জনজাতিকৰণৰ নামত কেন্দ্ৰৰ ভেল্কিবাজীৰ অভিযোগ উত্থাপন কৰি ক্ষুব্ধ আদিবাসী জাতীয় মহাসভাই আহ্বান জনোৱা আজি ১২ ঘন্টীয়া অসম বন্ধত বিশ্বনাথ জিলাত বন্ধৰ সৰ্বাত্মক প্ৰভাৱ পৰা দেখা যায় ৷
সদৌ অসম আদিবাসী ছাত্ৰ সন্থা (আছা)ৰ কৰ্মী আৰু আন প্ৰতিবাদকাৰীসকলে পুৱাৰে পৰাই বিশ্বনাথ চহৰৰ মাজ-মজিয়াত টায়াৰ জ্বলাই যান-বাহন বন্ধ কৰাৰ লগতে চহৰখনৰ দোকান-পোহাৰ আদিও বন্ধ কৰি তোলা পৰিলক্ষিত হয়।
আৰক্ষীয়ে এই সন্দৰ্ভত মুঠ আঠজন প্ৰতিবাদকাৰীক আটক কৰাৰ লগতে বাকী প্ৰতিবাদকাৰী সকলক খেদি পঠিয়ায়।
আনহাতে, চহৰখনত সুৰক্ষা ব্যৱস্থা কটকটীয়া কৰি তোলা আৰক্ষী তথা সুৰক্ষা বাহিনীয়ে পৰিস্থিতিৰ ওপৰত চোকা দৃষ্টি ৰাখিছে আৰু পৰিস্থিতি নিয়ন্ত্ৰণ কৰিবলৈ সুৰক্ষা বাহিনীক সাজু কৰি ৰাখিছে।
উল্লেখযোগ্য যে কেন্দ্ৰীয় চৰকাৰে ছয় জনগোষ্ঠীৰ জনজাতিকৰণৰ বাবে শেহতীয়াভাৱে গ্ৰহণ কৰা স্থিতিত অসন্তুষ্ট আদিবাসী জাতীয় মহাসভাই আজি ১২ ঘন্টীয়া অসম বন্ধৰ আহ্বান জনাইছিল। আছাই মহাসভাৰ এই বন্ধৰ প্ৰতি সহযোগ কৰি বন্ধ সফল কৰি তুলিবলৈ যৎপৰোনাস্তি প্ৰয়াস চলাইছে।