আজি দেহাৱসান ঘটিল ঐতিহাসিক অসম আন্দোলনত সন্মুখৰ পৰা নেতৃত্ব দিয়া এগৰাকী বলিষ্ঠ জাতীয়তাবাদী নেতা বিৰাজ কুমাৰ শৰ্মাৰ। তেওঁৰ মৃত্যুৰ লগে লগে অন্ত পৰিল জাতীয় অস্তিত্ব ৰক্ষাৰ আন্দোলনৰ এটা সংগ্ৰামী সত্তাৰ।
১৯৭৯ চনৰ পৰা ১৯৮৫ চনলৈ সদৌ অসম ছাত্ৰ সন্থা আৰু সদৌ অসম গণ সংগ্ৰাম পৰিষদ নেতৃত্ব হোৱা বিদেশী বহিষ্কাৰৰ আন্দোলনত গণ সংগ্ৰাম পৰিষদৰ নেতা আছিল বিৰাজ কুমাৰ শৰ্মা। সংগঠনটোৰ সাধাৰণ সম্পাদকৰ দায়িত্বত থাকি আন্দোলনত বলিষ্ঠ ভূমিকা লোৱা শৰ্মাই খাটিব লগীয়া হৈছিল কাৰাবাসো।
১৯৮৫ চনৰ ১৫ আগষ্টত প্ৰধান মন্ত্ৰী ৰাজীৱ গান্ধীৰ উপস্থিতিত দিল্লীত হোৱা ‘অসম চুক্তি’ৰ অন্যতম স্বাক্ষৰকাৰীও আছিল বিৰাজ কুমাৰ শৰ্মা। লগতে অসম চুক্তিত আন্দোলনকাৰী পক্ষৰ হৈ স্বাক্ষৰ কৰিছিল সদৌ অসম ছাত্ৰ সন্থাৰ তেতিয়াৰ সভাপতি-সম্পাদক ক্ৰমে প্ৰফুল্ল কুমাৰ মহন্ত আৰু ভৃগু কুমাৰ ফুকন।
১৯৮৫ চনত স্বাক্ষৰিত অসম চুক্তি আজিও সম্পূৰ্ণকৈ ৰূপায়ণ নহ’ল। নানা ৰাজনৈতিক পাকচক্ৰত বিগত ৩৩ বছৰে ওলমি ৰ’ল ‘অসমীয় জাতিৰ দলিল’ আখ্যা পোৱা ‘অসম চুক্তি’। কিন্তু তাৰ বিপৰিতে আমাৰ মাজৰ পৰা আঁতৰি গৈছে জাতিৰ অস্তিত্ব ৰক্ষাৰ হকে সেইসময়ত আন্দোলনত জঁপিয়াই পৰা বহু সংগ্ৰামী।
আজি শৰ্মাৰ মৃত্যুৰ লগে লগে আমাৰ মাজৰ পৰা হেৰাই গ’ল ‘অসম চুক্তি’ত স্বাক্ষৰ কৰা দ্বিতীয়জন আন্দোলনকাৰী নেতা। ইয়াৰ পূৰ্বে ২০০৬ চনত মৃত্যু হৈছিল আন এগৰাকী স্বাক্ষৰকৰী ভৃগু কুমাৰ ফুকনৰ।
আনহাতে, ১৯৯১ চনতেই উগ্ৰপন্থীৰ হাতত প্ৰাণ হেৰুৱাইছিল অসম চুক্তিৰ সাক্ষী হিচাপে থকা দেশৰ তদানীন্তন প্ৰধান মন্ত্ৰী ৰাজীৱ গান্ধীয়ে।
এটা কথা ক’ব পাৰি যে চুক্তি সম্পাদনৰ ক্ষেত্ৰত প্ৰত্যক্ষভাৱে জড়িত সকলৰ ভিতৰত এতিয়া আছে কেৱল আছুৰ তেতিয়াৰ সভাপতি তথা তাৰ পৰৱৰ্তী সময়ৰ অসমৰ মুখ্য মন্ত্ৰী প্ৰফুল্ল কুমাৰ মহন্ত।
অসম চুক্তিৰ পৰা অসমৰ ৰাইজে বহু আশা কৰিছিল। চুক্তি ৰূপায়ণৰ বিষয় লৈ বছৰ বছৰ ধৰি চলিল বহু ৰাজনীতি। সেই ৰাজনীতিৰ এতিয়াও অন্ত পৰা নাই।
বৰ্তমানৰ বিজেপি নেতৃত্বাধীন চৰকাৰখনে অসম চুক্তিক লৈ হকে-বিহকে বিভিন্ন সময়ত বিভিন্ন মন্তব্য কৰি আহিছে। শেহতীয়াভাৱে চুক্তিৰ ৬ নম্বৰ দফা ৰূপায়ণৰ বাবে উচ্চস্তৰীয় সমিতি গঠনৰো ঘোষণা কৰিলে। তাৰ বিপৰীতে বিজেপি চৰকাৰৰ পৃষ্ঠপোষকতাতে নাগৰিকত্ব সংশোধনী বিধেয়কৰ জৰিয়তে অসম চুক্তিক নস্যাতো কৰিব বিচৰা হৈছে। তেনে এক জটিল সন্ধিক্ষণত হেৰাই গ’ল চুক্তিৰ এজন স্বাক্ষৰকাৰী।
এতিয়া চুক্তিখনত চহী কৰা মানুহ থাকিলগৈ কেৱল প্ৰফুল্ল কুমাৰ মহন্ত। বিজেপি চৰকাৰৰ হাতত ‘অসম চুক্তি’ উলংঘা হ’ব পৰা এই সময়ছোৱাত এতিয়া চুক্তিখনৰ স্বাক্ষৰকাৰী হিচাপে মহন্তই কি ভূমিকা গ্ৰহণ কৰে সেয়া হৈ পৰিব অত্যন্ত গুৰুত্বপূৰ্ণ।
