেদনখনত সমিতিৰ বিৰোধী সদস্যসকলে কৰা সংশোধনীৰ প্ৰস্তাৱবোৰক গুৰুত্ব দিয়া হোৱা নাই।
