আজি ২৩ জানুৱাৰি বুধবাৰে উত্তৰ পূব কংগ্ৰেছ সমন্বয়ক সমিতিৰ এখন উচ্চস্তৰীয় সভা অনুষ্ঠিত হয়। এই সভাখনত বিতৰ্কিত নাগৰিকত্ব (সংশোধনী) বিধেয়কখন যাতে ৰাজ্যসভাত গৃহীত কৰাটো প্ৰতিহত কৰাৰ বাবে সৰ্বতোপ্ৰকাৰে প্ৰচেষ্টা চলোৱাৰ সিদ্ধান্ত গ্ৰহণ কৰা হয়। এই সভাত মেঘালয়ৰ প্ৰাক্তন মুখ্য মন্ত্ৰী মুকুল ছাংমাকে আদি কৰি সমগ্ৰ উত্তৰ পূৰ্বাঞ্চলৰেই শীৰ্ষস্থানীয় কংগ্ৰেছী নেতাসকল উপস্থিত থাকে।
এটা বিবৃতিযোগে সমন্বয়ক সমিতিয়ে জনাইছে যে এই বিধেয়কখন ৰাজ্যসভাৰ পৰৱৰ্তী বৈঠকত গৃহীত কৰোৱাৰ বাবে শাসনাধিষ্ঠ এনডিএ চৰকাৰে যৎপৰোনাস্তি চেষ্টা কৰিব।
এনডিএ চৰকাৰে সম্প্ৰদায়ৰভিত্তিক নাগৰিকত্ব প্ৰদান কৰাৰ বাবে গ্ৰহণ কৰা এই পদক্ষেপক সমন্বয়ক সমিতিখনে কঠোৰ ভাষাৰে সমালোচনা কৰে আৰু কয় যে ইয়ে ১৯৮৫ৰ অসম চুক্তিক অৱমাননা কৰিব।
এই বিধেয়কখনে উত্তৰ পূৰ্বাঞ্চললৈ, বিশেষকৈ অসমলৈ ভয়ানক দুৰ্যোগ নমাই আনিব বুলিঘোষণআ কৰি এই বিধেয়কখন যিকোনো উপায়েৰে বাতিল কৰাৰ লাগিব বুলি উত্তৰ পূব কংগ্ৰেছ সমন্বয়ক সমিতিয়ে প্ৰকাশ কৰে।
উক্ত বৈঠকত উত্তৰ পূব কংগ্ৰেছ সমন্বয়ক সমিতিয়ে আৰু প্ৰস্তাৱ গ্ৰহণ কৰে যে নাগৰিকত্ব (সংশোধনী) বিধেয়কখন যাতে আইনত পৰিণত হ’ব নোৱাৰে তাৰ বাবে ৰাজ্যসভাৰ সকলো সদস্যৰেই সহায় বিচৰা হ’ব।
ৰাজ্যসভাৰ সাংসদ তথা অসমৰ জ্যেষ্ঠ কংগ্ৰেছ নেতা ভুৱনেশ্বৰ কলিতাই কৈছে, ‘‘নাগৰিকত্ব (সংশোধনী) বিধেয়কখন যদিওবা লোকসভাত গৃহীত হৈছে, তথাপি বিৰোধী দলৰ সংঘবদ্ধ বিৰোধৰ বাবে তাক ৰাজ্যসভাৰ সদ্যসমাপ্ত অধিৱেশনত গৃহীত কৰিব পৰা নগ’ল।’’
