বোকাখাতৰ প্ৰাক্তন বিধায়ক জিতেন গগৈৰ বাসগৃহত এখন শিল ভঙা এক্সেভেটৰ আৰু গগৈৰ পুতেকক বিচাৰি দিচপুৰ আৰক্ষীয়ে আজি এক বিশেষ অভিযান চলায়।
উল্লেখযোগ্য যে গুৱাহাটীৰ চচলৰ নিৱাসী অক্ষয় হজুৰী নামৰ এজন ব্যৱসায়ীৰ পৰা এখন এক্সেভেটৰ তিনিমাহৰ চুক্তিৰে লৈছিল প্ৰাক্তন বিধায়ক জিতেন গগৈৰ পুত্ৰ জ্ঞানদ্বীপ গগৈয়ে। কিন্তু মন কৰিবলগীয়া যে কিছুদিনৰ পিছত ব্যৱসায়িক চুক্তি অমান্য কৰাৰ উপৰিও এক্সেভটৰৰ চালক আৰু হেণ্ডিমেনক প্ৰাক্তন বিধায়ক পুত্ৰ জ্ঞানদ্বীপে খেদি পঠায়।
ফলত গুৱাহাটী নিৱাসী অক্ষয় হজুৰীয়ে এক্সেভেটৰখন উদ্ধাৰৰ বাবে দিচপুৰ থানাত জ্ঞানদ্বীপ গগৈৰ বিৰুদ্ধে ৩৯৪৬/১৮ নম্বৰত গোচৰ ৰুজু কৰে। আৰু শনিবাৰে নিশা এই গোচৰৰ আধাৰতে দিচপুৰ আৰক্ষীয়ে জিতেন গগৈৰ বাসগৃহত তালাচী অভিযান চলায়।
কিন্তু শনিবাৰে জিতেন গগৈ আৰু তেওঁৰ পুত্ৰ জ্ঞানদ্বীপ গগৈ বাসগৃহত নথকাৰ বাবে আজি অভিযানকাৰী দলে অভিযোগকাৰী অক্ষয় হজুৰীক লৈ পুনৰ বোকাখাতৰ বিজুলীত থকা জিতেন গগৈৰ চাহ বাগিচাৰ বাসগৃহলৈ যায়।
উল্লেখযোগ্য যে বাগিচাৰ বাসগৃহত আৰক্ষীৰ উপস্থিতিতে জিতেন গগৈয়ে অক্ষয় হজুৰীক আৱদ্ধ কৰি শাৰীৰিকভাৱে অপদস্থ কৰে। পিছত বোকাখাত আৰক্ষীৰ সহযোগত দিচপুৰ আৰক্ষীয়ে জিতেন গগৈৰ কৱলৰ পৰা অক্ষয় হজুৰীক উদ্ধাৰ কৰে। ঘটনা সন্দৰ্ভত বোকাখাত থানাত জিতেন গগৈৰ বিৰুদ্ধে এজাহাৰ দাখিল কৰে অক্ষয় হজুৰীয়ে।
ইপালে অক্ষয় হজুৰীৰ এক্সেভেটৰ খন কাজিৰঙাৰ গেলেকীৰ পৰা অভিযানকাৰী দলে উদ্ধাৰ কৰে যদিও কিছু যন্ত্ৰাংশৰ লগতে দুটাকৈ বেটাৰীৰ সন্ধান উলিয়াব নোৱাৰিলে লগতে জ্ঞানদ্বীপ গগৈৰো কোনো সন্ধান লাভ নকৰিলে আৰক্ষীয়ে।
