নাগৰিকত্ব সংশোধনী বিধেয়কৰ বাবেই বিজেপিৰে মিত্ৰতা ছেদ কৰা অসম গণ পৰিষদ দলে আগন্তুক দিনত বিধেয়কখনৰ বিৰুদ্ধে ৰাজ্যজুৰি ব্যাপক প্ৰতিবাদী কাৰ্যসূচী গ্ৰহণ কৰাৰ সিদ্ধান্ত লৈছে। ১৩ জানুৱাৰীৰ নিশা দলৰ সভাপতি অতুল বৰাৰ সভাপতিত্বত অনুষ্ঠিত হোৱা এখন জৰুৰী সভাত এই সিদ্ধান্ত গ্ৰহণ কৰা হয়।
সভাৰ সিদ্ধান্ত অনুসৰি দলে অহা ১৮ জানুৱাৰীত প্ৰতিটো সমষ্টিতে সমষ্টি সমিতিসমূহৰ উদ্যোগত জোঁৰ সমদল, ২৪ জানুৱাৰীত দলৰ বিধায়কসকলে গুৱাহাটীত ১০ ঘন্টীয়া অনশন কাৰ্যসূচী ৰূপায়ন কৰাৰ লগতে ৩০ জানুৱাৰীত দলৰ প্ৰতিখন জিলা সমিতিয়ে জিলা আৰু মহকুমা সদৰ স্থানত প্ৰতিবাদী সমদল উলিয়াই বিধেয়ক বাতিলৰ দাবীত প্ৰতিবাদ সাব্যস্ত কৰিব।
ইয়াৰ উপৰি অগপ নেতৃত্বই এই জাতিধ্বংসী বিধেয়কখনৰ বিৰুদ্ধে ৰাষ্ট্ৰীয় পৰ্যায়তো জনমত গঠন কৰাৰ প্ৰচেষ্টা অব্যাহত ৰখাৰ সিদ্ধান্ত গ্ৰহন কৰিছে।
উল্লেখ্য যে এই বিধেয়কখন উত্থাপন হোৱাৰে পৰা অগপ দলে জনসাধাৰণৰ পক্ষত থাকি অসমৰ অস্তিত্ব বিপন্নকাৰী, অসম চুক্তি উলংঘন কৰা জাতিধ্বংসী নাগৰিকত্ব সংশোধনী বিধেয়কখনৰ বিৰুদ্ধে প্ৰৱল প্ৰতিবাদ কৰি আহিছে। তদুপৰি ৰাজ্য চৰকাৰৰ লগত মিত্ৰতাত থকাৰ সময়তো কেবিনেটত ইয়াৰ প্ৰৱল বিৰুদ্ধাচৰণ কৰাৰ লগতে বিভিন্ন আন্দোলনৰ কায্যসূচীও গ্ৰহন কৰা পৰিলক্ষিত হৈছিল।
কিন্তু ইমানৰ পাছতো বিজেপিয়ে বিধেয়কখনৰ সমৰ্থন প্ৰত্যাহাৰ নকৰাত অগপ দলে জাতীয় স্বাৰ্থত বিজেপিৰে মিত্ৰতা ছেদ কৰাত ৰাজ্যৰ ৰাজনৈতিক ইতিহাসত এক অন্যতম প্ৰতিবাদী কাৰ্য হিচাপে বিবেচিত হৈছে।
ইতিমধ্যে অগপ দলে অসমৰ জাতীয় সংগঠন সমূহৰ লগত আলোচনাৰ মাজৰে বিধেয়ক খনৰ বিৰুদ্ধে ঐক্যবদ্ধ সংগ্ৰামৰ সিদ্ধান্ত লোৱাৰ উপৰি নিজাববীয়াকৈ একাধিক কাৰ্যসূচী গ্ৰহন কৰিছে।
