‘১২৫ বছৰ গৰকা নগাঁও বেংগলী সন্মীলনীয়ে ৰাজ্যৰ বিভিন্ন জাতি-জনগোষ্ঠীৰ জনসাধাৰণৰ মাজত থকা সমন্বয়ৰ ধাৰা অটুট ৰখাৰ ক্ষেত্ৰত ইতিবাচক ভূমিকা পালন কৰি আহিছে। অনাগত দিনটো এই সন্মিলনীয়ে ড০ ভূপেন হাজৰিকা আৰু হেমাংগ বিশ্বাসৰ সমন্বয়ৰ আদৰ্শৰে বৃহত্তৰ অসমীয়া জাতি গঠন প্ৰক্ৰিয়াত ইতিবাচক বৰঙণি যোগাই যাব লাগিব’। এই মন্তব্য মুখ্য মন্ত্ৰী সৰ্বানন্দ সোণোৱালৰ।
নগাঁৱৰ বেংগলী পূজাবাৰীত নগাঁও বেংগলী সন্মিলনীৰ ১২৫ তম বৰ্ষ উদযাপনৰ সামৰণি অনুষ্ঠানত অংশ গ্ৰহণ কৰা মুখ্য মন্ত্ৰী সোণোৱালে নগাঁও জিলাৰ বটদ্ৰৱাত জন্ম গ্ৰহণ কৰা মহাপুৰুষ শ্রীমন্ত শংকৰদেৱৰ আদৰ্শৰে অনুপ্ৰাণিত হৈ নৱপ্ৰজন্মক মানৱীয় প্ৰমূল্যবোধৰ আধাৰত জীৱন গঢ় দিয়াৰ বাবে পিতৃ-মাতৃ আৰু শিক্ষক-শিক্ষয়িত্ৰীসকলক আহ্বান জনায়।
মানৱীয় অনুভূতিৰে সংযমী হৈ শান্তি-সম্প্ৰীতি আৰু ভাতৃত্ববোধৰ বান্ধোন সুদৃঢ় কৰাৰ বাবে সকলোৱে দায়িত্ব সহকাৰে কাম কৰি গ’লে এই ৰাজ্যখন এখন শক্তিশালী ৰাজ্যত পৰিণত হ’ব বুলিও কয় মুখ্য মন্ত্ৰীয়ে। অসমীয়াভাষী আৰু বঙালীভাষী জনসাধাৰণে অতীজৰে পৰা সমন্বয়ৰে ৰাজ্যখনত বসবাস কৰি আহিছে বুলি উল্লেখ কৰি ভৱিষ্যতেও এই সমন্বয়ৰ ধাৰা অটুট থাকিব বুলি মুখ্য মন্ত্ৰীয়ে কয়।
নগাঁও বেংগলী সন্মিলনীৰ সভাপতি ৰবি শংকৰ মজুমদাৰৰ সভাপতিত্বত অনুষ্ঠিত সভাত ৰে’ল দপ্তৰৰ কেন্দ্ৰীয় ৰাজ্যিক মন্ত্ৰী ৰাজেন গোহাঁই, নগাঁও সমষ্টিৰ বিধায়ক ৰূপক শৰ্মা, নগাঁও বেংগলী সন্মিলনীৰ কাৰ্যকৰী সভাপতি গোপাল পুৰকায়স্থকে ধৰি বহু সংখ্যক গণ্য মান্য ব্যক্তি উপস্থিত থাকে।
