মিত্ৰজোঁটৰ চৰকাৰৰ পৰা অগপ ওলাই অহাৰ পাছতেই সৰ্বানন্দ সোণোৱাল নেতৃত্বাধীন চৰকাৰখন নীতিগত কাৰণত ভংগ কৰাৰ দাবী জনাইছে প্ৰাক্তন মুখ্য মন্ত্ৰী তথা অসম গণ পৰিষদৰ জ্যেষ্ঠ নেতা প্ৰফুল্ল কুমাৰ মহন্তই।
মঙলবাৰে দিচপুৰৰ হোটেল ৰাজধানী ৰিজেন্সিত এখন সংবাদমেল অনুষ্ঠিত কৰি প্ৰাক্তন মুখ্য মন্ত্ৰীগৰাকীয়ে এই দাবী উত্থাপন কৰে।
কেৱল ইমানেই নহয়, বিজেপিক ‘সাহস আছে যদি পুনৰ নিৰ্বাচনৰ মুখামুখি হওক’ বুলি তেওঁ প্ৰত্যাহ্বান জনায়।
“প্ৰাক্ নিৰ্বাচনী বুজাবুজিৰ জৰিয়তে গঠন কৰা এই মিত্ৰজোঁটৰ চৰকাৰখনৰ পৰা অংশীদাৰ অসম গণ পৰিষদে অংশীদাৰইত্ব ছেদ কৰাৰ পাছত নীতিগতভাৱে সেইখন চৰকাৰ শাসনত থকাৰ কোনো অধিকাৰ নাই”, প্ৰফুল্ল মহন্তই কয়।
তেওঁ লগতে বিজেপিক এই প্ৰত্যাহ্বান গ্ৰহণ কৰি পুনৰ নিৰ্বাচনেৰে এখন চৰকাৰ গঠন কৰি দেখুৱাবলৈ আহ্বান জনায়।
বিজেপি মন্ত্ৰী-বিধায়কসকলে সততে ‘বিজেপি চৰকাৰ’ বুলি কৈ থকাৰ বিপৰীতে এই চৰকাৰখন প্ৰকৃততে ‘সন্মিলিত চৰকাৰ’ বা ‘মৰ্চা চৰকাৰ’-এহে অসমত শাসন কৰি আছিল বুলি কোৱাৰ উপৰি অগপ আৰু বিপিএফৰ সৈতে মিত্ৰতা নকৰাকৈ বিজেপিয়ে কেৱল নিজৰ বলেৰে চৰকাৰ গঠন কৰাৰ ক্ষমতা নাছিল বুলি প্ৰাক্তন মুখ্য মন্ত্ৰী মহন্তই মন্তব্য কৰে।
একেদৰে এই চৰকাৰখনে ‘সন্মিলিত চৰকাৰ’ৰ নীতি-আদৰ্শ ভংগ কৰি আহাৰ অভিযোগ কৰি ‘বিজেপিয়ে সকলো সিদ্ধান্ত নিজাববীয়াকৈ গ্ৰহণ কৰি অংশীদাৰী দলসমূহৰ ওপৰত সেইবোৰ জাপি দিবলৈ চেষ্টা কৰি আহিছে’ বুলিও মহন্তই মন্তব্য কৰে।
ইপিনে, নাগৰিকত্ব সংশোধনী বিধেয়কৰ প্ৰসংগত বিজেপিয়ে কৈ অহা চুবুৰীয়া ৰাষ্ট্ৰ পাকিস্তান আৰু বাংলাদেশত হিন্দু, শিখ বৌদ্ধসকল নিৰ্যাতনৰ বলি হৈ অহা কথাকো উভতি ধৰে প্ৰাক্তন মুখ্য মন্ত্ৰী প্ৰফুল্ল মহন্তই।
তেওঁ এই দেশ দুখনৰ পৰা কিমান হিন্দু, শিখ, বৌদ্ধ আদি ধৰ্মৰ লোক ধৰ্মীয় নিৰ্যাতনৰ বলি হৈ ভাৰতত আশ্ৰয় লৈ থাকিব লগীয়া হৈছে সেই তথ্য দাঙি ধৰিবলৈ বিজেপি নেতৃত্বাধীন কেন্দ্ৰীয় চৰকাৰক দাবী জনায়।
