বাক্সা জিলাৰ তামুলপুৰৰ অগ্ৰণী শিক্ষানুষ্ঠান তামুলপুৰ শংকৰদেৱ বিদ্যা নিকেতনৰ ২ফেব্ৰুৱাৰিৰ পৰা ৰূপালী জয়ন্তী সমাৰোহ আৰম্ভ হৈছে। এই উপলক্ষে আজি দ্বিতীয় দিনা পুৱা বিদ্যালয়খনৰ পৰা অঞ্চলটোৰ বিভিন্ন জাতি-জনগোষ্ঠীয় কৃষ্টিসমূহৰ প্ৰদৰ্শনেৰে এক সাংস্কৃতিক শোভাযাত্ৰা উলিওৱা হয়।
অঞ্চলটোত থকা প্ৰতিটো জনগোষ্ঠীৰ কৃষ্টিসমূহ প্ৰদৰ্শন কৰাৰ লগতে বেণ্ড পাৰ্টি, সত্ৰীয়া নৃত্য, বিয়া নাম, শিশু কৃষ্ণৰ লীলা আদি প্ৰদৰ্শনে সাংস্কৃতিক শোভাযাত্ৰাটোক এক বিশেষ মাত্ৰা প্ৰদান কৰে। শোভাযাত্ৰা উদ্বোধন কৰি দিয়া ভাষণত তামুলপুৰ উচ্চতৰ মাধ্যমিক বিদ্যালয়ৰ অধ্যক্ষ বিভূতি ডেকাই কয় যে তামুলপুৰ অঞ্চলটোক শিক্ষাৰ ক্ষেত্ৰত এঢাপ আগবঢ়াই নি তামুলপুৰ শংকৰদেৱ বিদ্যা নিকেতনে গৌৰৱজ্বল ২৫টা বছৰ অতিক্ৰম কৰিলে আৰু ই অঞ্চলটোৰ বাবে এক গৌৰৱৰ বিষয়।
ইয়াৰ পিচতেই ৰূপালী জয়ন্তী উৎসৱ উদযাপন সমিতিৰ সভাপতি মুকুন্দ দাসৰ সভাপতিত্বত মুকলি সভাত স্মৃতিগ্ৰন্থ উন্মোচন কৰে বাক্সা জিলা মণ্ডলৰ বিদ্যালয় সমূহৰ পৰিদৰ্শক ৰমেশ চন্দ্ৰ চুতিয়াই। স্মৃতিগ্ৰন্থ উন্মোচন কৰি দিয়া ভাষণত চুতিয়াই কয়, ‘অসমৰ শিক্ষাব্যৱস্থা টনকিয়াল কৰাত শংকৰদেৱ বিদ্যা নিকেতন, জাতীয় বিদ্যালয় আদি ব্যক্তিগত খণ্ডৰ শিক্ষানুস্থানে যথেষ্ট অৰিহনা আগবঢ়াই আহিছে।’
সভাত অসম শিশু শিক্ষা সমিতি, অসমৰ সভাপতি বশিষ্ট ডেকা, শিশু শিক্ষা সমিতিৰ বিভাগ নিৰীক্ষক অখিল শৰ্মা, তামুলপুৰ শংকৰদেৱ বিদ্যা নিকেতনৰ প্ৰাক্তন প্ৰধান আচাৰ্য অমৰেন্দ্ৰ শৰ্মা, নিকেতন পৰিচালনা সমিতিৰ সভাপতি মোহন ডেকা, নিকেতনৰ প্ৰধান আচাৰ্য সুৰেন্দ্ৰ নাথ কলিতায়ে অংশগ্ৰহণ কৰে।
