বিতৰ্কিত নাগৰিকত্ব সংশোধনী বিধেয়কখনৰ বিৰোধিতাত সমগ্ৰ উত্তৰ-পূবৰ জনগণক ঐক্যবদ্ধ ৰূপত আন্দোলন কৰা দেখা গ’ল ৮ জানুৱাৰিৰ উত্তৰ-পূব বন্ধৰ জৰিয়তে। উত্তৰ-পূবৰ বিভিন্ন ছাত্ৰ সংগঠনৰ উমৈহতীয়া মঞ্চ, নেছ’ই বিধেয়কখনৰ বিৰোধিতাত আহ্বান জনোৱা উত্তৰ-পূব বন্ধৰ সৰ্বাত্মক প্ৰভাৱ পৰা দেখা গ’ল উত্তৰ-পূবৰ প্ৰায় আটাইকেইখন ৰাজ্যতে।
বিজেপি শাসিত অসমত এই বন্ধ সৰ্বাত্মক হোৱাৰ লগতে বিজেপিশাসিত মণিপুৰ, ত্ৰিপুৰা আৰু বিজেপি শাসনৰ অংশীদাৰ হৈ থকা মেঘালয়, নাগালেণ্ডতো এই বন্ধ সৰ্বাত্মক হোৱা দেখা গ’ল।
বন্ধৰ সময়ত অসমৰ লগতে, ত্ৰিপুৰা, মণিপুৰ আৰু মেঘালয়তো প্ৰচুৰ হিংসাত্মক ঘটনা ঘটে। অসমত গোলাঘাট আৰু ডিব্ৰুগড়ত বন্ধৰ সমৰ্থকে বিজেপিৰ কাৰ্য্যালয়ত আক্ৰমণ আৰু অগ্নিসংযোগ কৰে। আনহাতে ত্ৰিপুৰাত আৰক্ষীৰ সৈতে হোৱা সংঘৰ্ষত প্ৰায় ১৮জন লোক আহত হয়। পশ্চিম ত্ৰিপুৰাত খুমলুঙত আৰক্ষীয়ে প্ৰতিবাদকাৰীৰ ওপৰত গুলীচালনা কৰাৰ ফলত ৬জনকৈ লোক আহত হয়। ইয়াৰে ২জনৰ অৱস্থা সংকটজনক বুলি জানিব পৰা গৈছে।
আনহাতে মেঘালয়তো দুই-এঠাইত বিক্ষিপ্ত ঘটনা ঘটে আৰু বন্ধৰ সমৰ্থকে পথত টায়াৰ জ্বলোৱাৰ লগতে দুই-এখন গাড়ীত আক্ৰমণ কৰাৰ বাতৰি পোৱা গৈছে। শ্বিলঙৰ ৰাজপথ আছিল প্ৰায় জনশূন্য। একেদৰেই নাগালেণ্ডৰ বাট-পথো আছিল ব্যতিক্ৰমভাৱে উকা। ৰাজপথত শিশুসকলক ক্ৰিকেট খেলা দেখা গৈছিল।
অৰুণাচল প্ৰদেশত নেছ’ৰ উপৰি সদৌ অৰুণাচল প্ৰদেশ ষ্টুডেণ্টছ য়ুনিয়নেও বিধেয়কখনৰ বিৰোধিতাত বন্ধৰ আহ্বান কৰিছিল। ফলত বন্ধৰ সময়ছোৱাত স্বাভাৱিক জনজীৱন ব্যাহত হৈ পৰে ৰাজ্যখনত।
উল্লেখযোগ্য যে উত্তৰ-পূবৰ আটাইবোৰ ৰাজ্যৰ জনগণে একেটা বিষয়ক লৈ ঐক্যবদ্ধভাৱে আন্দোলন কৰা এই ঘটনা বিৰলপ্ৰায়। কিন্তু দুখৰ বিষয় যে উত্তৰ-পূবৰ জনগণৰ তীব্ৰ বিৰোধিতা সত্ত্বেও কেন্দ্ৰীয় চৰকাৰেৰ কেবিনেটে দুবাৰ নভবাকৈ বিধেয়কখনত অনুমোদন জনোৱাৰ লগতে লোকসভাতো নিজৰ সংখ্যাগৰিষ্ঠতাৰ জোৰত পাছ কৰায়।
ইপিনে বিধেয়কখন কেবিনেটত অনুমোদন জনোৱাৰ পিছতে অসমত বিজেপিৰ সৈতে মিত্ৰতাৰে চৰকাৰৰ অংশীদাৰ হৈ থকা অগপই মিত্ৰতা ছেদ কৰে। মেঘালয়তো কনৰাড চাংমাই মিত্ৰ বিজেপিৰ প্ৰতি নিজৰ অসন্তুষ্টি ইতিমধ্যে ৰাজহুৱা কৰিছে।
